ພິທີປະກາດຈົບຊັ້ນມັດທະຍົມສຶກສາຕອນຕົ້ນບຳລຸງ ຂອງແຂວງບໍລິຄຳໄຊ ໄດ້ຈັດຂື້ນໃນຕອນເຊົ້າຂອງວັນທີ 17 ຕຸລາ 2018 ຢູ່ທີ່ສະໂມສອນແຂວງບໍລິຄຳໄຊ ໂດຍການເປັນປະທານຂອງ ທ່ານ ນາງ ແສງເດືອນ ຫຼ້າຈັນທະບູນ ກຳມະການສູນກາງພັກ ລັດຖະມົນຕີກະຊວງສຶກສາທິການ ແລະ ກິລາ, ທ່ານ ກອງແກ້ວ ໄຊສົງຄາມ ກຳມະການສູນກາງພັກ ເລຂາພັກແຂວງ ເຈົ້າແຂວງບໍລິຄຳໄຊ, ມີຄະນະນຳຂອງແຂວງບໍລິຄຳໄຊ, ຄຳມ່ວນ, ໄຊສົມບູນ, ຊຽງຂວາງ, ຜູ້ບໍລິຫານການສຶກສາ, ແຂກຖືກເຊີນ ແລະ ນ້ອງນັກຮຽນ ເຂົ້າຮ່ວມ.

       ທ່ານ ຄຳສີ ຍົມມະລາດ ຫົວໜ້າພະແນກສຶກສາທິການ ແລະ ກິລາ ແຂວງ ໄດ້ລາຍງານວ່າ: ວຽກງານການຮຽນ-ການສອນ ຊັ້ນມັດທະຍົມສຶກສາຕອນຕົ້ນບຳລຸງ ໃນທົ່ວແຂວງ ແມ່ນຜົນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມຂອງແຂວງ ໃນໄລຍະ 5 ປີ 2016-2020 ໂດຍສະເພາະວຽກງານການສຶກສານອກລະບົບໂຮງຮຽນ ປະຊາຊົນໃນເກນອາຍຸລະຫວ່າງ 15-35 ປີ ໃນທົ່ວແຂວງບໍລິຄຳໄຊ ໃຫ້ຈົບຊັ້ນມັດທະຍົມຕອນຕົ້ນບໍາລຸງ ຢ່າງໜ້ອຍໃຫ້ບັນລຸ 85%ຂື້ນໄປ, ໃນນັ້ນທົ່ວແຂວງມີເປົ້າໝາຍຮຽນບຳລຸງຍົກລະດັບມີ 10.365 ຄົນ, ຍິງ 5.241 ຄົນ ແລະ ມີນັກຮຽນເຂົ້າຮຽນ ແລະ ສອບເສັງຈົບຕົວຈິງ 10.142 ຄົນ, ຍິງ 5.241 ຄົນ ເທົ່າກັບ 97,84% ສາມາດບັນລຸໄດ້ຕາມຄາດໝາຍ ເຊິ່ງຖືເອົາ  5 ຂັ້ນຕອນການຈັດຕັ້ງປະຕິບັດ ເປັນຕົ້ນແມ່ນ: ບາດກ້າວທີ 1 ສຳຫຼວດເກັບກຳສະຖິຕິ ຂື້ນບັນຊີລາຍຊື່ກູ່ມເປົ້າໝາຍໃນແກນອາຍຸ 15-35 ປີ ທີ່ຍັງຮຽນບໍ່ຈົບຊັ້ນມັດທະຍົມສຶກສາຕອນຕົ້ນໃນແຕ່ລະບ້ານ, ບາດກ້າວທີ 2 ຂັ້ນເມືອງອອກຂໍ້ຕົກລົງແຕ່ງຕັ້ງ ຄະນະຮັບຜິດຊອບການຮຽນ-ການສອນບໍາລຸງຍົກລະດັບ, ບາດກ້າວທີ 3 ເຕົ້າໂຮມຄະນະກຳມະການທີ່ຮັບຜິດຊອບ ເພື່ອຄົ້ນຄວ້າວາງແຜນຈັດຕັ້ງການຮຽນ-ການສອນ ແຕ່ລະບ້ານຢ່າງເປັນຈຸດສູມ,ບາດກ້າວທີ 4 ເຕົ້າໂຮມຄູອາຈານ ແລະ ກຸ່ມເປົ້າໝາຍ ເພື່ອຈັດຕັ້ງຫ້ອງຮຽນພ້ອມປະຕິບັດແຜນງານ, ລົງຕິດຕາມ-ຊຸກຍູ້, ບາດກ້າວທີ 5 ປະເມີນຜົນການຮຽນ-ການສອນ.

             ຜ່ານການຈັດຕັ້ງປະຕິບັດ ຈຶ່ງເຮັດໃຫ້ບັນດາເມືອງໄດ້ຮັບຜົນສໍາເລັດ ແລະ ບັນລຸຄາດໝາຍ ໃນນັ້ນເມືອງປາກຊັນ ໄດ້ຈັດພິທີປະກາດ ໃນວັນທີ 2 ຕຸລາ 2014,ເມືອງທ່າພະບາດ ວັນທີ 3 ກຸມພາ 2015, ເມືອງບໍລິຄັນ ວັນທີ 26 ກຸມພາ 2016, ເມືອງປາກກະດິງ 24 ມີນາ 2016,ເມືອງໄຊຈໍາພອນ ວັນທີ 24 ມິຖຸນາ 2016, ເມືອງຄຳເກີດ ວັນທີ 20 ຕຸລາ 2017 ແລະ ເມືອງ ວຽງທອງ ປະກາດໃນວັນທີ 13 ກູມພາ 2018 ໂດຍໃຊ້ງົບປະມານທັງໝົດ 2.093.600.2000 ກີບ. ເພື່ອຢັ້ງຢືນເຖິງຜົນງານກໍ່ຄືຜົນສຳເລັດ ທີ່ຄະນະນຳ ແລະ ຄະນະຮັບຜິດຊອບ ຈັດຕັ້ງການຮຽນ-ການສອນຍົກລະດັບການສຶກສາມັດທະຍົມຕອນຕົ້ນບຳລຸງ ຍາດມາໄດ້ກະຊວງສຶກສາທິການ ແລະ ກິລາ ໄດ້ຕົກລົງມອບໃບຢັ້ງຢືນປະກາດແຂວງບໍລິຄຳໄຊ ເປັນແຂວງຈົບຊັ້ນມັດທະຍົມຕອນຕົ້ນບໍາລຸງຢ່າງສົມກຽດ, ພ້ອມທັງປະດັບຫຼຽນໄຊແຮງງານຊັ້ນ I ໃຫ້ 61 ທ່ານ, 5 ກົມກອງ, ຫຼຽນໄຊແຮງງານຊັ້ນ II ຈຳນວນ 123 ທ່ານ, 11 ກົມກອງ, ຫຼຽນໄຊແຮງງານຊັ້ນ III 198 ທ່ານ, 16 ກົມກອງ, ຫຼຽນກາແຮງງານ 260 ທ່ານ, 53 ກົມກອງ, ໃບຍ້ອງຍໍລັດຖະບານ 202 ທ່ານ, 37 ກົມກອງ, ໃບຍ້ອງຍໍກະຊວງສຶກສາທິການ ແລະ ກິລາ 214 ທ່ານ, 47 ກົມກອງ, ໃບກຽດຕິຄຸນຂອງທ່ານເຈົ້າແຂວງບໍລິຄໍາໄຊ 45 ທ່ານ,12 ກົມກອງ ແລະ ໃບຍ້ອງຍໍ 260 ທ່ານ.