ເມືອງປາກຊັນ  ເປັນເມືອງໜຶ່ງໃນ 6 ເມືອງ ຂອງແຂວງ ກ່ອນປີ 2009 ແລະ ໜຶ່ງໃນ 7 ເມືອງ ຂອງແຂວງ ໃນປະຈຸບັນ ເປັນເມືອງຕັ້ງຢູ່ເທດສະບານແຂວງ ປະກອບດ້ວຍ ຫຼາຍຊົນເຜົ່າ ທີ່ດໍາລົງຊີວິດຢູ່ຮ່ວມກັນ ອາຊີບ ການດໍາລົງຊີວິດ ແລະ ລະດັບການພັດທະນາ ບໍ່ແຕກໂຕນກັນຫຼາຍ  ສ່ວນຫຼາຍ ຖືເອົາວຽກງານດ້ານການປູກຝັງ-ລ້ຽງສັດ ເປັນອາຊີບຕົ້ນຕໍ, ຕໍ່ໜ້າສະພາບການເມືອງສາກົນ ແລະ ພາກພື້ນ ມີການຜັນແປໄປຢ່າງສັບສົນ ແຕ່ເຖີງຢ່າງໃດກໍ່ຕາມ ຢູ່ເມືອງປາກຊັນ ໂດຍພື້ນຖານແລ້ວແມ່ນມີສະຖຽນລະພາບທາງດ້ານການເມືອງ-ສັງຄົມ ມີຄວາມສະຫງົບ ແລະ ເປັນລະບຽບຮຽບຮ້ອຍ.

 

      ວັນທີ 26 ພະຈິກ 2018 ທ່ານ ໄມຈອມ ວັນນະສານຄຳ ເຈົ້າເມືອງປາກຊັນ ໄດ້ໃຫ້ສຳພາດຕໍ່ສື່ມວນຊົນ ວ່າ: 43 ປີ ວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ, 35 ປີ ການຈັດຕັ້ງປະຕິບັດ 2 ໜ້າທີ່ຍຸດທະສາຂອງອົງຄະນະພັກ ເມືອງປາກຊັນ ແຂວງບໍລິຄຳໄຊ. ເມືອງປາກຊັນໄດ້ມີທ່າແຮງ ທາງດ້ານການພັດທະນາເສດຖະກິດ - ສັງຄົມຫຼາຍດ້ານ ໂດຍສະເພາະແມ່ນການປູກຝັງ, ລ້ຽງສັດ ແລະ ເຮັດການບໍລິການທາງຜ່ານ, ໄລຍະໜື່ງປີຜ່ານມາ ເມືອງປາກຊັນພວກເຮົາ ໄດ້ມີຄວາມພະຍາຍາມລົງກະຕຸ້ນແນວຄວາມຄິດໃຫ້ແກ່ນັກທຸລະກິດ ຜູ້ປະກອບການ, ຊາວຄ້າຂາຍ ແລະ ພໍ່ແມ່ປະຊາຊົນ ຢູ່ຕາມກຸ່ມບ້ານຕ່າງໆ ໃນທົ່ວເມືອງໃຫ້ມີຄວາມມຸ່ງໝັ້ນ ສ້າງເຖດຖະກິດ ຄອບຄົວຕົນເອງ ເປັນຕົ້ນແມ່ນການດໍາເນີນທຸລະກິດ, ລ້ຽງສັດ, ປູກຝັງ ຢ່າງຕັ້ງໜ້າ ຄຽງຄູ່ກັບການສຶກສາອົບຮົມການເມືອງແນວຄິດ, ສ້າງຄວາມສາມັກຄີເປັນປຶກແຜ່ນ, ເຮັດໜ້າທີ່ປ້ອງກັນຊາດ ປ້ອງກັນຄວາມສະຫງົບໄດ້ ໂດຍພື້ນຖານ ແລະ ເສີມຂະຫຍາຍຮີດຄອງປະເພນີອັນດີງາມໄວ້ໃຫ້ໝັ້ນຄົງ.

