ໝາກຕານ ເປັນໝາກໄມ້ພື້ນບ້ານທີ່ຢູ່ຄູ່ກັບຄົນລາວຕັ້ງແຕ່ອະດີດ ຈົນເຖິງປະຈຸບັນ ເຊິ່ງທຸກສ່ວນຂອງໝາກຕານສາມາດນຳມາໃຊ້ປະໂຫຍດຢ່າງຫຼວງຫຼາຍ ເຊັ່ນ: ນໍ້າຕານກ້ອນ ຫຼື ຈະນຳໝາກອ່ອນມາຮັບປະທານສົດໆກໍ່ຍິ່ງໄດ້ລົດຊາດແຊບ ຫອມຫວານ ຮູ້ສຶກສົດຊື່ນນັ້ນເອງ. ໝາກຕານ ປະກອບດ້ວຍສານອາຫານ ທີ່ມີປະໂຫຍດຢ່າງຫຼວງຫຼາຍຕໍ່ຮ່າງກາຍເປັນຕົ້ນແມ່ນ: ມີຄາໂບໄຣເດສ ທີ່ໃຫ້ພະລັງງານທີ່ດີແກ່ຮ່າງກາຍ ພ້ອມທັງມີໄຟເບີ້ທີ່ເຮັດໃຫ້ຮູ້ສຶກອີ່ມດົນ ແລະ ຊ່ວຍໃນການຂັບຖ່າຍທີ່ດີ ແລະ ປ້ອງກັນການຖອກທ້ອງ. ມີແຄລຊ້ຽມ, ຟໍຟໍສຣັສ ທີ່ຊ່ວຍເສີມສ້າງກະດູກ ແລະ ແຂ້ວ ໃຫ້ແຂງແຮງ ແລະ ຊ່ວຍໃຫ້ຮ່າງກາຍເຮັດວຽກເປັນປົກກະຕິ, ທາດເຫຼັກ ຊ່ວຍບຳລຸງເລືອດ ແລະ ການໝູນວຽນຂອງເລືອດ. ນອກຈາກນັ້ນ, ຍັງມີວິຕາມິນຊີ, ສານຕ້ານອະນຸມູນອິດສະຫຼະທີ່ດີຕໍ່ຮ່າງກາຍ, ເຮັດໃຫ້ຮ່າງກາຍແຂງແຮງ, ຊ່ວຍບຳລຸງຜິວພັນໃຫ້ສົດໃສ ແລະ ແຂງແຮງ. ພ້ອມນີ້ ໝາກຕານຍັງມີສັບພະຄຸນທາງຢາສະໝຸນໄພນຳນຳອີກ ທີ່ຊ່ວຍລະລາຍຂີ້ກະເທີ່ໃນລຳຄໍ, ບັນເທົາອາການໄອ, ໄອຊໍ້າເຮື້ອ ແລະ ຊ່ວບັນເທົາອາການຮ້ອນໃນໄດ້ອີກດ້ວຍ.

ຂໍ້ມູນຈາກ: news.com.la