ເພື່ອເປັນການຢັ້ງຢືນເຖິງຜົນສຳເລັດ, ການປົກປັກຮັກສາ ແລະ ສ້າງສາພັດທະນາແຂວງບໍລິຄຳໄຊ ທີ່ອົງຄະນະພັກແຂວງແຕ່ລະສະໄໝ ຍາດມາໄດ້ນັ້ນ ມາໃນວັນທີ 21 ກຸມພາ 2019 ທ່ານ ປອ ກອງແກ້ວ ໄຊສົງຄາມ ກຳມະການສູນກາງພັກ ເລຂາພັກແຂວງ ເຈົ້າແຂວງບໍລິຄຳໄຊ ໄດ້ໃຫ້ສໍາພາດຕໍ່ສື່ມວນຊົນ ເນື່ອງໃນໂອກາດວັນສ້າງຕັ້ງແຂວງ ຄົບຮອບ 35 ປີ ວ່າ: ຄະນະພັກ - ອົງການປົກຄອງແຂວງບໍລິຄຳໄຊ ໃນແຕ່ລະຊຸດ ນັບແຕ່ກອງປະຊຸມໃຫຍ່ ຄັ້ງທີ I ຈົນເຖິງກອງປະຊຸມໃຫຍ່ ຄັ້ງທີ VI ໃນປະຈຸບັນ ກໍໄດ້ຕັ້ງໜ້າຊີ້ນໍາ - ນໍາພາໃນທຸກຂົງເຂດວຽກງານໃນທົ່ວແຂວງ ເຮັດໃຫ້ມີຜົນສໍາເລັດໃນຫຼາຍດ້ານ.

     ທ່ານ ປອ ກອງແກ້ວ ໄຊສົງຄາມ ໄດ້ກ່າວວ່າ: ແຂວງບໍລິ​ຄຳ​ໄຊໄດ້​ສ້າງ​ຕັ້ງ​ຂຶ້​ນ ​ໃນ​ວັນ​ທີ 6 ມີນາ 1984 ມີ​ເນື້ອ​ທີ່​ທັງ​ໝົດ 15.977,7 ກິ​ໂລ​ຕາ​ແມັດ, ​ເປັນ​ບ່ອນ​ກິ່ວ​ສຸດ​ລະຫວ່າງ​ດ້ານ​ຕາ​ເວັນ​ອອກ ​ແລະ ຕາ​ເວັນ​ຕົກ​ ຂອງ​ປະ​ເທດລາວ, ມີ​ເຂດ​ແດນ​ ທິດ​ເໜືອ​ຕິດ​ກັບ 4 ​ແຂວງ​ຂອງ​ລາວ, ທິດ​ໃຕ້​ຕິດ​ກັບ​ໜຶ່ງ​ແຂວງ​ຂອງ​ລາວ, ທິດຕາ​ເວັນ​ອອກ​ຕິດ​ກັບ 2 ​ແຂວງ ຂອງ ສສ.ຫວຽ​ດນາມ ຄື: ​ແຂວງ​ເຫ​ງະ​ອານ ​ແລະ ຮ່າ​ຕິງ ມີ​ຊາຍ​ແດນ​ຮ່ວມ​ກັນ 255 ກິ​ໂລ​ແມັດ, ​ໃນ​ນັ້ນ​ຕິດ​ກັບ​ແຂວງຮ່າ​ຕິງ 97 ກິ​ໂລ​ແມັດ ມີ​ດ່ານ​ສາກົນ 1 ​ແຫ່ງ, ຕິດ​ກັບ​ແຂວງ ​ເຫ​ງະ​ອານ 158 ກິ​ໂລ​ແມັດ ມີ​ດ່ານ​ທ້ອງ​ຖິ່ນ 1 ​ແຫ່ງ ​ແລະ ດ່ານ​ປະ​ເພນີ 2 ​ແຫ່ງ, ທິດຕາ​ເວັນ​ຕົກ​ຕິດ​ກັບ 3 ​ແຂວງ​ຂອງ​ລາຊະ​ອານາຈັກ​ໄທ ມີຄວາມ​ຍາວ 205 ກິ​ໂລ​ແມັດ, ລັກສະນະ​ພູມ​ສັນຖານ​ຂອງ​ແຂວງ​ເປັນ​ທົ່ງພຽງ 