ກໍາແພງເມືອງຈີນ ຫຼື ເອີ້ນວ່າ ກໍາແພງ ໝື່ນລີ້ ຢູ່ໃນນະຄອນປັກກິ່ງ ປະເທດຈີນ ເປັນກໍາແພງທີ່ມີຄວາມຍາວທີ່ສຸດໃນໂລກ, ເປັນສິ່ງກໍ່ສ້າງທີ່ຢູ່ສູງຈາກລະດັບນໍ້າທະເລເຖິງ 1.000 ແມັດ ແລະ ຖືກຈັດໃຫ້ເປັນໜື່ງໃນເຈັດສິ່ງມະຫັດສະຈັນຂອງໂລກໃນຍຸກກາງ (ຍຸກກ່ອນຍຸກປະຈຸບັນ) ກໍາແພງເມືອງຈີນເລີ່ມສ້າງຂື້ນໃນສະໄໝຂອງຈັກກະພັດ ຈິ໋ນຊີຮອງເຕ້ ຫຼື ຊິນສືຫວງເຕ້ ແຫ່ງລາດຊະວົງ ຈິ໋ນ ຫຼື ສິນ ( 221-206 ກ່ອນ ຄສ) ເພື່ອປ້ອງກັນການຮຸກຮານຂອງຂ້າເສິກສັດຕູ, ເປັນກໍາແພງທີ່ກັ້ນເຂດແດນລະຫວ່າງປະເທດຈີນກັບທິເບດ.

   ການກໍ່ສ້າງກໍາແພງເມືອງຈີນໄດ້ເລີ່ມຂື້ນແຕ່ຕອນເໜືອຂອງແຕ່ລະເມືອງແລ້ວຕໍ່ເນື່ອງກັນມາຈົນມີຄວາມຍາວກວ່າ 10.000 ລີ້ ຫຼື ປະມານ 5.000 ກິໂລແມັດ, ກໍາແພງເມືອງຈີນມີຄວາມສູງປະມານ 6-9 ແມັດ ຈາກພື້ນດິນ, ກວ້າງປະມານ 4,5-6 ແມັດ, ຢູ່ເທີງຂອງກໍາແພງທຸກໆໄລຍະ 200 ແມັດຈະມີປ້ອມຍາມ ຫຼື ຫໍສັງເກດການ ສູງຂື້ນໄປຈາກກໍາແພງປະມານ 3-6 ແມັດ, ລວມທັງໝົດຈະມີປະມານ 15.000 ປ້ອມ ຊຶ່ງຢູ່ໃນທຸກໆປ້ອມຈະມີລະຄັງແຂນໄວ້ ເພື່ອສົງສັນຍານເມື່ອມີເຫດຮ້າຍເກີດຂື້ນ ການກໍ່ສ້າງປ້ອມຍາມ ຫຼື ຫໍສັງເກດການຢູ່ເທິງກໍາແພງນີ້ໃຊ້ເວລາປະມານ 10 ປີ ແລະ ມີການສືບຕໍ່ກໍ່ສ້າງຫຼາຍຄັ້ງຊຶ່ງເກນຄົນມາສ້າງຈາກທົ່ວປະເທດນັບເປັນລ້ານໆຄົນ ແລະ ມີຜູ້ເສຍຊີວິດຫຼາຍກວ່າສິບພັນຄົນ, ກໍາແພງເມືອງຈີນໄດ້ກໍ່ສ້າງຍາວຢຽດ ຄົດໂຄ້ງໄປຕາມພູຜາ, ປ່າໄມ້, ຫ້ວຍຮ່ອງ ແລະ ແມ່ນໍ້າລໍາເຊ ຄ້າຍຄືກັບພະຍາມັງກອນຍັກ ຕໍ່ຈາກນນັ້ນມາລາດຊະວົງອື່ນໆກໍ່ໄດ້ສືບຕໍ່ກໍ່ສ້າງ ແລະ ຕໍ່ເຕີມເລື້ອຍໆມາ ແຕ່ສ່ວນຫຼາຍແລ້ວ ການສ້າງກໍາແພງເມືອງຈີນ ແມ່ນຈະສ້າງຫຼາຍທີ່ສຸດໃນສະໄໝຂອງລາດຊະວົງໝິງ ຄສ 1368-1644 ຊຶ່ງໃຊ້ເວລານານເຖິງ 200 ປີ ໃນການກໍ່ສ້າງຕໍ່ເຕີມ ແລະ ສ້ອມແຊມຈຶ່ງສໍາເລັດ.

   ໃນປີ ຄສ 1987 ກໍາແພງເມືອງຈີນໄດ້ຖືກຄັດເລືອກໃຫ້ເປັນມໍລະດົກໂລກ ໃນສັນຍາລັກທີມີຄວາມໝາຍ ແລະ ມີຄຸນຄ່າທາງດ້ານປະຫັວດສາດຂອງປະຊາຊົນຈີນ, ກໍາແພງເມືອງຈີນ ເປັນສະຖາປັດຕິຍະກໍາ ທີ່ສະຫງ່າງາມ ເປັນສິ່ງກໍ່ສ້າງມະຫັດສະຈັນຂອງໂລກ ແລະ ມີຄວາມຍາວທີ່ສຸດໃນໂລກ.

    ປະຈຸບັນກໍາແພງເມືອງຈີນ ໄດ້ກາຍເປັນສະຖານທີ່ທ່ອງທ່ຽວທີ່ສໍາຄັນຂອງໂລກ ມີນັກທ່ອງທ່ຽວມາຈາກທົ່ວທຸກມູມຂອງໂລກໄປທ່ຽວຊົມ ແລະ ສຶກສາດ້ານປະຫວັດສາດຂອງກໍາແພງເມືອງຈີນຢ່າງຫຼວງຫຼາຍ.