ເມື່ອລະດູການເຄື່ອນຍ້າຍກ້າວເຂົ້າສູ່ເດືອນເມສາ ເທດສະການແຫ່ງຄວາມຊຸ່ມຊື່ນ ຄືເທດສະການປີໃໝ່ລາວໃກ້ຈະມາຮອດອີກແລ້ວ, ຄົນເຮົາທັງຫຼາຍໄດ້ຕັ້ງໜ້າຕັ້ງຕາລໍຄອຍ ວັນເວລາແຫ່ງຄວາມເບີກບານມ່ວນຊື່ນຢ່າງໃຈຈົດໃຈຈໍ່ ເພາະເປັນເທດສະການປະເພນີວັດທະນະທຳອັນດີງາມທີ່ມີຄວາມສຳຄັນຂອງປວງຊົນລາວທັງຊາດ ແລະ ຍັງເປັນວັນເວລາແຫ່ງການນັດໝາຍເຕົ້າໂຮມໝູ່ເພື່ອນ, ເຕົ້າໂຮມຍາດຕິພີ່ນ້ອງຂອງທົ່ວສັງຄົມອີກດ້ວຍ; ປີໃໝ່ລາວປີນີ້ ກົງກັບວັນທີ 14, 15 ແລະ 16 ເມສາ 2018, ຊຶ່ງເປັນໄລຍະເວລາພັກວຽກລັດຖະການຍາວເຖິງ 5 ວັນຕິດຕໍ່ກັນແຕ່ວັນທີ 14 ຫາ 18 ເມສາ 2018 ການນໍາຂອງແຂວງກໍ່ໄດ້ມີຄວາມເປັນຫ່ວງເປັນໄຍຕໍ່ການຮັກສາຄວາມສະຫງົບປອດໄພຮອບດ້ານ, ໂດຍສະເພາະຄວາມສະຫງົບປອດໄພທາງດ້ານຊີວິດ ແລະ ຊັບສິນ ຕະຫຼອດເຖິງຄວາມເປັນລະບຽບຮຽບຮ້ອຍຂອງທົ່ວສັງຄົມ, ການເສື່ອມເສຍຮີດຄອງປະເພນີ, ວັດທະນະທຳອັນດີງາມ... ແນ່ນອນວ່າ ທາງອໍານາດການປົກຄອງແຕ່ລະຂັ້ນ, ເຈົ້າໜ້າທີ່, ພະນັກງານຂະແໜງການທີ່ກ່ຽວຂ້ອງທຸກພາກສ່ວນ ກໍ່ໄດ້ມີການກະກຽມປະຕິບັດໜ້າທີ່ຂອງຕົນ ຕະຫຼອດໄລຍະບຸນປີໃໝ່ລາວນີ້ຢ່າງຮອບດ້ານ. ໃນຊຸມປີຜ່ານມາ ແຂວງບໍລິຄໍາໄຊ ກໍ່ໄດ້ເອົາໃຈໃສ່ໃນການຄຸ້ມຄອງບຸນປີໃໝ່ລາວເປັນຢ່າງດີ ມີອອກແຈ້ງການ, ລະບຽບການ, ຂໍ້ຫ້າມຕ່າງໆ ທີ່ກ່ຽວພັນເຖິງການຈັດຕັ້ງເຄື່ອນໄຫວຕະຫຼອດໄລຍະບຸນປີໃໝ່ລາວ ໂຄສະນາປະຊາສໍາພັນ ໂດຍຜ່ານພາຫະນະສື່ມວນຊົນທຸກປະເພດ ເຈົ້າໜ້າທີ່ກໍໄດ້ນໍາໃຊ້ລົດຕິດເຄື່ອງຂະຫຍາຍສຽງເລາະປ່າວປະກາດຕາມຄຸ້ມບ້ານຕ່າງໆ ແລະ ດ້ວຍວິທີອື່ນໆ. ເຖິງຢ່າງໃດກໍ່ຕາມ ປະກົດການຫຍໍ້ທໍ້ກໍ່ຍັງປະກົດມີໃຫ້ເຫັນເປັນປະຈຳໃນແຕ່ລະປີ ຄື: ເກີດອຸປະຕິເຫດ ເນື່ອງຈາກແລ່ນລົດໄວເກີນຂອບເຂດ, ເມົາແລ້ວຂັບຂີ່ລົດ, ບໍ່ປະຕິບັດຕາມກົດຈະລາຈອນຢ່າງເຂັ້ມງວດ, ການຫົດສົງນ້ຳຊຶ່ງກັນແລະ ກັນບໍ່ຖືກຕ້ອງຕາມຮີດຄອງປະເພນີ, ຝືນຕໍ່ວັດທະນະທຳອັນດີງາມຂອງຊາດ ໃຊ້ນ້ຳສີ, ແກ່ນຜັກອີ່ຕູ່, ແປ້ງສິງກະໂປ, ເອົານ້ຳໃສ່ຖົງຢາງແກ່ວງໃສ່ກັນ, ແກ່ວງໃສ່ຜູ້ຄົນກາຍທາງ,

