ຂໍ້ມູນຈາກ: news.com.la

 

ເມື່ອຄິດເຖິງແຄລຊຽມ ຫຼາຍຄົນມັກຈະຄິດເຖິງນົມ ແມ່ນບໍ່? ແຕ່ຄວາມຈິງແລ້ວ ຍັງມີອາຫານທີ່ມີທາດແຄລຊຽມອື່ນໆອີກຫຼາຍຢ່າງ, ລອງຫັນມາກິນອາຫານເຫຼົ່ານີ້ເພື່ອເພີ່ມແຄລຊຽມໃຫ້ກັບຮ່າງກາຍນຳກັນ ເພາະນອກຈາກຈະບໍ່ຕ້ອງກິນແຕ່ນົມຢ່າງດຽວແລ້ວ ຍັງຈະໄດ້ລົດຊາດ ແລະ ສານອາຫານທີ່ຫຼາກຫຼາຍຂຶ້ນອີກດ້ວຍ. 5 ອາຫານທີ່ມີ “ແຄລຊຽມ” ນອກຈາກນົມ

1. ຊີສ ຊີສ ເປັນຜະລິດຕະພັນທີ່ເຮັດມາຈາກໂປຣຕີນໃນນົມ ຈຶ່ງມີປະລິມານຂອງແຄລຊຽມສູງເຊັ່ນດຽວກັບນົມ ຫຼື ອາດຈະໃຫ້ແຄລຊຽມຫຼາຍກວ່ານົມເຖິງ 2 ເທົ່າ. ນອກຈາກນີ້ ຍັງມີນໍ້າຕານແລກໂຕສຕໍ່າກວ່ານົມອີກດ້ວຍ. ດັ່ງນັ້ນ, ຫາກໄດ້ລອງເຮັດອາຫານຝຣັ່ງແລ້ວ ແນະນຳໃຫ້ໃສ່ຊີສລົງໄປນຳເພື່ອຊ່ວຍເພີ່ມແຄລຊຽມໃຫ້ກັບຮ່າງກາຍ ແລະ ເພີ່ມລົດຊາດໃຫ້ກັບອາຫານອີກດ້ວຍ.

ແຕ່ຕ້ອງລະວັງວ່າບໍ່ຄວນກິນຊີສຫຼາຍເກີນໄປ ເພາະຊີສນັ້ນໃຫ້ພະລັງງານສູງ ຫາກກິນຫຼາຍອາດຈະສ່ຽງເຮັດໃຫ້ຕຸ້ຍໄດ້.

2. ໂຢເກີດ ເປັນອີກໜຶ່ງຜະລິດຕະພັນຈາກນົມທີ່ໃຫ້ໂປຣຕີນ ແລະ ແຄລຊຽມສູງ.

ນອກຈາກນີ້, ໂຢເກີດຍັງເປັນນົມທີ່ຜ່ານການໝັກຈົນມີຈຸລິນຊີທີ່ເປັນປະໂຫຍດຕໍ່ຮ່າງກາຍ ແລະ ຍັງຖືກຍ່ອຍເປັນໂມເລກຸນຂະໜາດນ້ອຍ ເຮັດໃຫ້ງ່າຍຕໍ່ການດູດຊຶມສານອາຫານເຂົ້າສູ່ຮ່າງກາຍ ແລະ ດ້ວຍຄວາມເຂັ້ມຂຸ້ນຂອງມັນ ເຮົາຈຶ່ງບໍ່ຈຳເປັນຕ້ອງກິນໂຢເກີດໃນປະລິມານເທົ່າກັບນົມ ເພື່ອໃຫ້ໄດ້ແຄລຊຽມໃນປະລິມານທີ່ເທົ່າກັນ ເພາະສາມາດກິນໂຢເກີດ 1 ຖ້ວຍນ້ອຍຕໍ່ 1 ວັນ ໄດ້ສະບາຍ ແຕ່ພະຍາຍາມເລືອກໂຢເກີດລົດຊາດທຳມະຊາດ, ບໍ່ໃສ່ນໍ້າຕານເພີ່ມ.

3. ທັນຍະພືດ ສຳລັບຄົນທີ່ແພ້ຜະລິດຕະພັນຈາກນົມ ໃຫ້ລອງກິນທັນຍະພືດພວກງາດຳ, ງາຂາວ, ແກ່ນແຟລັກຊ໌ (Flax Seed), ແກ່ນເຈຍ (Chia Seed) ເພາະທັນຍະພືດເຫຼົ່ານີ້ມີແຄລຊຽມຫຼາຍກວ່ານົມ ໃນປະລິມານທີ່ເທົ່າກັນ ໂດຍສະເພາະງາດຳທີ່ມີແຄລຊຽມສູງກວ່ານົມເຖິງ 8 ເທົ່າ.

4. ປາຊາດີນ ບໍ່ເຊື່ອກໍຕ້ອງເຊື່ອວ່າ ປາຊາດີນທີ່ຢູ່ໃນປາກະປ໋ອງກໍມີແຄລຊຽມ ໂດຍປາຊາດີນກະປ໋ອງທີ່ເຮົາກິນທັງກ້າງ ແລະ ກະດູກນັ້ນແຫຼະ ທີ່ເປັນແຫຼ່ງແຄລຊຽມທີ່ດີຕໍ່ຮ່າງກາຍ ແຕ່ຫາກຢາກຫຼຸດປະລິມານໂຊດຽມຈາກນໍ້າຊອສໝາກເລັ່ນໃນປາກະປ໋ອງ ກໍລອງເລືອກກິນປາຊາດີນກະປ໋ອງໃນນໍ້າແຮ່, ນໍ້າມັນໝາກກອກ ຫຼື ປາກະປ໋ອງແຫ້ງໆກໍໄດ້

5. ຜັກໃບຂຽວ ຜັກໃບຂຽວເປັນແຫຼ່ງຂອງແຄລຊຽມທີ່ບໍ່ຄວນພາດ ບໍ່ວ່າຈະເປັນຜັກກາດນາ, ຜັກອີ່ເລີດ, ຕຳນິນ, ຂີ້ເຫຼັກ, ບລັອກໂຄລີ ແລະ ອື່ນໆ ສາມາດກິນໄດ້ໃນທຸກໆມື້. ນອກຈາກຈະມີແຄລຊຽມສູງແລ້ວ ຍັງຊ່ວຍບຳລຸງເມັດເລືອດແດງ, ຫຼຸດຜ່ອນຄວາມສ່ຽງໃນການເປັນພະຍາດເລືອດຈາງອີກດ້ວຍ.