ການຈັດຕັ້ງສະເຫຼີມສະຫຼອງປີໃໝ່ລາວປີນີ້ ກໍຄືກັນກັບປີຜ່ານໆມາ ແຕ່ພິເສດກວ່າໝູ່ແມ່ນ ການສະເຫຼີມສະຫຼອງປີໃໝ່ ພ້ອມໆກັບງານສະເຫຼີມສະຫຼອງສຽງແຄນລາວເຊື້ອຊາດລາວ ໄດ້ເຂົ້າເປັນມໍລະດົກນາມມະທໍາຂອງມວນມະນຸດ (ຫຼື ມໍລະດົກໂລກນັ້ນເອງ) ແລະ ເຫດການສຳຄັນໜຶ່ງອີກ ລາວເຮົາໄດ້ຈັດປີທ່ອງທ່ຽວລາວ 2018. ຊຶ່ງແຂວງບໍລິຄໍາໄຊ ກໍໄດ້ຈັດພິທີເປີດປີທ່ອງທ່ຽວລາວ-ທ່ອງທ່ຽວແຂວງບໍລິຄໍາໄຊ ຕິດພັນກັບງານນະມັດສະການພະທາດພະບາດໂພນສັນ ຢ່າງເປັນທ່າງການໃນທ້າຍປີ 2017 ທີ່ຜ່ານມາ. ກອງປະຊຸມສະພາປະຊາຊົນແຂວງບໍລິຄໍຳໄຊ ໄດ້ມີມະຕິຮັບຮອງເອົາບົດລາຍງານກ່ຽວກັບການຈັດຕັ້ງປະຕິບັດວຽກງານທ່ອງທ່ຽວໃນຊຸມປີຜ່ານມາ, ແຜນການສົ່ງເສີມການທ່ອງທ່ຽວປີ 2018 ແລະ ແຜນພັດທະນາການທ່ອງທ່ຽວຂອງແຂວງຮອດປີ 2020. ສໍາລັບປີ 2018 ແຂວງບໍລິຄຳໄຊໄດ້ກໍານົດ 20 ກິດຈະກໍາ ເພື່ອສົ່ງເສີມການທ່ອງທ່ຽວ ໃນປີທ່ອງທ່ຽວລາວ-ທ່ອງທ່ຽວບໍລິຄໍາໄຊ ຊຶ່ງມາເຖິງປະຈຸບັນປະຕິບັດສໍາເລັດແລ້ວ 10 ກິດຈະກໍາ ສາມາດໂຄສະນາດຶງດູດໄດ້ນັກທ່ອງທ່ຽວພາຍໃນ ແລະ ຕ່າງປະເທດ ເຂົ້າມາທ່ອງທ່ຽວເພີ່ມຂຶ້ນ; ບັນດາຫົວໜ່ວຍກິດຈະການ ການທ່ອງທ່ຽວ ແລະ ກິດຈະການຕິດພັນອື່ນໆ ກໍ່ໄດ້ມີການເໜັງຕີງ ເຄື່ອນໄຫວຄຶກຄັກເພີ່ມຂຶ້ນ; ເປັນຕົ້ນແມ່ນ ຄວາມສົນໃຈໃນການລົງທຶນ ບໍລິການ, ພັດທະນາການທ່ອງທ່ຽວ ຕາມແຫຼ່ງທ່ອງທ່ຽວທໍາມະຊາດແຫ່ງຕ່າງໆ ໂດຍມີການສະເໜີ ສຳຫຼວດຄວາມເປັນໄປໄດ້ ໃນຫຼາຍແຫ່ງທົ່ວແຂວງບໍລິຄໍຳໄຊ. ແຫຼ່ງທ່ອງທ່ຽວທໍາມະຊາດຕາມລະດູການ ກໍໍ່ໄດ້ມີການເປີດບໍລິການຫຼາຍແຫ່ງເພີ່ມຂຶ້ນຄື: ຫາດຊາຍຂາວ ບ້ານໂດນ ເມືອງປາກຊັນ, ຫາດຄູນບ້ານຫາດດອນຄູນ ເມືອງບໍລິຄັນ ແລະ ໃນໂອກາດປີໃໝ່ນີ້ ໄດ້ເປີດບໍລິການ ລົງຫຼີ້ນນໍ້າ ຕາມຫາດຊາຍຕ່າງໆ: ແຄມແມ່ນໍ້າຂອງ, ນໍ້າກະດິງ, ນໍ້າຍ້ວງ, ນໍ້າມ່ວນ, ນໍ້າພາວ ແລະ ບ່ອນອື່ນໆ.