 

ໃຊ້ເຄື່ອງຊີດນ້ຳແຮງດັນສູງ...,ດື່ມສິ່ງມືນເມົາເກີນຂອບເຂດ ອາລະວາດຕີກັນ ສ້າງຄວາມບໍ່ສະຫງົບໃຫ້ແກ່ສັງຄົມ ກໍ່ໃຫ້ເກີດຄວາມເສຍຫາຍຕໍ່ຊີວິດ ແລະ ຊັບສິນເປັນຈຳນວນຫຼາຍ. ການທີ່ເຕົ້າໂຮມກັນເປັນກຸ່ມກ້ອນນຸ່ງເສື້ອສີດຽວກັນ ເບິ່ງແລ້ວກໍ່ເຫັນວ່າງາມຕາຢູ່ດອກ ແຕ່ຂໍ້ຄວາມທີ່ພິມ ຫຼື ຂຽນໃສ່ເສື້ອ ສ່ວນໜຶ່ງແມ່ນບໍ່ສຸພາບ ມີຄວາມໝາຍສຽດສີ, ລາມົກອານາຈານ, ດູດດຶງທາງເພດ, ນຸ່ງໜ້ອຍຫົ່ມບາງ, ທາແປ້ງ-ທາລິບສະຕິກໂດຍບໍ່ເລືອກໜ້າ ບໍ່ໄດ້ຮັບອະນຸຍາດ ເປັນການສວຍໂອກາດລວນລາມເພດກົງກັນຂ້າມ. ພຶດຕິກຳເຫຼົ່ານີ້ ລ້ວນແຕ່ບໍ່ສອດຄ່ອງກັບວັດທະນະທຳຮີດຄອງປະເພນີປີໃໝ່ລາວ. ຕໍ່ກັບສະພາບການດັ່ງກ່າວ ໃນໂອກາດປີໃໝ່ລາວປີນີ້ ທາງການນໍາຂອງແຂວງບໍລິຄໍາໄຊ ກໍ່ໄດ້ຮຽກຮ້ອງທຸກພາກສ່ວນໃນທົ່ວສັງຄົມ ຈົ່ງໄດ້ຮ່ວມແຮງຮ່ວມໃຈກັນ ປະກອບສ່ວນຮັກສາຄວາມສະຫງົບ, ຄວາມເປັນລະບຽບຮຽບຮ້ອຍ-ປອດໄພໃນທົ່ວສັງຄົມຢ່າງໜັກແໜ້ນ, ຮັກສາໄດ້ວັດທະນະທໍາອັນດີງາມຂອງຊາດ ຈັດຕັ້ງບາສີສູ່ຂວັນ ອວຍໄຊໃຫ້ພອນຊຶ່ງກັນຕາມຮີດຄອງປະເພນີ, ຫົດສົງນໍ້າດ້ວຍນໍ້າອົບນໍ້າຫອມ, ນໍ້າທີ່ສະອາດ, ສ້າງບັນຍາກາດເບີກບານມ່ວນຊື່ນ ຕາມທິດປະຢັດມັດທະຍັດ ບໍ່ຟູມເຟືອຍ, ສ້າງໄດ້ຄວາມສາມັກຄີຢ່າງແໜ້ນແຟ້ນ ເສີມຂະຫຍາຍມູນເຊື້ອວັດທະນະທຳ ປະເພນີອັນດີງາມຂອງຊາດໃຫ້ຍືນຍົງຕະຫຼອດໄປ. ປີໃໝ່ຜົນງານໃໝ່ໃຫຍ່ຫຼວງກວ່າເກົ່າ ມີຄວາມຜາສຸກຄວາມຈະເລີນ ທຸກທົ່ວໜ້າ.

                                                                   ໂດຍ: ອ.ສອນສຸລິນ