ບໍລິຄຳໄຊ ກໍ່ຖືໄດ້ວ່າເປັນອີກໜຶ່ງແຂວງທີ່ມີຄວາມສຳຄັນທາງດ້າການຄ້າ ແລະ ການທ່ອງທ່ຽວ ເພາະເປັນປະຕູທຳອິດຈາກພາກເໜືອລົງສູ່ພາກໃຕ້ ແລະ ຍັງເປັນແຂວງທ່າດ່ານທີ່ມີຊາຍແດນຕິດກັບ 2 ປະເທດຄື: ສສ ຫວຽດນາມ ແລະ ປະເທດໄທ. ຖິ່ນນ້ຳສອງສີແຫ່ງນີ້ ຍັງມີຄວາມອຸດົມສົມບູນຂອງປ່າເຂົາລຳເນົາໄພ ເປັນແຫຼ່ງອາໄສຂອງສັດປ່າທີ່ຫາຍາກທີ່ສຸດຂອງໂລກນັ້ນກໍ່ຄືໂຕເສົາຫຼາ, ມີປ່າສະຫງວນຫຼາຍແຫ່ງທີ່ສຳຄັນ ແລະ ຍັງມີສະຖານທີ່ທ່ອງທ່ຽວທາງທຳມະຊາດທີ່ນັກທ່ອງທ່ຽວໃຫ້ຄວາມສົນໃຈ.

      ປ່າສະຫງວນແຫ່ງຊາດພູເຂົາຄວາຍ ຍັງມີມູນສະເໜ່ທີ່ເປັນເອກະລັກສະເພາະ ແລະ ຄວາມງາມຂອງທຳມະຊາດ ແຫ່ງພຶກສານາໆພັນ ຢ່າງບໍ່ມີວັນຈາງຫາຍ ເຊັ່ນ: ຄວາມງາມຂອງຫ້ວຍນ້ຳລຳທານ ໃສເຢັນໄຫຼລິນຢູ່ຕະຫຼອດປີ ບວກກັບຄວາມງາມຂອງຕົ້ນໄມ້ໃບຫຍ້າ ພຶກສາຊາດນາໆພັນ ທີ່ຊົງຄວາມງາມຂຽວອຸ່ມທຸ່ມຢູ່ຕະຫຼອດປີ ໃນອ້ອມຮອບປ່າສະຫງວນແຫ່ງດັ່ງກ່າວ.

      ''ຕາດຊາຍ'' ກໍ່ເປັນແຫຼງທ່ອງທ່ຽວອີກແຫ່ງໜຶ່ງທີ່ມີຄວາມສວຍງາມ ແລະ ອຸດົມສົມບູນທາງທຳມະຊາດ ຕັ້ງຢູ່ເຂດບ້ານຫາດໄຄ້ ບໍລິເວນປ່າສະຫງວນແຫ່ງຊາດພູເຂົາຄວາຍ ຫ່າງຈາກເທດສະບານເມືອງທ່າພະບາດ ປະມານ 19 ກິໂລແມັດ, ໃນລະດູຝົນຕາດຊາຍຈະມີຄວາມງົດງາມເປັນພິເສດ, ເປັນນ້ຳຕົກຕາດຫຼາຍຊັ້ນ, ສາມາດເດີນທາງໄປທ່ຽວຊົມໄດ້ດ້ວຍການຂີ່ເຮືອ ຫຼື ລົດກໍ່ໄດ້. ນອກນັ້ນ, ບໍລິເວນຜາຊາຍ ຍັງເປັນບ່ອນສຶກສາຄົ້ນຄວ້າວິໄຈຊີວະນາໆພັນ ໂດຍສະເພາະແມ່ນດອກເຜິ້ງປ່າ(ດອກກ້ວຍໄມ້) ທີ່ມີຢ່າງຫຼວງຫຼາຍ ເປັນສິ່ງປະດັບປະດາໃຫ້ຜືນປ່າລໍລິເວນດັ່ງກ່າວມີຄວາມສວຍງາມ.ຕາດຊາຍເລີ່ມເປີດໃຫ້ນັກທ່ອງທ່ຽວເຂົ້າໄປທ່ຽວຊົມຢ່າງເປັນທາງການເມື່ອປີ 2004 ປັດຈຸບັນນີ້ໄດ້ມີສິ່ງອຳນວຍຄວາມສະດວກໃຫ້ແກ່ນັກທ່ອງທ່ຽວ ບໍ່ວ່າຈະເປັນສາລາຊົມວິວ, ເຮືອນພັກ, ຫ້ອງນ້ຳ ແລະ ອື່ນໆ. ບັນຍາກາດຕາດຊາຍເໝາະແກ່ການພັກຜ່ອນກິນເຂົ້າປ່າ, ລົງຫຼີ້ນນ້ຳເຢັນສະບາຍ ແລະ ສຳຜັດກັບທຳມະຊາດຍັງຄົງອຸດົມສົມບູນຢູ່.

      ນອກຈາກຕາດຊາຍແລ້ວ ບໍລິເວນໃກ້ຄຽງກັນຍັງມີຕາດເລິກ, ຕາດຍອງ ບ້ານຍາງເຄືອ ເຊິງນອນຢູ່ໃນເຂດປ່າສະຫງວນແຫ່ງຊາດພູເຂົາຄວາຍເຊັ່ນດຽວກັນ ແລະ ຍັງມີໝູ່ບ້ານແຖບນັ້ນເຊັ່ນ: ບ້ານນາ(ບໍລິເວນໃກ້ໆກັບວັດທ່າພະບາດ) ກໍ່ໄດ້ເປີດໂຮມສະເຕໃຫ້ກັບນັກທ່ອງທ່ຽວເພື່ອຮຽນຮູ້ວິຖີການດຳລົງຊີວິດແບບຊາວບ້ານ ຄຽງຄູ່ກັບກິດຈະກຳເຊັ່ນ: ການເດີນປ່າ, ຕັ້ງແຄ້ມເບິ່ງດາວ, ທັດສະນະສຶກສາຊີວະນາທພັນ ເອີ້ນວ່າເປັນການສ້າງສັນປະສົບການ ແລະ ຄວາມຮູ້ສຸດພິເສດໃຫ້ແກ່ນັກທ່ອງທ່ຽວທັງຊາວລາວ ແລະ ຊາວຕ່າງປະເທດຜູ້ທີ່ມີຄວາມມັກຮັກທຳມະຊາດຢ່າງແທ້ຈິງ.