  ທ່ານເຈົ້າເມືອງປາກຊັນ ຍັງໄດ້ກ່າວອີກວ່າ: ພວກເຮົາໄດ້ເອົາໃຈໃສ່ ສຶກສາອົບຮົມແນວທາງປ້ອງກັນຊາດ - ປ້ອງກັນຄວາມສະຫງົບ ທົ່ວປວງຊົນຮອບດ້ານຂອງພັກ  ໃຫ້ແກ່ປະຊາຊົນບັນດາເຜົ່າຮັບຮູ້  ເຊື່ອມຊຶມ  ເພື່ອເຊີດຊູສະຕິລະວັງຕົວ  ຕໍ່ກົນອຸບາຍຫັນປ່ຽນໂດຍສັນຕິ ຂອງກໍາລັງປໍລະປັກ  ແລະ  ພວກຄົນບໍ່ດີ,  ສາມາດສ້າງບ້ານປ້ອມໝັ້ນສູ້ຮົບໄດ້ 3 ບ້ານ, ສ້າງບ້ານປ້ອງກັນຊາດເຂັ້ມແຂງໄດ້ 1 ບ້ານ, ເສີມຂະຫຍາຍກໍາລັງແຮງສັງລວມ ພາຍໃນເມືອງ ເຂົ້າໃນໂຄງປະກອບເສດຖະກິດ ໄປຕາມທິດທີ່ໄດ້ກໍານົດໄວ້ນໍາໃຊ້ທຸກພາກສ່ວນເສດຖະກິດ ສຸມທືນຮອນເຂົ້າໃສ່ການພັດທະນາ  ພື້ນຖານໂຄງລ່າງທີ່ຈໍາເປັນ ເພື່ອຮັບໃຊ້ໃຫ້ແກ່ການຜະລິດ ແລະ  ແກ້ໄຂຄວາມທຸກຍາກ  ອັນໄດ້ເຮັດໃຫ້ເສດຖະກິດຂະຫຍາຍຕົວຢ່າງຕໍ່ເນື່ອງໃນລະດັບສະເລ່ຍ 8,7% ຕໍ່ປີ, ສົກປີ 2017-2018 ນີ້ ລວມຍອດຜະລິດຕະພັນບັນລຸໄດ້ 830,46 ຕື້ກີບ, ໃນນີ້  ກະສິກໍາກວມ 33,11%,​ ອຸດສາຫະກໍາກວມ 36,09%, ການບໍລິການກວມ 30,78%, ສະເລ່ຍໃສ່ຫົວຄົນໜຶ່ງໄດ້ 2.107,24 ໂດລາ,  ຜະລິດເຂົ້າໄດ້ 45.065 ໂຕນ,  ສະເລ່ຍເຂົ້າກິນໄດ້ 952 ກິໂລ/ຄົນ/ປີ, ທາງດ້ານລາຍຮັບສາມາດບັນລຸໄດ້ໃນແຕ່ລະປີບໍ່ຫຼຸດ 28 ຕື້ກີບ, ຄຸ້ມຄອງລາຍຈ່າຍໃນລະດັບ 27 ຕື້ກີບ, ສາມາດປະກາດເມືອງປາກຊັນອອກຈາກເມືອງທຸກຍາກ  ປີ 2001.   ທົ່ວເມືອງມີຄອບຄົວພົ້ນທຸກແລ້ວ ຈໍານວນ  9.919 ຄອບຄົວ  ຫຼື  ເທົ່າກັບ 99,68%,  ຍັງມີຄອບຄົວທຸກຍາກ  31 ຄອບຄົວ  ຫຼື 0,32%. ທົ່ວເມືອງສາມາດ ຊົມໃຊ້ເຄືອຄ່າຍ ໂທລະສັບມືຖື, ໂທລະພາບ, ວິທະຍຸ 100%, ມີເສັ້ນທາງເຂົ້າເຖິງທຸກໆບ້ານ  ເຖິງວ່າບໍ່ສະດວກ ແຕ່ກໍ່ທຽວໄດ້ທຸກລະດູການ, ທົ່ວເມືອງ ມີຕະຫຼາດ 7 ແຫ່ງ,  ມີຫົວໜ່ວຍທຸລະກິດ 1.560 ຫົວໜ່ວຍ,  ປະກາດຮັບຮອງເປັນບ້ານແບບຢ່າງສາທາລະນະສຸກແລ້ວ 54 ບ້ານ ຫຼືເທົ່າກັບ 100%, ປະກາດເປັນເມືອງສາທາລະນະສຸກແບບຢ່າງ ປີ 2014, ໄດ້ຂະຫຍາຍຕາໜ່າງສື່ມວນຊົນ  ລົງສູ່ທຸກໆບ້ານ, ແຕ່ລະບ້ານໄດ້ນໍາໃຊ້ລະບົບໂທລະໂຄ່ງ,  ວິທະຍຸ - ໂທລະພາບ ແລະ ໜັງສືພີມ, ສ້າງຄອບຄົວວັດທະນະທໍາໄດ້ 8.689 ຄຄ ເທົ່າກັບ 87,32 %,  ສ້າງບ້ານວັດທະນະທໍາໄດ້  54 ບ້ານ ກວມ 100%,  ໄດ້ຮັບຮອງເມືອງປາກຊັນ ເປັນເມືອງ ແມ່ຍິງ 3 ດີ ປີ 2010, ເປັນເມືອງ ຊາວໜຸ່ມ 4 ບຸກ ປີ 2017,  ເປັນເມືອງ ສະຫະພັນກໍາມະບານ 5 ເປັນເຈົ້າ ປີ 2018, ໄດ້ມີຕາໜ່າງສະຫະພັນນັກຮົບເກົ່າ ເພື່ອເຕົ້າໂຮມຄວາມສາມັກຄີ ການຈັດຕັ້ງປະຕິບັດຄາດໝາຍດ້ານການພັດທະນາສໍາເລັດ ຕາມຄາດໝາຍກໍານົດໄວ້.