ສະຖາບັນການເງີນຈຸລະພາກທີ່ຮັບເງິນຝາກສາຍໄຍສຳພັນ ສາຂາບໍລິຄຳໄຊ ເປັນສະຖາບັນການເງີນພາກເອກະຊົນແຫ່ງໜື່ງ ທີ່ໄດ້ຮັບການໄວ້ວາງໃຈຈາກສັງຄົມຢ່າງກວ້າງຂວາງ ແລະມີຍອດການບໍລິການເງີນກູ້ຂອງລູກຄ້າສູງພໍສົມຄວນ ຖ້າທຽບໃສ່ໃນຊຸມປີຜ່ານມາ 

       ທ່ານ ນາງ ດາ​ລິ​ວັນ ລັດ​ຕະ​ນະ​ວິ​ຈິດ ຫົວ​ໜ້າ​ສະ​ຖາ​ບັນ​ການ​ເງິນ​ຈຸ​ລະ​ພາກ ທີ່​ຮັບ​ເງິນ​ຝາກ ສາຍ​ໄຍ​ສຳ​ພັນ (ສກຈຮສສ) ສາ​ຂາ​ບໍ​ລິ​ຄຳ​ໄຊ ໄດ້ໃຫ້​ສຳພາດ​ ໃນວັນທີ 3 ກໍ​ລະ​ກົດນີ້ວ່າ: ສະ​ຖາ​ບັນໄດ້​ຮັບການສ້າງ​ຕັ້ງ​ເປັນ​ສາ​ຂາ​ມາ​ແຕ່ວັນ​ທີ 12 ກຸມ​ພາ​ 2016 ​ເ​ຊິ່ງ​​ໃນ​ເບື້ອງຕົ້ນເລີ່ມ​ຈາກ​ການ​ໃຫ້​ແຫຼ່ງ​ທຶນ​ເງິນ​ກູ​້​ຂະ​ໜາດ​ນ້ອຍ-ຂະໜາດກາງ ໂດຍແນ​ໃສ່​ເຮັດ​ໃຫ້​ປະຊາຊົນມີ​ທຶນຮອນພຽງພໍ ​​ເພື່ອ​ນຳ​​ໃຊ້ເຂົ້າ​ໃນ​ການດຳ​ເນີນ​ທຸລະ​ກິດ ​ແລະ ການ​ຜະ​ລິດອື່ນໆ ໃນວົງ​ເງິນ​ກູ້​ຢືມ 5-50 ລ້ານ​ກີບ ໂດຍ​ໃຊ້​ເງິນ​ເດືອນ​ເປັນຫຼັກຊັບ​ຄ່ຳ​ປະ​ກັນ. ​ປະ​ຈຸ​ບັນ​ເຫັນ​ວ່າ​ໄດ້​ຮັບ​ການ​ຕອບ​ຮັບ​ຈາກປະ​ຊາ​ຊົນ ແລະ ນັກ​ທຸ​ລະ​ກິດຫຼ​າຍ​ຂຶ້ນ​ເລື້ອຍໆ, ເຊີ່ງສາມາດ​ປ່ອຍ​ເງິນ​ກູ້​ໄດ້​ເຖີງ  37.147.900.500 ກີບ​ ແລະ ມີ​ເງິນ​ຝາກ 1.741.454.283 ກີບ.

ນັບ​ແຕ່​ໄດ້​ຮັບ​ການ​ຈັດ​ຕັ້ງ​ປະ​ຕິ​ບັດ​ຂອງສະ​ຖາ​ບັນ​ການ​ເງິນ​ດັ່ງກ່າວ ​ເປັນຕົ້ນ​ມາ ກອງ​ທຶນໄດ້ປະກອບ​ສວ່ນ​ເຮັດ​ໃຫ້​ຄຸນ​ນະພາ​ບ ​ແລະ ລະດັບ​ຊີວິດ​ການ​ເປັນ​ຢູ່​ຂອງ​ປະຊາຊົນ​ດີ​ຂຶ້ນກວ່າ​ເກົ່າ ແລະ  ​ເຮັດ​ໃຫ້​ປະຊາຊົນ​ມີ​ທຶນຮອນ​ພຽງພໍ​ເຂົ້າ​ສູ່​ການ​ຜະລິດສິນຄ້າ ​ແລະ ມີລາຍ​ຮັບ​ຈາກ​ການ​ຜະລິດ​ຂອງ​ເຂົາ​ເຈົ້ານັບ​ມື້ນັບ​ຫຼາຍ​ຂຶ້ນ ​ແລະ ​ເຫັນ​ວ່າ​ ໄດ້​ຮັບ​ຄວາມ​ສົນ​ໃຈຈາກ​ປະຊາຊົນ​ເປັນ​ຢ່າງ​ດີ ເຊິ່ງມັນສະ​ແດງ​ອອກ​ຈຳ​ນວນຜູ້​ມາ​ໃຊ້​ບໍລິການ​ເງິນ​ກູ້ ແລະ ເງິນ​ຝາກ ​ນັບ​ມື້ນັບ​ເພີ່ມ​ຂຶ້ນ ​ມີ​ການ​ຂະ​ຫຍາຍ​ລູກ​ຄ້າ​ອອກສູ່ 6 ​​ເມືອງຄື: ເມືອງ​ປາກ​ຊັນ, ປາກ​ກະ​ດິງ, ທ່າ​ພະ​ບາດ, ບໍ​ລິ​ຄັນ, ​ຄຳ​ເກີດ ແລະ ເມືອງວຽງ​ທອງ ເຮັດ​ໃຫ້​ສະ​ຖາ​ບັນການ​ເງິນ​ແຫ່ງ​ນີ້ໄດ້​ກາຍ​ເປັນ​ສະ​ຖາ​ບັນ​ໜຶ່ງ​ທີ່​ໄດ້ຮັບ​ຄວາມ​ເຊື່ອ​ໝັ້ນ ແລະ ​ໄວ້​ເນື້ອເຊື່ອໃຈ​ຈາກ​ປະຊາຊົນແຂວງ​ບໍ​ລິ​ຄຳ​ໄຊເປັນຢ່າງດີ. ​ປະ​ຈຸ​ບັນ​ສະ​ຖາ​ບັນ​ຂອງພວກເຮົາໄດ້​ມີບໍ​ລິ​ການໃຫ້​ແກ່​ລູກ​ຄ້າ​ 3 ດ້ານຫຼັກໆ ​ເປັນຕົ້ນ ບໍ​ລິ​ການ​ປ່ອຍ​ເງິນ​ກູ້​ຂະ​ໜາດ​ນ້ອຍ​ອັດ​ຕາ​ດອກ​ເບ້ຍ 2% ຕໍ່​ເດືອນ ດອກສະເໝີ ໃນ​ວົງ​ເງິນ 1-5 ລ້ານ​ກີບ ແລະ ດອກ​ເບ້ຍ 3% ຕໍ່​ເດືອນ ດອກ​ເບ້ຍຫຼຸດ​ຕາມ​ຕົ້ນ​ທຶນ​ທີ່​ຄ້າງ​ຊຳ​ລະ ໃນ​ວົງ​ເງິນ​ກູ້ຫຼາຍກວ່າ 5-50 ລ້ານ​ກີບ. ບໍ​ລິ​ການ​ຮັບ​ຝາກ​ເງິນ​ປະ​ຢັດ​ອັດ​ຕາ​ດອກ​ເບ້ຍ 2% ຕໍ່​ປີ, ເງິນ​ຝາກ​ມີ​ກຳ​ນົດ 3 ເດືອນ ອັດ​ຕາ​ດອກ​ເບ້ຍ 4% ຕໍ່​ປີ, ຝາກ 6 ເດືອນ 5% ຕໍ່​ປີ, ຝາກ 12 ເດືອນ​ 6% ຕໍ່​ປີ, ຝາກ 24 ເດືອນ 7% ຕໍ່​ປີ, ຝາກ 36 ເດືອນ 8% ຕໍ່​ປີ, ຝາກ 48 ເດືອນ 10% ຕໍ່​ປີ ແລະ ຝາກ 60 ເດືອນ 12% ຕໍ່​ປ​ີ ນອກນັ້ນຍັງມີບໍ​ລິ​ການ​ຮັບ​ປຶກ​ສາ​ທາງ​ດ້ານ​ການ​ເງິນຕື່ມອີກ.