ນະຄອນ ເປຕຼາ ( Petra) ຢູ່ໃນປະເທດຈໍແດນ ( Jordan)  ແມ່ນນະຄອນຫີນໂບຮານທີ່ແກະສະຫຼັກໄວ້ຢ່າງລຶກລັບ ແລະ ໜ້າມະຫັດສະຈັນທີ່ສຸດຢູ່ໃນຫວ່າງເຂົາ ວາດີ ອາຣາບາ ( Wadi Araba ) ພູນີ້ ຕັ້ງຢູ່ລະຫວ່າງທະເລສາບມໍລະນະ ( Dead Sea ) ກັບອ່າວ ອາກາບາ ( aqaba) ໃນປະເທດຈໍແດນ.

    ນະຄອນຫີນເປຕຼາ ນີ້ ບໍ່ວ່າຈະເປັນວິຫານ, ຂັ້ນໄດ, ໂຮງລະຄອນ ແມ່ນເຈາະເຂົ້າໄປໃນຫີນເກືອບທັງໝົດ ແລະ ແກະສະຫຼັກແຕ່ຈອມພູເຂົາລົງມາເປັນຫຼືບເປັນຊັ້ນຢ່າງງົດງາມເຊິ່ງໄດ້ສະແດງເຖິງສີມື ແລະ ສີລະປະໃນການແກະສະຫຼັກຫີນທີ່ຍອດຢ້ຽມ ແລະ ເປັນໜ້າມະຫັດສະຈັນຢ່າງຍິ່ງ.

     ນະຄອນ ເປຕຼາ ນີ້ ແຕ່ບູຮານເຄີຍເປັນນະຄອນແຫ່ງການຄ້າຂະໜາດໃຫຍ່ ແລະ ເຄີຍຈະເລີນຮຸ່ງເຮືອງທີ່ສຸດໃນຊ່ວງ 50-70 ປີ ກ່ອນ ຄສ ແຕ່ຕໍ່ມານະຄອນນີ້ໄດ້ຖືກປະຖີ້ມ ຍ້ອນເກີດມີເມືອງໃໝ່ ແລະ ພົບເສັ້ນທາງການຄ້າທີ່ປອດໄພ ແລະ ສະດວກກ່ວາ ເຊິ່ງເມື່ອປີ ຄສ 106 ໄດ້ຖືກພວກໂຣມັນເຂົ້າມາຮຸກຮານ ແລະ ຢຶດຄອງດິນແດນ, ຕໍ່ມາໃນປີ ຄສ 363 ໄດ້ເກີດມີແຜ່ນດິນໄຫວເຮັດໃຫ້ນະຄອນຫີນນີ້ຖືກທໍາລາຍ ແລະ ເຊື່ອມລົງເລື້ອຍໆ ຈົນຫ່າງໄກຈາກຜູ້ຄົນ, ແຕ່ນັ້ນມາ ນະຄອນຫີນແຫ່ງນີ້ ໄດ້ຖືກປະຖີ້ມມາເປັນເວລານານເຖິງ 700 ປີ ຈົນກະທັ້ງຕໍ່ມາ ໃນປີ ຄສ 1812 ມີນັກສໍາຫຼວດຊາວ ສະວິດເຊີແລນ ຊື່ວ່າ ຈອນແຮນ ລັດວິງ ເບີກຮອດ ( Johann Ludwig Burckhardt ) ເດີນທາງຜ່ານມາເຫັນ ແລະ ຄົ້ນພົບນະຄອນນີ້ໃນຮູບແບບທີ່ຫັກພັງ ແຕ່ນັ້ນມາຈົນເຖິງປະຈຸບັນນີ້ນະຄອນຫີນ ເປຕຼາໄດ້ກາຍເປັນນະຄອນທີ່ດຶງດູດນັກທ່ອງທ່ຽວທົ່ວໂລກໃຫ້ໄປຊົມ ແລະ ເຫັນຄວາມມະຫັດສະ  ຈັນຂອງນະຄອນແຫ່ງນີ້.

   ນະຄອນ ເປຕຼາ ໄດ້ຮັບລົງທະບຽນເປັນມໍລະດົກໂລກຈາກອົງການ ອຸຍແນສໂກ ( UNESCO) ໃນປີ 1685 ແລະ ນັບວ່າ ເປັນໜື່ງໃນສິ່ງທີ່ລໍ້າຄ່າຫຼາຍທີ່ສຸດຂອງມໍລະດົກທາງວັດທະນະທໍາແຫ່ງມວນມະນຸດນາໆຊາດ ແລະ ນະຄອນແຫ່ງນີ້ກໍ່ໄດ້ຖືກຄັດເລືອກໃຫ້ເປັນໜື່ງໃນສິ່ງມະຫັດສະຈັນຍຸກໃໝ່ຂອງໂລກເມື່ອວັນທີ່ 7 ກໍລະກົດ 2007.