ງານບຸນປີໃໝ່ລາວ ແມ່ນງານປະເພນີ ທີ່ໄດ້ຖືກປົກປັກຮັກສາ ແລະ ສືບທອດກັນມາແຕ່ດົນນານແລ້ວ, ເປັນງານບຸນ ທີ່ຊາວລາວ ທັງຜູ້ທີ່ອາໃສຢູ່ພາຍໃນ ແລະ ຕ່າງປະເທດ ປະຕິບັດກັນມາໃນແຕ່ລະປີ ດ້ວຍບັນຍາກາດຟົດຟື້ນ ແລະ ເບີກບານມ່ວນຊື່ນ.

     ໃນວັນທີ 9 ເມສາ 2019 ຢູ່ທີ່ຫ້ອງການແນວລາວສ້າງຊາດແຂວງ ທ່ານ ບຸນເຫຼື່ອມ  ຈັນທະມາໄລ ຮອງປະທານແນວລາວສ້າງຊາດແຂວງບໍລິຄຳໄຊ ໄດ້ໃຫ້ສຳພາດ ແລະ ເລົ່າປະຫວັດຄວາມເປັນມາຂອງບຸນປີໃໝ່ລາວ ພ.ສ 2562 ປີກຸນ ໃຫ້ສື່ມວນຊົນ ຊາບວ່າ: ເທດສະການກຸດສົງການປີນີ້ເປັນວັນ ແລະ ເດືອນ ທີ່ມີຄວາມຮ້ອນຫຼາຍ ຍ້ອນພະອາທິດຢູ່ໃກ້ກັບໜ່ວຍໂລກ ແລະ ຍ້າຍລາສີອອກຈາກຫຼ່ຽມເຂົາສຸເມັນ ຈາກລາສີມິນເຂົ້າສູ່ລາສີເມກ ການກຳນົດຢ່າງນີ້ເປັນໄປຕາມປະຕິທິນເອເຊຍ ທີ່ມີ 2 ແບບ ຄື: ປະຕິທິນຈຸນລະສັກກະລາດ ຫຼື ຈສ ນີ້ແມ່ນກ່ຽວພັນກັບ ລາວ, ໄທ, ພະມ້າ ແລະ ກຳປູເຈ່ຍ  ແລະ ປະຕິທິນມະຫາສັກກະລາດ. ສຳລັບບຸນກຸດສົງການປີໃໝ່ລາວປີນີ້ ພ.ສ 2562 ວັນສັງຂານລ່ວງ ແມ່ນວັນອາທິດ (ມື້ຮ້ວງໃສ້) ຂຶ້ນ 10 ຄ່ຳ ເດືອນ 5 ພ.ສ 2561 ກົງກັບວັນທີ 14 ເມສາ 2019 ເວລາ 15 ໂມງ 14 ນາທີ 24 ວິນາທີ, ວັນສັງຂານເນົາ  ແມ່ນວັນຈັນ(ມື້ເຕົ່າສະງ້າ) ຂຶ້ນ 11 ຄ່ຳ ເດືອນ 5 ພ.ສ 2561 ກົງກັບວັນທີ 15 ເມສາ 2019 ແລະ ວັນສັງຂານຂຶ້ນ ແມ່ນວັນທິດ(ມື້ກ່າໝົດ) ຂຶ້ນ 12 ຄ່ຳ ເດືອນ 5 ພ.ສ 2561 ກົງກັບວັນທີ 16 ເມສາ 2019, ເວລາ 19 ໂມງ 12 ນາທີ 00 ວິນາທີ ເປັນວັນຖະເຫຼີງປີໃໝ່ລາວ ປ່ຽນເປັນຈຸລະສັກຣາຊ 1381. ນາງສັງຂານ ປີກຸນ-ກັດໃຄ້-ເອກະສົກ, ທາງຈັນທະລະຄະຕິເປັນປົກກະຕິມາດ, ປົກກະຕິວານ, ທາງສຸລິຍະຄະຕິເປັນປົກກະຕິສຸລະທິນ, ນາມມະຫາສົງການ ນາງເທບພະທິດາທີ 1 ຊົງພະນາມວ່າ “ທຸງສະເທວີ” ຊົງພາຫູລັດທັດດອກພິລາ, ອາພອນປະດັບດ້ວຍແກ້ວ ປັດທະມະລາດ (ແກ້ວພິລາ), ສະເຫວີຍອຸທຸມພອນ (ໝາກເດື່ອ) ເປັນພັກສາຫານ, ພະຫັດຂວາຊົງກົງຈັກ, ພະຫັດຊ້າຍຊົງຫອຍສັງ ແລະ ສະເດັດນັ່ງມາເທິງຫຼັງຄຸດ ເປັນພາຫະນະ.

     

     ໃນຕອນທ້າຍການໃຫ້ສຳພາດ ທ່ານ ບຸນເຫຼື່ອມ  ຈັນທະມາໄລ ຍັງໄດ້ຮຽກຮ້ອງໃຫ້ຄົນຮຸ່ນໃໝ່ ແລະ ປະຊາຊົນລາວທຸກຄົນ ຈົ່ງຊ່ວຍກັນປົກປັກຮັກສາຮີດຄອງປະເພນີອັນດີງາມຂອງລາວໄວ້ ໂດຍສະເພາະບຸນກຸດສົງການທີ່ໃກ້ຈະມາຮອດນີ້ ຈົ່ງພ້ອມກັນສືບຕໍ່ປະຕິບັດຕາມຮີດເກົ່າຄອງເດີມ ທີ່ເຄີຍປະຕິບັດກັນມາແຕ່ບູຮານນະການ ເຊັ່ນ: ການຄາລະວະສົມມາ ແລະ ສົງນໍ້າພໍ່-ແມ່ ແລະ ເຖົ້າ-ແກ່ຜູ້ມີພະຄຸນ, ເຂົ້າຮ່ວມພິທີຕັກບາດຖວາຍສັງຄະທານ ແລະ ບາສີພະພຸດທະຮູບ. ໃນເທດສະການກຸດສົງການ ຄວນຫຼີກເວັ້ນການເຊີ້ງກາບກອນ ຖ້ອຍຄຳທີ່ມີລັກສະນະສຽດສີ ແລະ ຫຍາບຊ້າລາມົກອານາຈານ, ຫຼີກເວັ້ນການໃຊ້ນໍ້າສີ ແລະ ນໍ້າທີ່ບໍ່ສະອາດມາຫົດສົງກັນ ແລະ ການຫົດສົງກັນຄວນປະຕິບັດຕາມໂມງເວລາທີ່ໄດ້ກຳນົດໄວ້ ເລີ່ມແຕ່ 09:00 ໂມງເຖິງ 17:00 ໂມງ.