ເມືອງຄຳເກີດ ເປັນເມືອງໜື່ງທີ່ເຕັມໄປດ້ວຍຄວາມອຸດົມສົມບູນທາງທຳມະຊາດ, ພູຜາປ່າໄມ້ທີ່ຂຽວສົດງົດງາມ, ເຕັມໄປດ້ວຍອາລິຍະທຳທີ່ເກົາແກ່ ແລະ ຮ່ອງຮອຍປະຫວັດສາດມາຢ່າງຍາວນາມເຊັ່ນ: ຮ່າງກະດູກມະນຸດກາຍເປັນ, ເສົາສາລາພັນຫ້ອງຂອງເມືອງຄຳເກີດບູຮານ, ຖ້ຳມັງກອນ, ບໍ່ນ້ຳອຸ່ນ, ຜານາງຮ້ອງ ແລະ ອື່ນໆ ເຊີ່ງມີຕຳນານເລົ່າຂານກັນມາເຊັ່ນຄົນຕໍ່ເຊັ່ນຄົນຈົນເຖີງປັດຈຸບັນນີ້. 

        “ວັງນໍ້າເຢັນ” ບ້ານນາປ່າຫວ້ານ ກໍ່ເປັນອີກແຫຼ່ງທ່ອງທ່ຽວແຫ່ງໜຶ່ງທີ່ມີທີ່ຕັ້ງໄກ້ຄຽງກັນກັບສາລາພັນຫ້ອງ ຂອງເມືອງຄຳເກີດບູຮານ ຫ່າງຈາກເທດສະບານເມືອງຄຳເກີດຕາມເສັ້ນທາງ 8A  ອອກສູ່ທາງແບ່ງຫຼັກຊາວ ປະມານ 30 ກິໂລແມັດ ແລ້ວລ້ຽວຂວາບໍລິເວນບ້ານໂພນຕານ ເຊີ່ງມີປ້າຍຊີ້ບອກທາງເຂົ້າແຫຼ່ງທ່ອງທ່ຽວ ວັງນໍ້າເຢັນ ປະມານ 5 ກິໂລແມັດ

      “ວັງນໍ້າເຢັນ” ເປັນວັງນໍ້າໃສ ແລະ ເຢັນຕະຫຼອດປີ ບໍ່ເວັ້ນຍາມໜາວ ແລະ ຍາມຮ້ອນ ວັງແຫ່ງນີ້ເປັນຕົ້ນກຳເນີດຂອງສາຍນໍ້າໝັງ ທີ່ເປັນສາຂາຂອງ ນໍ້າເທີນ ເປັນສະຖານທີ່ສວຍງາມທາງທຳມະຊາດ ທີ່ອ້ອມຮອບດ້ວຍຜູຜາປ່າໄມ້ ແລະ ຊີວະນາໆພັນ ຖ້າມາເບີ່ງແລ້ວທຳມະຊາດສ້າງມາເຮັດໃຫ້ມະນຸດ ໄດ້ມີຄວາມຊື່ນຊົມແລະປະທັບໃຈກັບສິ່ງມະຫັດສະຈັນ ຖ້າຜູໃດໄດ້ໄປທ່ຽວແລ້ວແມ່ນມີຄວາມອອນຊອນ ແລະ ເພີດໄປກັບທຳມະຊາດ ຢ່າງບໍ່ຮູ້ເປີດຮູ້ໜ່າຍ, ນັກທ່ອງທ່ຽວຫຼາຍທ່ານຍັງໃຫ້ຄວາມສົນໃຈຢາກມາສຶກສາຮຽນຮູ້ກ່ຽວກັບທຳມະຊາດ ເພາະວ່າວັງດັ່ງກ່າວນີ້ ບໍ່ວ່າຍາມໃດ ຈະເປັນຍາມຝົນຫຼືຍາມແລ້ງ ຈະມີລະດັບນ້ຳເທົ່າປົກະກະຕິ ບໍ່ຂື້ນສູງ ແລະ ບໍແຫ້ງ ຍາມຝົນຕົກນ້ຳລົງ ຈະບໍມີຄວາມຂຸ່ນມາເຈືອປົນ ດ້ວຍເຫດນັ້ນໜອງນ້ຳແຫ່ງນີ້ຈະມີລັກສະນະພິເສດແຕກຕ່າງຈາກໜອງນ້ຳແຫ່ງອື່ນໆ.

       ດ້ານການບໍລິການ ນັກທ່ອງທ່ຽວສາມາດພັກແຮມຄືນ ( Home stay ) ສຶກສາຮຽນຮູ້ກັບວັດທະນະທຳຊົນເຜົ່າ ທີ່ມີເອກະສະເພາະມາແຕ່ເຫີງນານ, ຮານປະທານອາຫານເອກະລັກແບບບ້ານນາ, ມີຜູ້ນຳພາທ່ຽວ ແລະ ສຶກສາຮຽນຮູ້ດ້ານຊີວະນາໆພັນ ແລະ ອື່ນໆ