          ແນ່ນອນວ່າ ໃນໄລຍະປີໃໝ່ລາວ ພາຍຫຼັງທີ່ໄດ້ດໍາເນີນພິທີກຳຕາມຮີດຄອງປະເພນີ ບາສີສູ່ຂວັນ, ຫົດສົງພະສົງ, ພະພຸດທະຮູບ, ວັດວາອາຮາມ, ສະຖານທີ່ສັກສິດ, ສິ່ງສັກກະລະບູຊາ, ຜູ້ຫຼັກຜູ້ໃຫຍ່, ພໍ່ແມ່ເຖົ້າແກ່, ຕົບພະທາດຊາຍ, ຫົດສົງນໍ້າເຊິ່ງກັນ, ເປັນການຂໍພອນ ແລະ ສົ່ງພອນໄຊທີ່ປະເສີດເລີດງາມຕໍ່ກັນແລ້ວ...ຫຼາຍຄົນ, ຫຼາຍຄອບຄົວ, ໝູ່ຄະນະເພື່ອນສະຫາຍ ກໍ່ຈະໄປທ່ອງທ່ຽວສະຖານທີ່ຕ່າງໆ. ສະຖານທີ່ຄົນເຮົາມັກໄປທີ່ສຸດໃນໄລຍະນີ້ ແມ່ນສະຖານທີ່ທີ່ມີຫາດຊາຍ ມີນໍ້າໄຫຼໃສເຢັນ ອ້ອມລ້ອມດ້ວຍທຳມະຊາດທີ່ສວຍງາມ ອາກາດປອດໂປ່ງສົດຊື່ນ... ເຖິງຢ່າງໃດກໍ່ດີການໄປຫຼີ້ນໄປທ່ຽວແຫ່ງຫົນໃດ ໃກ້ຫຼືໄກ ຄວາມສະຫງົບປອດໄພຕ້ອງມາກ່ອນ ຢາກມີຄວາມສະຫງົບປອດໄພ ພວກເຮົາໝົດທຸຄົນຕ້ອງເຄົາລົບ ແລະ ປະຕິບັດກົດໝາຍ, ລະບຽບການຕ່າງໆຢ່າງເຂັ້ມງວດ, ມີສິນລະທໍາ ແລະ ມີວັດທະນະທໍາທີ່ດີງາມ ດັ່ງຄໍາຂວັນທີ່ວ່າ “ ທ່ອງທ່ຽວເມືອງລາວ-ທ່ອງທ່ຽວບໍລິຄໍາໄຊ ມ່ວນຊື່ນສຸກໃຈ, ສະດວກປອດໄພ, ໃສ່ໃຈສິ່ງແວດລ້ອມ ”. ການຈັດຕັ້ງພັກ-ລັດ ກໍຄືການນໍາຂອງແຂວງ ເປັນຫ່ວງເປັນໄຍທີ່ສຸດແມ່ນຄວາມສະຫງົບປອດໄພຕາມທ້ອງຖະໜົນ ຖ້າອີງໃສ່ແຕ່ເຈົ້າໜ້າທີ່ຈະລາຈອນ ກໍໍ່ບໍ່ສາມາດ ຕິດຕາມ ແນະນໍາ ແລະ ຄວບຄຸມໄດ້ໝົດ ຈຶ່ງຮຽກຮ້ອງໃຫ້ທຸກພກສ່ວນໃນທົ່ວສັງຄົມ ໂດຍສະເພາະຜູ້ນຳໃຊ້ ຂັບຂີ່ລົດພາຫະນະທຸກປະເພດຕາມຖະໜົນຫົນທາງ ຈົ່ງພ້ອມກັນປະຕິບັດກົດຈະລາຈອນຢ່າງເຂັ້ມງວດ ບໍ່ຂັບຂີ່ລົດໄວ, ດື່ມສິ່ງມຶນເມົາແລ້ວບໍ່ຂັບຂີ່ລົດ...ອຸປະຕິເຫດຕາມຖະໜົນກໍ່ຈະບໍ່ເກີດຂຶ້ນ, ຊີວິດຊັບສິນກໍ່ຈະປອດໄພທົ່ວໜ້າ; ຄໍາອວຍພອນທີ່ວ່າ: ປີໃໝ່ຂໍໃຫ້ມີໂຊກໃໝ່ໄຊງາມ, ມີຄວາມຜາສຸກເບີກບານມ່ວນຊື່ນ...ກໍໍ່ຈະປະກົດຜົນເປັນຈິງ.

                                                                                                                                                                                      ໂດຍ: ອ.ສອນສຸລິນ