6 ເດືອນຕົ້ນປີ ສົກ​ງົບປະມານ 2017 ​ແຂວງ​ບໍລິ​ຄຳ​ໄຊ ສາມາດ​ຈັດ​ເກັບ​ລາຍ​ຮັບ​ເຂົ້າ​ງົບປະມານ ທັງ​ພູດ​ສູນ​ກາງ ​ແລະ ພູດ​ທ້ອງ​ຖິ່ນ ໄດ້​ເກີນ​ແຜນ​ໄດ້ທີ່ກຳນົດໄວ້ ທ່ານ ຄໍາແຫວນ ປັນຍານຸວົງ ຫົວໜ້າພະແນກການເງິນແຂວງ ໄດ້ລາຍງານຕໍ່ກອງປະຊຸມສະໄໝສາມັນ ເທື່ອທີ 3 ສະພາປະຊາຊົນແຂວງບໍລິຄຳໄຊ ຊຸດທີ I  ໃນວັນທີ 12 ກໍລະກົດ 2017.

       ພາຍ​ໃຕ້​ການ​ຊີ້​ນໍາ-ນໍາພາ​​ຂອງອົງການ​ປົກຄອງ​ແຕ່ລະ​ຂັ້ນ ໃນໄລຍະທີ່ຜ່ານມາ​ພະແນກການເງິນໄດ້​ຜັນ​ຂະຫຍາຍ​ບັນດາ​ນິຕິ​ກຳ, ລະບຽບ​ກົດໝາຍ​ເຂົ້າ​ສູ່​ວຽກ​ງານ​ຕົວ​ຈິງ ​ເຮັດ​ໃຫ້​ຜູ້​ປະກອບ​ການ, ຫົວໜ່ວຍ​ທຸລະ​ກິດ, ປະຊາຊົນ ມີ​ຄວາມ​ຮັບ​ຮູ້​ເຂົ້າໃຈປະກອບສ່ວນ​ປະຕິບັດ​ພັນທະ​ຂອງຕົນ, ໄດ້ຂຸ້ນຂ້ຽວຜັນຂະຫຍາຍແຜນງົບປະມານ 2017 ເຂົ້າສູ່​ຫົວໜ່ວຍ​ງົບປະມານທັນ​ກັບ​ກຳນົດ​ເວລາ​, ປະຕິບັດ​ການ​ເບີກ​ຈ່າຍ​ເງິນ​ເດືອນ, ​ເງິນ​ອຸດ​ໜູນ ​ໄດ້​ເປັນ​ປົກກະຕິ ພ້ອມດຽວກັນໄດ້​ສ້າງກົນ​ໄກຄູ້​ມຄອງ, ​ຈັດ​ເກັບ​ລາຍ​ຮັບ​ລະຫວ່າງ​ສູນ​ກາງ, ​ແຂວງ, ​ເມືອງ ແລະ ບ້ານ ​ໃຫ້​ມີ​ຄວາມ​ສະດວກ​ວ່ອງ​ໄວ​ໂປ່​ງ​ໃສມີ​ປະ​ສິດທິ​ຜົນ​ກວ່າ​ເກົ່າ ນອກນັ້ນຍັງໄດ້​ເກັບ​ກໍາ​ຂໍ້​ມູນ ​ແລະ ສຳ​ຫຼວດຖານ​ລາຍ​ຮັບ​ຄືນ​ໃໝ່ໃນ​ທົ່ວ​ແຂວງ, ​ໄດ້ເພີ້​ມທະວີ​ການກວດກາປະຕິບັດວິໄນການເງິນຢ່າງເຂັ້ມງວດ ແນໃສ່ອັດຊ່ອງວ່າງການຮົ່ວໄຫລຂອງງົບປະມານ, ປະສານສົມທົບກັບຂະແໜງການທີ່ກ່ຽວຂ້ອງ ໃນການສະໜອງຂໍ້ມູນຄິດໄລ່ຈັດເກັບລາຍຮັບຈາກສ່ວຍສາອາກອນ, ຊັບສິນ, ພາສີ ໃຫ້ຖືກຕ້ອງຄົບຖ້ວນ ແລະ ທັນເວລາ, ເອົາໃຈໃສ່ການ​ເກັບ​ຄ່າ​ທໍານຽມ​ທີ່​ດິນ​ຢ່າງ​ມີ​ຈຸດ​ສຸມ, ເລັ່ງທວງ ແລະ ແກ້​ໄຂ​ໜີ້​ສິນທີ່ຄ້າງມອບ​ເຂົ້າ​ງົບປະມານ. ໃນ 6 ເດືອນຕົ້ນປີ ສົກ​ງົບປະມານ 2017 ທີ່ຜ່ານມາ ເຫັນວ່າ​ແຂວງ​ບໍລິ​ຄຳ​ໄຊໄດ້​ຂຸດ​ຄົ້ນ​ຈັດ​ເກັບ​ລາຍ​ຮັບ​ເຂົ້າ​ງົບປະມານ ທັງ​ພູດ​ສູນ​ກາງ ​ແລະ ພູດ​ທ້ອງ​ຖິ່ນ ໄດ້​ເກີນ​ແຜນ​ການທີ່​ກະຊວງ​ມອບ​ໃຫ້ ດ້ວຍຈັງຫວະ​ເພີ້​ມຂື້ນຄື: ດ້ານລາຍຮັບພູດ​ສູນ​ກາງ ​ແລະ ພູດ​ທ້ອງ​ຖິ່ນປະຕິບັດໄດ້ທັງ​ໝົດ 378,089 ຕື້ກີບ ເທົ່າກັບ 137,55% ທຽບ​ໃສ່​ແຜນ 6 ເດືອນຕົ້ນປີ​, ເທົ່າ 67,95% ຕາມ​ແຜນ​​ກະຊວງ​ການ​ເງິນ ຫຼື ​ເທົ່າ 68,02% ຕາມ​ແຜນ​ທີ່​ສະພາ​ປະຊາຊົນ​ແຂວງ​ຮັບຮອງ ໃນນັ້ນ ລາຍ​ຮັບ​ພູດ​ສູນ​ກາງ: ​ປະຕິບັດໄດ້​ 283,634 ຕື້ກີບ ເທົ່າກັບ 146,04% ທຽບ​ໃສ່​ແຜນ 6 ເດືອນຕົ້ນ​ປີ ຫຼື ​ເທົ່າ 73,13% ຕາມ​ແຜນ​ທີ່​ສະພາ​ປະຊາຊົນ​ແຂວງ​ຮັບຮອງ, ລາຍ​ຮັບ​ພູດ​ທ້ອງ​ຖິ່ນ ປະຕິບັດ​ໄດ້ 94,455 ຕື້ກີບ, ທຽບ​ໃສ່​ແຜນ 6 ເດືອນຕົ້ນ​ ເທົ່າກັບ117,12% ແລະ 56,22 % ທຽບ​ໃສ່ແຜນການ​ປີ.

       ສຳລັດທິດທາງແຜນການໃນຕໍ່ໜ້າ ທ່ານ ຄຳແຫວນ ປັນຍານຸວົງ ຍັງໄດລາຍງານຕື່ມອີກວ່າ ຈະເອົາ​ໃຈ​ໃສ່ເພີ້ມທະວີການສຶກສາອົບຮົມການເມືອງແນວຄິດ ຕໍ່ສະມາຊິກພັກພະນັກງານ ຂະແໜງການເງິນ ໃຫ້ມີຄວາມໜັກແໜ້ນ ມີຄວາມຮັບຜິດຊອບສູງຕໍ່ໜ້າທີ່ວຽກງານ ມີຄວາມຊື່ສັດ, ໂປງໃສ ເອົາໃຈໃສ່ບໍລິການຮັບໃຊ້ປະຊາຊົນ ຜູ້ປະກອບການ ດ້ວຍຈັນຍາບັນຈັນຍາທຳ​, ສືບຕໍ່ຄູ້​ມຄອງຂຸດຄົ້ນ​ຈັດ​ເກັບ​ລາຍ​ຮັບຈາກ​ຖານ​ທີ່​ມີ​ຢູ່​ແລ້ວ​ ແລະ ສຸມໃສ່ຊອກ​ຄົ້ນ​ແຫ​ລ່ງລາຍ​ຮັບ​ທີ່​ຍັງ​ບົ່ມ​ຊ້ອນໃຫ້​ຖືກຕ້ອງ​ຄົບ​ຖ້ວນ, ​ເອົາ​ໃຈ​ໃສ່​ໃນ​ການ​ຄູ້​ມຄອງ​ລາຍ​ຈ່າຍ​ງົບປະມານຕາມແຜນທີ່ສະພາຮັບຮອງ, ​ເພີ້​ມທະວີ​ຄວາມ​ຮັບຜິດຊອບ​ໃນ​ການ​ປະສານ​ສົມທົບ​ກັບ​ຂະ​ແໜງ​ການ​ສາຍ​ຕັ້ງ-ສາຍ​ຂວາງຂະ​ແໜງ​ການ​ທີ່​ກ່ຽວຂ້ອງ​ ເພື່ອ​ໃຫ້​ມີ​ສ່ວນ​ຮ່ວມ​ໃນ​ການ​ຊີ້​ນຳ, ຕິດຕາມ​ກວດກາ​ການ​ເກັບ​ລາຍ​ຮັບ ​ແລະ​ ແກ້​ໃຂຜົນ​ການກວດ​ສອບໃຫ້​ໄວ​ຂື້ນ.