36% ​ແລະ ພູດ​ອຍ 64%, ປະກອບ​ມີ 7​ ເມືອງ, ມີ 24 ​ເຜົ່າ, ມີປະຊາກອນ 299.642 ຄົນ, ຍິງ 148.391 ຄົນ. ກອງປະຊຸມໃຫຍ່ຜູ້ແທນອົງຄະນະພັກແຂວງ ຄັ້ງທີ VI ວັນທີ 6 – 8 ພຶດສະພາ 2015 ທີ່ໄດ້ວາງຄໍາຂວັນ​ຂອງ​ວິໄສ​ທັດ​ຮອດ​ປີ 2030 ແລະ ​ຍຸດ​ທະ​ສາດ​ຮອດ​ປີ 2025 ຄື: ສ້າງ​ແຂວງ​ບໍລິ​ຄຳ​ໄຊ ​ເປັນ​ປະຕູ​ເສດຖະກິດ - ​ແຫຼ່ງຜະລິດ​ພະລັງງານ - ສູນ​ກາງ​ບໍລິການ​ທາງ​ຜ່ານ ​ແລະ ຄຸ້ມ​ຄອງ​ສິ່ງ​ແວດ​ລ້ອມ​ແບບ​ຍືນ​ຍົງ  ແລະ ຍຸດທະສາດພັດທະນາເສດຖະກິດ - ສັງຄົມ 6 ຍຸດທະສາດ ຄື: ຍຸດທະສາດວ່າດ້ວຍການເຕີບໂຕທາງເສດຖະກິດທີ່ມີຄຸນນະພາບ, ພັດທະນາຊັບພະຍາກອນມະນຸດ, ບັນລຸເປົ້າໝາຍດ້ານສັງຄົມຂອງແຂວງທີ່ຕິດພັນກັບ MDG ທີ່ຍັງບໍ່ບັນລຸໃນປີ 2015, ປົກປັກຮັກສາ, ຄຸ້ມຄອງ, ນໍາໃຊ້ຊັບພະຍາກອນທຳມະຊາດ ແລະ ສິ່ງແວດລ້ອມແບບຍືນຍົງຕິດພັນກັບການທ່ອງທ່ຽວ, ການເຊື່ອມໂຍງກັບພາກພຶ້ນ ແລະ ສາກົນ ແລະ ຍຸດທະສາດຫັນເປັນອຸດສະຫະກຳ ແລະ ທັນສະໄໝ.           ແຂວງໄດ້​ປັບ​ປຸງ​ໂດຍ​ການ​ເພີ່ມ​ຍຸດ​ທະ​ສາດ​ທີ 5 ຂອງ​ສູນ​ກາງ​ພັກ​ເຂົ້າ​ຕື່ມ​ ຄື: ຍຸດທະສາດວ່າດ້ວຍການເພີ່ມທະວີຄວາມສັກສິດຂອງລະບົບການເມືອງປະຊາທິປະໄຕປະຊາຊົນ ແລະ ເພີ່ມທະວີຄວາມສັກສິດໃນການປົກຄອງແບບກົດໝາຍ ​ລວມເປັນ 7 ຍຸດທະສາດ ແລະ ໄດ້ວາງມະຕິອອກຮອດປີ 2020 ຕ້ອງຮັບປະກັນໃຫ້ທົ່ວແຂວງມີຄວາມສະຫງົບໜັກແໜ້ນ, ເສດຖະກິດ - ສັງຄົມໄດ້ຮັບການພັດທະນາຕໍ່ເນື່ອງ, ສຸມໃສ່ສ້າງບ້ານແລະ ກຸ່ມບ້ານພັດທະນາໃຫ້ມີຄວາມໜັກແໜ້ນ, ປັບປຸງລະບົບການເມືອງປະຊາທິປະໄຕປະຊາຊົນຕາມທິດນຳໃຊ້ກົດໝາຍເພື່ອບໍລິຫານລັດເປັນກ້າວໆ, ໃນ​ນັ້ນ​ ຖື​ເອົາການ​ພັດທະນາ​ເສດຖະກິດ​ ເປັນ​ໃຈກາງ, ຖື​ເອົາ​ດ້ານ​ການ​ພັດທະນາ​ວັດທະນະທຳ - ສັງຄົມ ​ເປັນສຳຄັນ, ຖື​ເອົາ​ການ​ພັດທະນາ​ຊັບພະຍາກອນ​ມະນຸດ ​ເປັນ​ຂອດ​ກຸນ​​ແຈ, ຖື​ເອົາ​ການ​ປົກ​ປັກ​ຮັກສາ​ສິ່ງ​ແວດ​ລ້ອມ​ ເປັນ​ວຽກ​ທີ່ຈຳ​ເປັນ.

        ທ່ານເຈົ້າແຂວງ ຍັງໄດ້ກ່າວຕື່ມອີກວ່າ: ຕໍ່ກັບການຈັດຕັ້ງປະຕິບັດກອງປະຊຸມໃຫຍ່ ຄັ້ງທີ VI ຂອງອົງຄະນະພັກແຂວງ ແມ່ນຢູ່ໃນໄລຍະທີ່ສະພາບການສາກົນ ແລະ ພາກພື້ນມີຫຼາຍເຫດການທີ່ສັບສົນເກີດຂຶ້ນ ເຊິ່ງ​ມີ​ທັງ​ກາລະ​ໂອກາດ​​ເອື້ອ​ອຳນວຍ​ ແລະ ສີ່ງທ້າທາຍທົດ​ສອບນາໆປະການ ສົ່ງຜົນກະທົບຕໍ່ບັນດາປະເທດທີ່ກໍາລັງພັດທະນາ ໂດຍສະເພາະ ແຂວງບໍລິຄຳໄຊຂອງພວກເຮົາໄດ້ພົບກັບໄພທໍາມະຊາດຄຸກຄາມ ອັນສົ່ງຜົນກະທົບຕໍ່ການພັດທະນາ ເສດຖະກິດ - ສັງຄົມ ແລະ ເປັນ​ຊ່ວງ​ເວລາ​ທີ່​ລັດຖະບານ ກໍ່​ຄື​ແຂວງບໍລິ​ຄຳ​ໄຊ ​ສືບ​ຕໍ່ດຳ​ເນີນ​ການ​ປັບ​ໂຄງ​ສ້າງ​ເສດຖະກິດ​ຕາມ​ທິດມະຕິ X ຂອງພັກ ຕະຫຼອດໄລຍະ 10 ປີທີ່ຜ່ານມາ ໄດ້ມີຜົນສຳເລັດໃນຫຼາຍດ້ານ ​ແຕ່ລະ​ຂັ້ນ​ໄດ້​ເອົາ​ໃຈ​ໃສ່​ສຶກສາ​ອົບຮົມ​​ ແລະ ຖືເອົາວຽກງານ ປກຊ - ປກສ ເປັນຂອງ​ປວງ​ຊົນ​, ປັບປຸງ​ກຳລັງ​ໃຫ້​ເຂັ້ມ​ແຂງ​ຮອບດ້ານ ​​ແລະ ຫັນ​ເປັນ​ທັນ​ສະ​ໄໝ​ເທື່ອ​ລະ​ກ້າວ, ສຸມໃສ່ແກ້ໄຂປະກົດການຫຍໍ້ໍທໍ້ໃນສັງຄົມ ໂດຍສະເພາະ ການແກ້ໄຂບັນຫາ 4 ເຖື່ອນ, ການຈັດຕັ້ງຜັນຂະຫຍາຍ ແລະ ແກ້ໄຂບັນຫາ 9 ຫົວຂໍ້ວິທະຍາສາດ ທີ່ເປັນຍຸດທະສາດຂອງແຂວງ ເຮັດໃຫ້ທົ່ວແຂວງມີສະຖຽນລະພາບທາງດ້ານການເມືອງ, ສັງຄົມມີຄວາມເປັນລະບຽບຮຽບຮ້ອຍ, ໄດ້ເອົາໃຈໃສ່ສ້າງສະພາບແວດລ້ອມເອື້ອອໍານວຍ ໃຫ້ແກ່ການເຄື່ອນໄຫວຂອງບັນດາໜ່ວຍວິສາຫະກິດ ເຮັດໃຫ້ການຜະລິດ, ການບໍລິການຂອງບັນດາໜ່ວຍເສດຖະກິດ ໄດ້ຮັບການປັບປຸງໄປຕາມກົນໄກເສດຖະກິດຕະຫຼາດ ທີ່ມີການຄຸ້ມຄອງຂອງລັດ ແລະ ໄປຕາມທິດເປັນອຸດສາຫະກໍາທັນສະໄໝເທື່ອລະກ້າວ, ໃນປີ 2018 ລວມຍອດ​​ມູນຄ່າເພີ່ມຜະລິດ​ຕະພັນ​ພາຍ​ໃນ ບັນລຸ 5.252.29 ຕື້​ກີບ, ລາຍໄດ້ສະເລ່ຍຕໍ່ຫົວຄົນ (GDP/​CAP) ຈະບັນລຸ 18.073.935 ລ້ານກີບ ຫຼື 2.152 ໂດລາ/ຄົນ/ປີ ​(ຄາດໝາຍ 2.730 ໂດລາ ໃນປີ 2020), ​ອັດຕາ​ການ​ຂະຫຍາຍ​ຕົວຂອງ GDP ໂດຍສະເລ່ຍ 6,05%. ສາມາດເກັບລາຍຮັບທັງໝົດ ໄດ້ 910,92 ຕື້ກີບ ລື່ນແຜນປີ 10,48% ໃນນັ້ນ ພູດສູນກາງ ໄດ້ 695,96 ຕື້ກີບ ລື່ນແຜນປີ 10,19%, ພູດຂອງແຂວງ ປະຕິບັດໄດ້ 214,96 ຕື້ກີບ ລື່ນແຜນປີ 11,45%, ພິເສດ ສາມາດປະຕິບັດລາຍຈ່າຍໄດ້ຕາມບູລິມະສິດ, ໂດຍສະເພາະ ແມ່ນເງິນເດືອນ, ເງິນອຸດໜູນ ແມ່ນໄດ້ເບີກຈ່າຍທັນຕາມກໍານົດເວລາໃນແຕ່ລະເດືອນ, ໄດ້ຫັນພະນັກງານລົງກໍ່ສ້າງຮາກຖານການເມືອງທັງໝົດ 195 ສະຫາຍ, ຍິງ 6 ສະຫາຍ, ປັບປຸງອົງການຈັດຕັ້ງບ້ານຈາກ 8 ຕໍາແໜ່ງງານ ມາເປັນ 5 ໜ່ວຍງານ, ທົ່ວແຂວງມີຄອບຄົວພົ້ນທຸກ 51.203 ຄອບຄົວ ກວມ 98,2%, ຄອບຄົວທຸກຍາກຍັງເຫຼືອ 939 ຄອບຄົວ ເທົ່າກັບ 1,8%, ບ້ານພົ້ນທຸກ 259 ບ້ານ ເທົ່າກັບ 89%, ໄດ້​ເອົາ​ໃຈ​ໃສ່​ປັບປຸງ​ຄຸ​ນນະພາ​ບການ​ສຶກສາ​ຢ່າງ​ຕໍ່​ເນື່ອງ, ສໍາເລັດການ​ ປັບປຸງມາດຕະຖານຮັບປະກັນຄຸນນະພາບຈາກ 10 ອົງປະກອບມາເປັນ 12 ມາດຕະຖານ ແລະ 45 ຕົວຊີ້ວັດ, ອັດຕາ​ເຂົ້າ​ຮຽນ​ຂອງ​ເດັກ 