ຄຳສຸພາສິດທີ່ວ່າ “ເກົ້າອົດເກົ້າເຍື້ອນຫາກສິໄດ້ທ່ອນຄຳ” ຍັງໃຊ້ໄດ້ທຸກຍຸກທຸກສະໄໝ ເພາະວ່າຄົນເຮົາຖ້າມີຄວາມດຸໝັ່ນບວກກັບຄວາມພຽນພະຍາຍາມ ຊອກຫາໂອກາດໃຫ້ຕົນເອງແລ້ວລົງມືເຮັດ ກໍ່ສາມາດເປັນຄົນທີ່ປະສົບຜົນສຳເລັດໃນຊີວິດໄດ້. ດັ່ງຄອບຄົວຂອງ ນາງ ຈັນທະລາ ກັນຍາວົງ ອາຍຸ 35 ປີ ເຊິ່ງເປັນສະມາຊິກຊາວໜຸ່ມຕົວແບບບ້ານປາກປຶງ ເມືອງປາກຊັນ ແຂວງບໍລິຄຳໄຊ ​ທີ່ມີຄວາມ​ດຸໝັ່ນຂະ​ຫຍັນ​​ພຽນ ແລະ ໄດ້ຢຶດຖືເອົາອາຊີບການປູກພືດກະສິກຳເປັນຫຼັກ ໃນການສ້າງລາຍຮັບເຂົ້າຄອບຄົວ ຈົນສາມາດຫຼຸດພົນອອກຈາກຄວາມທຸກຍາກ ກາຍເປັນຄອບຄົວພັດທະນາໄດ້ໃນທີ່ສຸດ.

      ​ຄອບຄົວ​ຂອງນາງ ຈັນທະລາ ກັນຍາວົງ ມີ​ສະມາຊິກ​ທັງ​ໝົດ 6 ຄົນ, ຍິງ 2 ຄົນ ​ໃນ​ນັ້ນມີ​ແຮງ​ງານ​ຕົ້ນຕໍ 3 ຄົນ. ຈາກການບອກເລົ່າຂອງ ນາງ ຈັນທະລາ ໄດ້ໃຫ້ຮູ້ວ່າ: ໄດ້ເລີ່ມສ້າງຄອບຄົວໃນປີ 2002, ແຕ່ກອນຜົວມີອາຊີບຂັບລົດໃຫ້ບໍລິສັດເອກະຊົນ ສ່ວນຕົນເອງຖືເອົາອາຊີບກະສິກຳເປັນຕົ້ນຕໍ ໃນເນື້ອທີ່ທັງໝົດ 2 ໄລ່ ຢູ່ແຄມແມ່ນ້ຳຂອງ, ໃນນັ້ນໄດ້ແບ່ງປູກໝາກເລັ່ນ, ໝາກເຂືອ ແລະ ຖົ່ວດີນ ເປັນສ່ວນໃຫ່ຍ ການປູກແມ່ນດ້ວຍວິທີປະຖົມປະຖານຂາດເຕັກນິກທີ່ຖືກຕ້ອງ ເຮັດໃຫ້ຜົນຜະລິດບໍ່ໄດ້ດີເທົ່າທີ່ຄວນ ອາໄສແຕ່ລາຍຮັບຈາການຂາຍຜົນຜະລິດກັບເງີນເດືອນຂອງຜົວ ກໍ່ພໍໃຊ້ຈາຍພາຍໃນຄອບຄົວເທົ່ານັ້ນ ບໍ່ມີສ່ວນເຫຼືອເກັບໄວ້ໃຊ້ໃນການພັດທະນາຄອບຄົວ ເຮັດໃຫ້ໄລຍະນັ້ນຄອບຄົວຂອງຕົນພົົບກັບຄວາມຫຍຸ້ງຫຍາກຫຼາຍດ້ານ. ມາຮອດປີ 2012 ພາກລັດຂັ້ນເທິງໄດ້ເລັ່ງເຫັນຄວາມສຳຄັນຂອງວຽກງານກະສິກຳ ເພື່ອຜະລິດເປັນສິນຄ້າສະບຽງອາຫານ ແລະ ໄດ້ລົງມາເຄື່ອນໄຫວເຝິກອົບຮົມເຕັກນິກໃນການປູກຝັງ ໃຫ້ແກ່ພໍ່ແມ່ປະຊາຊົນບ້ານປາກປຶງ ຕົນເອງກໍ່ໄດ້ເຂົ້າຮ່ວມ ແລະ ໄດ້ຮຽນຮູ້ຫຼາຍບົດຮຽນທີ່ສຳຄັນ ເປັນຕົ້ນແມ່ນວິທີປູກທີ່ຖືກຕ້ອງ, ການເລືອກແນວພັນ ແລະ ການປູກພືດທີ່ເໝາະສົມກັບລະດູການ ຫຼັງຈາກນັ້ນຕົນເອງກໍ່ນຳໄປທົດລອງເຫັນວ່າໄດ້ຜົນດີສົມຄວນ ຈຶ່ງຂະຫຍາຍເນື້ອທີ່ການຜະລິດຈາກ 2 ໄລ່ ມາເປັນ 7 ໄລ່ ເຊິ່ງຈະແບ່ງເປັນການປູກພືດໝຸນວຽນຕາມລະດູການຄື: ແບ່ງເປັນການປູກໝາກແຕງ ແລະ ມັນເພົາ 4 ໄລ່ ອີກ 3 ໄລ່ ປູກຜັກບົ່ວ, ຫອມປ້ອມ ແລະ ໝາກເລັ່ນ ເຫັນວ່າຕະຫຼາດມີຄວາມຕ້ອງການຫຼາຍ ຜົນຜະລິດຂອງຕົນກໍ່ໄດ້ລາຄາດີມີແມ່ຄ້າຄົນກາງມາຮັບຢ່າງເປັນປະຈຳ ຫຼັງຈາກເຮັດໄດ້ໄລຍະໜຶ່ງຄອບຄົວຂອງຕົນກໍ່ມີຊີວິດທີ່ດີຂື້ນເປັນກ້າວໆ.

    ສຳລັບວິທີການປູກ ນາງ ຈັນທະລາ ຍັງໃຫ້ຮູ້ຕື່ມອີກວ່າ: ພໍຕົກຮອດເດືອນມິຖຸນາ(6) ຕົນເອງຈະເລີ່ມລົງມືປູກໝາກແຕງ ໃນເນື້ອທີ 4 ໄລ່ ເພາະວ່າເປັນພືດທີເໝາະສົມກັບລະດູນີ້ ອັນດັບທຳອິດແມ່ນຂັ້ນຕອນກະກຽມດີນ ຄືຕ້ອງໃຊ້ລົດໄຖດີນ ປະໄວປະມານ 4-5 ວັນ ແລ້ວຄາດຕື່ມອີກ ແລະ ຕີໃຫ້ເປັນຄູໃຊຝ້າຢາງດຳປົກໄວ້ ຫຼັງຈາກແມ່ນຂັ້ນຕອນກ້າເບ້ຍ ຄືຕ້ອງເອົາດິນທີ່ກຽມໄວ້ໃສ່ບອກກ້າເບ້ຍ ແລ້ວເອົາແກ່ນໝາກແຕງໃສ່ປົກດ້ວຍຂີ້ແກບ ຫຼັງຈາກນັ້ນຫົດນ້ຳເອົາຝ້າປົກໄວ້ ເພື່ອປ້ອງກັນມົດ, ໜູ ຫຼື ແມງໄມ້ ເຂົ້າໄປກິນ ການກ້າເບຍຄັ້ງໜຶ່ງແມ່ນປະມານ 1 ໝື່ນກວ່າເບຍ ປະໄວ້ 4-5 ວັນກໍ່ຈະອອກເບຍນ້ອຍ, ນຳໄປປູກໃສ່ໜານທີ່ເຮົາກຽມໄວ້ ເມື່ອເບ້ຍໝາກແຕງປົ່ງໃບຄາຍແລ້ວ ໃຫ້ສິດຢາຊີວະພາບບຳລຸງຮາກ (ເປັນຢາທີ່ຜະລິດຈາກທຳມະຊາດ ບໍມີສານພິດເຈືອປົນ 100%) ປະມານ 1-2 ອາທິດ ເຄືອໝາກແຕງຈະຂື້ນຄັ້ງ(ໄມ້ທີ່ປັກໄວ້ໃຫ້ເຄືອໝາກແຕງກ້ຽວ) ແລ້ວໃຫ້ສີດຢາບຳລຸງດອກ ແລະ ໝາກ  ໃຫ້ສິດທິດລະເທື່ອ ປະມານ 45 ວັນ ກໍ່ສາມາດເກັບຜົນລະປູກໄດ້ ລວມເງີນຕົ້ນທຶນປູກໝາກແຕງທັງໝົດປະມານ 3 ລ້ານກີບ, ການຂາຍແມ່ນມີແມ່ຄາມາຮັບຊື້ຢູ່ສວນ ໃນລາຄາໝື່ນລະຊາວພັນກີບ (12Kg/20.000 ກີບ) ໃນແຕ່ລະປີສາມາດຂາຍຜົນຜະລິດໄດ້ບໍ່ຕ່ຳກວ່າ 30.000.000 ກີບ. ຫຼັງຈາກປູກໝາຍແຕ່ງແລ້ວ ໃນຊ່ວງເດືອນຕຸລາ(10) ຫຼື ຫຼັງໜ້າຝົນ ກໍ່ຈະປູກມັນເພົາ ເປັນພືດທີ່ປູກງາຍການບົວລະບັດກໍ່ບໍ່ຫຍຸ້ງຍາກ ເພາະວ່າບໍ່ໄດ້ຫົດນໍ້າ ແລະ ບໍ່ໄດ້ໃສ່ປຸ້ຍ ວິທີປູກແມ່ນກະກຽມດິນ 4-5 ມື້ ຫຼັງຈາກນັ້ນກໍ່ໄຖ ແລະ ຄາດ ເຮັດເປັນຄັນຄູ ຕໍ່ໄປກໍ່ຊັກລຸ້ງ(ເອົາໄມ້ແຫຼມແທງລົງດີນໃຫ້ເປັນຮູ) ເພື່ອປ່ອນແກ່ນມັນເພົາລົງໃສ່ຂຸມລະ 2 ເມັດ ພາຍໃນໜື່ງອາທິດຈະມີໜໍ່ແຕກອອກມາ ໃຊ້ເວລາພຽງ 3 ເດືອນເທົ່ານັ້ນ ສາມາດເກັບຜົນລະປູກໄດ້ຕໍ່າສຸດ 10 ໂຕ່ນ ສາມາດສ້າງລາຍຮັບໄດ້ ປະມານ 20.000.000 ກີບ/ຕໍ່ປີ ນອກນັ້ນຍັງມີລາຍຮັບຈາກການປູກຫົວບົ່ວ, ຫ້ອມປ້ອມ ແລະ ໝາກເລັ່ນ ຕືມອີກປະມານ 27.000.000 ກີບ ລ້ວມລ້າຍຮັບທັງໝົດຈາກການຂາຍຜົນຜະລິດປີໜຶ່ງ 77.000.000 ກີບ, ປະຈຸບັນນີ້ຕົນເອງໄດ້ມີເຮືອນຢູ່ຖາວອນ 1 ຫຼັງ ແລະ  ກໍາລັງສ້າງໃໝ່ອີກ 1 ຫຼັງ, ລົດໄຖ່ນາ 1 ຄັນ, ລົດຈັກ 4 ຄັນ ແລະ ມີເງີນຝາກຈຳນວນໜື່ງ ເພື່ອສົ່ງລູກໄດ້ສຶກສາຮໍ່າຮຽນ.

      ໃນຕອນທ້າຍ ນາງ ຈັນທະລາ ກັນຍາວົງ ຍັງຝາກຄຳເວົ້າຕື່ມໄປເຖິງບຸກຄົນທີ່ບໍ່ທັນມີອາຊີບ ຫຼືວ່າ ຕ້ອງການຊອກຫາອາຊີບເສີມແກ່ຄອບຄົວ ການປູກພືດກະສິກຳກໍ່ເປັນອີກທາງເລືອກໜຶ່ງທີ່ເໝາະສົມ ແລະ ສາມາດສ້າງລາຍຮັບໄດ້ດີພໍສົມຄວນ ແຕ່ຕ້ອງໄດ້ທຸ້ມເທຢ່າງເຕັມທີ່ ແລະ ມີຄວາມຕັ້ງໃຈສູງ ຈຶ່ງສາມາດເຫັນໄດ້ເຖິງຜົນສຳເລັດດັ່ງກ່າວ ແລະ ລາວຍັງເວົ້າຕື່ມອີກວ່າ ຖ້າຫາກທ່ານໄດ້ມີຄວາມສົນໃຈຢາກຮຽນຮູ້ວິທີການປູກພຶດ ກໍ່ສາມາດມາພົບໄດ້ທີ່ບ້ານປາກປຶງ ຫຼື ໂທຫາໂດຍກົງທີ່ເບີ 020 55952225 ຕົນເອງພ້ອມທາຍທອດບົດຮຽນທີ່ມີໃຫ້ໄດ້ຕາມປະສົບການທີ່ມີ.