ແຫຼ່ງທ່ອງທ່ຽວ “ແກ້ງຫຼວງ” ຕັ້ງຢູ່ສາຍນໍ້າເທີນເຂດບ້ານທ່າບັກ ເມືອງຄຳເກີດ ແຂວງບໍລິຄຳໄຊ ລຽບຕາມທາງເລກ 8A ຫ່າງຈາກເທດສະບານເມືອງຄຳເກີດ 23 ກິໂລແມັດ,​ ຈາກບ້ານທ່າບັກ ເດີນທາງໄປດ້ວຍເຮືອຈັກ ທີ່ປະຊາຊົນມີໄວ້ບໍລິການໄປອີກ 13 ກິໂລແມັດ ໂດຍຈະໃຊ້ເວລາ 1 ຊົ່ວໂມງ ກໍ່ຈະເຖີງຈຸດດັ່ງກ່າວ.

         ການເດີນທາງໄປແຕ່ຂົວນໍ້າເທີນໄປຫາແກ້ງຫຼວງ ນັກທ່ອງທ່ຽວຈະໄດ້ສຳພັດກັບທຳມະຊາດຂອງສາຍນໍ້າເທີນ ທີ່ສອງຟາກຟັ່ງເຕັມໄປດ້ວຍທຳມະຊາດສວຍງາມ ມີຕົ້ນໄມ້ນ້ອຍ-ໃຫຍ່ ລຽງສະຫຼັບກັບກາຍ ລຽງກັນເປັນຖັນໆ ຂຽວຊະອຸ່ມຕະຫຼອດປີ, ບວກໃສ່ກັບສາຍນໍ້າທີ່ໃສ,  ສະອາດ ແລະ ອາກາດທີ່ປອດໂປ່ງບໍລິສຸດ ອີກດ້ວຍ. ໃນລະຫວ່າງການນັ່ງເຮືອເດີນທາງສູ່ແກ້ງຫລວງນັ້ນ ຍັງຈະໄດ້ສຳພັດກັບບັນດາແກ້ງນ້ອຍຕ່າງໆທີ່ຢູ່ຕາມລຳນ້ຳເທີນ ກ່ອນຈະເຖີງຈຸດໝາຍປາຍທາງ ເຊັ່ນ: ແກ້ງສູນ, ແກ້ງກະຍອງ, ແກ້ງອີ່ລຸ້ງ, ແກ້ງຫາດກວ້າງ ແລະ ແກ້ງຖໍ້າຮຸ່ງ, ແກ້ງເຫລົ່ານີ້ຈະເປັນພະລານຫີນ ສະຫຼັບຊັບເປັນເດຍລະດາດ ນັກທ່ອງທ່ຽວຈະໄດ້ທ່ຽວຊົມພະລານຫີນ, ສຳພັດກັບນ້ຳໃສໄຫຼເຢັນ

     ແກ້ງຫຼວງ ເປັນແກ້ງທີ່ມີຂະໜາດໃຫຍ່ ມີຄວາມສູງຫຼາຍຊັ້ນສະລັບກັນຢ່າງສວຍງາມ, ມີບ່ອນອາບນ້ຳທີ່ປອດໄພ, ມີຮົ່ມໄມ້ທີ່ເຢັນສະບາຍ ເໝາະແກ່ການມາພັກຜ່ອນ, ທ່ຽວຊົມທຳມະຊາດ, ກີນເຂົ້າປ່າ, ຖ່າຍຮູບເປັນທີ່ລະນຶກ, ລະດູການທີ່ເໝາະແກ່ການໄປທ່ຽວຊົມທຳມະຊາດແກ້ງຫຼວງ ແມ່ນໃນຊ່ວງໄລຍະເດືອນພະຈິກ ຫາ ເດືອນ ພຶດສະພາຂອງແຕ່ລະປີ ເພາະຊ່ວງນີ້ ອາກາດຈະດີ, ນ້ຳບໍ່ຫລາຍປານໃດ ແລະ ສະອາດດີ.