ເຈດີກະເບື້ອງເຄືອບ ເມືອງນານກິງ ເປັນການກໍ່ສ້າງເຈດີ ຮູບ 8 ຫຼ່ຽມ ມີທັງໝົດ 9 ຊັ້ນ, ຄວາມສູງຂອງເຈດີ 78, 3 ແມັດ ( 261 ຟຸດ) ຫຼັງຄາຂອງເຈດີມຸງດ້ວຍກະເບື້ອງເຄືອບສີຂຽວ ມີກະດິ່ງແຂວນໄວ້ 80 ອັນ ແລະ ມີໂຄມໄຟປະດັບຜູກແຂວນໄວ້ຫຼາຍຮ້ອຍອັນຕາມຊາຍຄາ, ຍອດຂອງເຈດີ ເປັນຮູບກົມປິດທອງ, ອົງເຈດີ ກໍ່ດ້ວຍຫີນປະດັບດ້ວຍກະເບື້ອງເຄືອບ.

    ເຈດີກະເບື້ອງເຄືອບ ເມືອງນານກິງນີ້ ແຕ່ເດີມແມ່ນພຸດທະສາສະນິກະຊົນຊາວຈີນເປັນຜູ້ສ້າງໄວ້ພຽງ 3 ຊັ້ນ ແຕ່ໃນໄລຍະຕໍ່ມາ ປີ ຄສ 1430 ຈັກກະພັດຍຸງໂລ້ ແຫ່ງລາຊະວັງເໝັງ ໄດ້ສັ່ງໃຫ້ມີການສ້າງເສີມຂື້ນໄປອີກຈົນສູງເຖິງ 90 ຊັ້ນ ຊຶ່ງມີສາຍໂສ້ໂຍງລົງມາ 8 ເສັ້ນ, ມີກະດິ່ງແຂວນໄວ້ຕາມໂສ້ 72 ອັນ, ເມື່ອເວລາລົມພັດຈະມີສຽງດັງອອນຊອນເພື່ອເປັນອະນຸສອນລະນຶກເຖິງບິດາມານດາ, ຈັກກະພັດຍຸ່ງໂລ້ໄດ້ບັນຈຸເຄື່ອງບູຊາທີ່ເຮັດດ້ວຍຂອງມີຄ່າ ເປັນຕົ້ນແມ່ນ ເງິນ, ທອງຄໍາ ແລະ ອັນຍະມະນີອື່ນໆເປັນຈໍານວນຫຼວງຫຼາຍ ກ່າວກັນວ່າ ຢູ່ເທິງຍອດຂອງເຈດີມີໝາກບານປິດທອງຄໍາ, ມີວົງແຫວນເຫຼັກລ້ອມຮອບໄວ້ເຖິງ 9 ວົງ, ມີໄຂ່ມຸກຂະໜາດໃຫຍ່ 5 ແມັດ ຢູ່ເທິງປາຍຍອດຊຶ່ງເປັນເຄື່ອງຄໍ້າຂອງຄູນບົ່ງບອກເຖິງຄວາມມີໂຊກມີໄຊຂອງນະຄອນນານກິງ.

     ຄັ້ງໜື່ງ ເຈດີນີ້ເຄີຍຖືກຟ້າຜ່າ ແລະ ຖືກພວກກົບໄຕເຜັງ ທໍາລາຍ ເມື່ອ ປີ ຄສ 1853 ຊຶ່ງເຮັດໃຫ້ເຈດີເສຍຫາຍຢ່າງຫຼວງຫຼາຍ ຈຶ່ງຕ້ອງໄດ້ມີການສ້ອມແຊມຂື້ນໃໝ່ ເພື່ອໃຫ້ສ່ວນທີ່ເຫຼືອໄດ້ຄົງຄວາມສວຍງາມຕໍ່ໄປ ສ່ວນຂອງມີຄ່າໄດ້ຖືກປຸ້ນສະດົມ ແລະ ສູນຫາຍໄປໝົດ.

    ແຕ່ເຖິງຢ່າງໃດກໍ່ຕາມ ເຈດີແຫ່ງນີ້ ກໍ່ຍັງຄົງຄວາມມີຄຸນຄ່າ ແລະ ໜ້າພິດສະວົງເປັນຢ່າງຍິ່ງ ຈຶ່ງໄດ້ຖືກຍົກຍ້ອງໃຫ້ເປັນສິ່ງກໍ່ສ້າງທີ່ໜ້າມະຫັດສະຈັນທີ່ສຸດຂອງຊາວໂລກ.