3 - 5 ປີ ບັນລຸ 47,9% ​ເພີ່ມ​ຂຶ້ນຈາກ​ສົກ​ປີຜ່ານມາ 3,1%, ​ອັດຕາ​ເຂົ້າ​ຮຽນ​ຂອງ​ເດັກ 6-10 ປີ ບັນລຸ 99,7% ລື່ນ​ແຜນ​ປີ 0,2% ​ແລະ ອັດຕາ​ສຸດທິ​ເຂົ້າ​ຮຽນ​ຊັ້ນ​ປະຖົມ​ໄດ້ 99,7% ລື່ນ​ແຜນປີ​ 2,3%, ອັດຕາ​ປົກ​ຄຸມ​ການ​ປະກັນ​ສຸຂະພາບ​ກວມ 100% ບັນລຸ​ແຜນການ​ປີ​ວາງ​ໄວ້​, ອັດຕາ​ຊົມ​ໃຊ້​ນໍ້າ​ສະອາດ ​ໄດ້ 92,4% ລື່ນ​ແຜນການ 0,4%, ກອງທຶນ 1 ດວງໃຈບໍລິຄໍາໄຊ ຊ່ວຍເຫຼືອສັງຄົມ ໄດ້ພ້ອມໃຈກັນເຄື່ອນໄຫວຢ່າງແຂງແຮງ ສ້າງກິດຈະກໍາຫາລາຍໄດ້ ເພື່ອລະດົມທຶນຊ່ວຍເຫຼືອສັງຄົມ ດ້ວຍຫຼາຍຮູບການ ສາມາດລະດົມທຶນໄດ້ທັງໝົດຈໍານວນ 1,448,537,000 ກີບ, ທຶນຈໍານວນດັ່ງກ່າວໄດ້ນໍາໃຊ້ເຂົ້າໃນການສ້ອມແປງໂຮງຮຽນອະນຸບານ, ປະຖົມ ແລະ ມັດທະຍົມ ຈໍານວນ 11 ຫຼັງ, ປຸກສ້າງໃໝ່ 3 ຫຼັງ, ຊື້ອຸປະກອນທາງການແພດໃຫ້ແກ່ໂຮງໝໍແຂວງ ແລະ ໂຮງໝໍທະຫານແຂວງ, ຊ່ວຍສ້ອມແປງໂຮງໝໍຊຸມຊົນ ເມືອງຄໍາເກີດ ແລະ ຊ່ວຍເຫຼືອແກ່ຄອບຄົວທີ່ປະສົບອຸທົກກະໄພ, ຜູ້ທຸກຍາກ ດ້ອຍໂອກາດ ຢູ່ບັນດາເມືອງພາຍໃນແຂວງ. ພິເສດແມ່ນລົດອໍາໂບລັງ ຈໍານວນ 2 ຄັນ ມອບໃຫ້ໂຮງໝໍແຂວງ ແລະ ໂຮງໝໍເມືອງຄໍາເກີດ, ​ແຂວງ​ໄດ້​ສືບ​ຕໍ່​ພົວພັນ ຮ່ວມ​ມື​ກັບ​ບັນດາ​ປະ​ເທດ​ໃກ້​ຄຽງ, ຮ່ວມ​ມື​ຮອບດ້ານ​ກັບ​ບັນດາ​ແຂວງ​ຂອງ ​ສສ ຫວຽ​ດນາມ, ຈັດ​ສົ່ງ​ອັດຖິ​ທະຫານ​ອາສາ​ສະໝັກ ​ແລະ ຊ່ຽວຊານ​ທີ່​ເສຍສະຫຼະຊີວິດ​ໃນ​ປາງ​ສົງຄາມເປັນປົກກະຕິ​ ໂດຍຈັດພິທີມອບ - ຮັບຢ່າງສົມກຽດ, ​ ​ແກ້​ໄຂ​ຜູ້​ຍົກຍ້າຍ​ຕັ້ງພູມລຳ​ເນົາ​ຕາມ​ລຳພັງ​ໃຈ ​ແລະ ສ້າງ​ຄອບຄົວ​ບໍ່​ຖືກ​ລະບຽບ​ຕາມ​ບໍລິ​ເວນ​ຊາຍ​ແດນ​ລາວ - ຫວຽດນາມ ຢູ່​ແຂວງ ບໍລິ​ຄຳ​ໄຊ, ​ໄດ້​ຮັບຮອງປະຊາຊົນເຊື້ອຊາດ​ຫວຽດນາມ ​ເຂົ້າ​ເປັນ​ພົນລະ​ເມືອງ​ລາວ 7 ບ້ານ ມີ 149 ຄອບຄົວ ຈໍານວນ​ພົນ 894 ຄົນ, ຈັດ​ສົ່ງ​ກັບ​ຄືນ​ປະ​ເທດ 1 ຄົນ, ປະຈຸບັນ ກຳລັງສະເໜີລັດຖະບານ​ພິຈາລະນາ​ຮັບຮອງ​ເອົາ​ປະຊາຊົນຫວຽດນາມ ​ເຂົ້າ​ເປັນ​ສັນຊາດ​ລາວ​ເພີ່ມ​ຕື່ມອີກ ຈຳນວນ 408 ຄອບຄົວ, ຢູ່​ເມືອງ ຄຳ​ເກີດ ​ແລະ ວຽງ​ທອງ, ພິເສດສະເພາະປີ 2018 ການຈັດເກັບລາຍຮັບເຂົ້າງົບປະມານຂອງເມືອງ ແມ່ນບັນລຸຕາມແຜນການ ແລະ ລື່ນຄາດໝາຍທຸກເມືອງ, ການຜະລິດເຂົ້າ ແລະ ພືດສະບຽງອາຫານໄດ້ເພີ່ມຂຶ້ນຢ່າງຕໍ່ເນື່ອງ ສາມາດກຸ້ມຕົນເອງໂດຍພື້ນຖານ, ຮັບປະກັນໃຫ້ແກ່ການບໍລິໂພກພາຍໃນ ແລະ ມີສ່ວນແຮໄວ້ຂາຍເປັນສິນຄ້າສົ່ງອອກຈຳນວນໜຶ່ງ, ເສັ້ນທາງ ຄົມມະນາຄົມ ໄດ້ຮັບການປັບປຸງນັບມື້ດີຂຶ້ນ, ມາຮອດປະຈຸບັນ ມີ​ເສັ້ນທາງ​ເຂົ້າ​ເຖິງບ້ານກວມ 100%, ​ເອົາ​ໃຈ​ໃສ່​ຊຸກຍູ້, ສົ່ງ​ເສີມ​ການ​ສົ່ງ​ອອກ​ທີ່​ເປັນ​ທ່າ​ແຮງ​ຂອງ​ແຂວງ, ​​​ມູນຄ່າ​ການ​ສົ່ງອອກ ເພີ່ມຂຶ້ນຕາມລຳດັບ ພົ້ນ​ເດັ່ນ ​ແມ່ນ​ຢາງພາລາ ​ແລະ ມັນ​ຕົ້ນ, ສົ່ງ​ເສີມ​ວິ​ສາ​ຫະກິດ​ຂະໜາ​ດນ້ອຍ, ຂະໜາດ​ກາງ (SMEs) ​ໂດຍ​ຊຸກຍູ້, ສົ່ງ​ເສີມ ບັນດາ​ວິ​ສາ​ຫະກິດ​ເຮັດ​ການ​ຜະລິດ​ຕາມ​ເງື່ອນ​ໄຂ ​ແລະ ທ່າ​ແຮງ​ຂອງ​ແຂວງ​ ສາມາດ​ຢັ້ງຢືນ ​ແລະ ຮັບຮອງ​ເປັນ​ສິນຄ້າ ໜຶ່ງ​ເມືອງ​ໜຶ່ງ​ຜະລິດ​ຕະພັນ (ODOP) ​​ໄດ້ຫຼາຍ, ​ເອົາ​ໃຈ​ໃສ່​ຈັດ​ຕັ້ງ​ປະຕິບັດ​ບັນດາ​ຄາດໝາຍ SDGs ຂອງ​ແຕ່ລະ​ຂະ​ແໜງ​ການ ມີຫຼາຍດ້ານ​ສາມາດ​ປະຕິບັດ​ໄດ້​ບັນລຸ​ຄາດໝາຍ ແລະ ລື່່ນຄາດໝາຍ.