ຄະນະພັກ-ອຳນາດການປົກຄອງແຂວງບໍລິຄຳໄຊ ໄດ້ເອົາໃຈໃສ່ຊີ້ນຳ-ນຳພາ ໃນການປົກປັກຮັກສາ ແລະ ສ້າງສາພັດທະນາແຂວງ ໃຫ້ນັບມື້ມີຄວາມຈະເລີນຮຸ່ງເຮືອງ ນັບແຕ່ຕົວເມືອງໄປສູ່ເຂດຊົນນະບົດພູດອຍ, ເຮັດໃຫ້ຊ່ອງຫວ່າງ ຄວາມຫຼຸດໂຕນໃນດ້ານຕ່າງໆ ລະຫວ່າງຕົວເມືອງ ແລະ ຊົນນະບົດຄ່ອຍໆຫຼຸດນ້ອຍລົງ. ປະຈຸບັນຕົວເມືອງຕ່າງໆພາຍໃນແຂວງ ໂດຍສະເພາະແມ່ນຕົວເມືອງປາກຊັນ ຊຶ່ງແມ່ນເມືອງເອກ ເມືອງເທດສະບານຂອງແຂວງ ໄດ້ມີການກໍ່ສ້າງ, ປັບປຸງສ້ອມແປງເສັ້ນທາງ, ຕິດຕັ້ງລະບົບໄຟເຍືອງທາງ, ໄຟແສງສີໃຫ້ມີຄວາມຈົບງາມ ຕ້ອນຮັບສະເຫຼີມສະຫລອງວັນສຳຄັນທາງປະຫວັດສາດຂອງຊາດ ຂອງທ້ອງຖິ່ນ ດ້ວຍຄວາມພາກພູມ ແລະ ເອກອ້າງທະນົງໃຈ.

    ແຕ່ຄຽງຄູ່ກັບຄວາມສວຍງາມທີ່ໜ້າປະທັບໃຈດັ່ງກ່າວນັ້ນ ພວກເຮົາຍັງຕ້ອງໄດ້ເອົາໃຈໃສ່ຫຼາຍດ້ານ ທີ່ເຫັນວ່າຍັງບໍ່ທັນແທດເໝາະ, ສ້າງພາບພົດອັນບໍ່ດີ ໃຫ້ແກ່ຕົວເມືອງ ເປັນຕົ້ນແມ່ນການປ່ອຍສັດລ້ຽງປະເພດງົວ, ຄວາຍ, ແບ້...ຢ່າງຊະຊາຍຢູ່ຕາມຕົວເມືອງ, ຕາມຖະໜົນຫົນທາງສາຍຕ່າງໆ ຊຶ່ງນອກຈາກບໍ່ສວຍງາມແລ້ວ ຍັງສ້າງຄວາມສັບສົນ ລຳຄານໃຫ້ແກ່ການສັນຈອນ, ທັງມີຄວາມສ່ຽງຕໍ່ການເກີດອຸບັດຕິເຫດຕາມທ້ອງຖະໜົນຕື່ມອີກ.

    ແຈ້ງການ, ຄຳສັ່ງ, ຂໍ້ກຳນົດ ມີລະບຽບການໃນການຄຸ້ມຄອງຢ່າງເຂັ້ມງວດພໍສົມຄວນ ໂດຍໃຫ້ນຳເອົາສັດລ້ຽງຂອງຕົນ ອອກລ້ຽງຢູ່ເຂດນອກເມືອງ ແລະ ກໍ່ເປັນໜ້າຍ້ອງຍໍຊົມເຊີຍ ຕໍ່ກັບຄວາມເອົາໃຈໃສ່ໃຫ້ຄວາມຮ່ວມມືຂອງຜູ້ເປັນເຈົ້າຂອງສັດ ທີ່ໄດ້ເປັນເຈົ້າການປະຕິບັດຕາມລະບຽບການເປັນສ່ວນຫຼາຍ, ແຕ່ກໍ່ຍັງມີເຈົ້າຂອງສັດຈຳນວນໜຶ່ງຍັງເມີນເສີຍ ບໍ່ເຄົາລົບລະບຽບກົດໝາຍ ຍັງລ້ຽງສັດຢູ່ຕາມຕົວເມືອງ ແລະ ປ່ອຍປະຢ່າງຊະຊາຍ ປະກົດໃຫ້ເຫັນທົ່ວໄປໃນແຕ່ລະໄລຍະ. ພັກ-ລັດເຮົາ ໄດ້ມີນະໂຍບາຍສົ່ງເສີມ ການຜະລິດກະສິກຳ ລ້ຽງສັດ ແລະ ປູກຝັງ ຊຶ່ງແມ່ນພື້ນຖານຂອງການພັດທະນາເສດຖະກິດຂອງປະເທດເຮົາ, ການລ້ຽງສັດປະເພດງົວ, ຄວາຍ ເປັນການຕອບສະໜອງສະບຽງອາຫານປະເພດຊີ້ນ ຫຼຸດຜ່ອນການນຳເຂົ້າຊີ້ນຈາກຕ່າງປະເທດ ທັງເປັນການສ້າງເສດຖະກິດແກ່ຜູ້ລ້ຽງເປັນຢ່າງດີ ປະກອບສ່ວນສ້າງເສດຖະກິດທ້ອງຖິ່ນ ແລະ ເສດຖະກິດແຫ່ງຊາດໃຫ້ມີຄວາມເຂັ້ມແຂງ. ແຕ່ການສົ່ງເສີມດັ່ງກ່າວ ແມ່ນໄດ້ກໍານົດເຂດກະສິກໍາລ້ຽງສັດສະເພາະ ຫາກບໍ່ແມ່ນສົ່ງເສີມໃຫ້ລ້ຽງຢູ່ຕາມຕົວເມືອງ. “ງົວໃນເມືອງ” ຫຼື ສັດລ້ຽງທີ່ປ່ອຍຊະຊາຍຕາມຕົວເມືອງ ແມ່ນບັນຫາທີ່ຄວນໄດ້ມີການແກ້ໄຂ ໂດຍການສົມທົບຂອງການຈັດຕັ້ງ, ອຳນາດການປົກຄອງທີ່ກ່ຽວຂ້ອງ ແລະ ສຳຄັນຕົ້ນຕໍແມ່ນເຈົ້າຂອງສັດໃຫ້ການຮ່ວມມື ໃຫ້ຄວາມເຄົາລົບ ປະຕິບັດຕາມລະບຽບກົດໝາຍຂອງບ້ານເມືອງ ກໍ່ຈະເຮັດໃຫ້ຕົວເມືອງປາກຊັນ ແລະ ເມືອງອື່ນໆມີຄວາມຈົບງາມ ທັງປະກອບສ່ວນອັນສຳຄັນ ໃນການເປັນເຈົ້າພາບທີ່ດີ ປີທ່ອງທ່ຽວລາວ-ທ່ອງທ່ຽວແຂວງບໍລິຄຳໄຊ 2018 ອີກດ້ວຍ.

ໂດຍ: ອ ພາວນະທີ