ທ້າວ ຊົ່ງ ເນັ່ງຢີວ່າງ ໄດ້ຕາງໜ້າຄອບຄົວຕົວແບບ ຂຶ້ນຜ່ານບົດລາຍງານຕໍ່ກອງປະຊຸມໃຫຍ່ອົງຄະນະພັກເມືອງວຽງທອງ ຄັ້ງທີ VII ທີ່ໄດ້ໄຂຂຶ້ນໃນວັນທີ 11 ກຸມພາ 2020 ຢູ່ຫ້ອງວ່າການເມືອງວຽງທອງ.

ທ້າວ ຊົ່ງ ເນັ່ງຢີວ່າງ ອາຍຸ 29 ປີ ປະຊາຊົນຢູ່ບ້ານໜອງປາດ ເປັນຄອບຄົວໜຶ່ງທີ່ຖືເອົາການປູກ-ລ້ຽງເປັນອາຊີບຕົ້ນຕໍ ເພື່ອສ້າງລາຍຮັບໃຫ້ແກ່ຄອບຄົວ ໂດຍຄອບຄົວຂ້າພະເຈົ້າມີຈຳນວນ 6 ຄົນ, ຍິງ 2 ຄົນ, ມີແຮງງານຕົ້ນຕໍ 4 ຄົນ, ແຕ່ກ່ອນແມ່ນຢູ່ບ້ານຫຼັກຄໍາ ເປັນບ້ານຫ່າງໄກ ສອກຫຼີກ,​ ບໍ່ມີ​ເສັ້ນທາງ​ລົດ​ ເປັນ​ທາງ​ຍ່າງພົບ​ຄວາມ​ຫຍຸ້ງຍາກ​ໃນການດຳລົງຊີວິດ ຖືຮີດເກົ່າຄອງເດີມ, ບໍ່ມີການຄ້າ-ຂາຍ, ການ​ຜະລິດຍັງ​ຕິດ​ພັນ​ກັບ​ທໍາ​ມະ​ຊາດ, ອາຊີບບໍ່ໝັ້ນຄົງ, ຫຼາຍປີ​ຂາດ​ເຂົ້າກິນ, ຊີວິດຝືດ​ເຄືອງ, ​ເປັນ​ຄອບຄົວທີ່​ທຸກ​ຍາກ. ແຕ່ຍ້ອນໄດ້ຮັບແສງສະຫວ່າງຈາກແນວທາງປ່ຽນແປງໃໝ່ຂອງພັກ-ລັດ ເປັນຕົ້ນແມ່ນ: ​ການ​ຫັນກໍາລັງ​ພະນັກງານ​ລົງ​ກໍ່ສ້າງ​ຮາກ​ຖານ​ການ​ເມືອງ​-ພັດທະນາ​ຊົນນະບົດ​ຮອບດ້ານ​ໂຄສະນາ​ເຜີຍ​ແຜ່, ສຶກສາ​ອົບຮົມ,​ ປຸກລະດົມຂົນຂວາຍໃຫ້​ປະຊາຊົນ​ບັນດາ​ເຜົ່າ​ ຮັບ​ຮູ້​​ເຂົ້າ​ໃຈ​ຢ່າງ​ເລິກ​ເຊິ່ງ, ປະຕິບັດຕາມ 4 ​ເນື້ອ​ໃນ 4 ຄາດໝາຍ: ຈັດສັນພູມລຳເນົາ, ອາຊີບ​ຄົງ​ທີ່, ເຕົ້າໂຮມບ້ານນ້ອຍໃຫ້ເປັນບ້ານໃຫຍ່ ​ເຫັນ​ໄດ້​ຄວາມໝາຍສໍາຄັນ​ດັ່ງກ່າວ ຄອບຄົວຂ້າພະ​ເຈົ້າ ມີຄວາມ​ຕື່ນ​ຕົວ​ທາງ​ດ້ານ​ການ​ເມືອງ ຈຶ່ງໄດ້ຍົກຍ້າຍຈາກບ້ານຫຼັກຄໍາ ​ມາຢູ່ບ້ານໜອງປາດ​​ໃນປີ 2000.

       ປະຕິບັດ​ຕາມມະຕິກອງປະຊຸມໃຫຍ່ ຄັ້ງທີ VI ອົງຄະນະພັກເມືອງ ວ່າ​ດ້ວຍ​ການ​​ຈັດ​ສັນພູ​ມລໍາ​ເນົາ, ອາຊີບຄົງທີ່, ຊຸກຍູ້-ສົ່ງເສີມການຜະລິດເປັນສິນຄ້າ ເພື່ອ​ແກ້​ໄຂຄວາມທຸກຍາກ​ໃຫ້​ປະຊາຊົນເທື່ອລະກ້າວ ຄອບຄົວຂ້າພະເຈົ້າຈຶ່ງເກີດມີແນວຄິດຢາກພັດທະນາເສດຖະກິດຄອບຄົວ​ໂດຍ​ສຸມ​ໃສ່ການປູກ-ລ້ຽງເປັນອາຊີບຕົ້ນຕໍ​ຕາມ​ເງື່ອນ​ໄຂ ​ແລະ ທ່າແຮງ, ໃນ​ເບື້ອງຕົ້ນ​ມີເນື້ອທີ່ນາ 1,6 ເຮັກຕ່າ, ດິນ​ຄັງສັດ 5 ​ເຮັກ​ຕ່າ, ດິນສວນ 5 ເຮັກຕ່າ, ​ແຕ່ລະ​ປີ​ມີ​ການ​ຂະຫຍາຍ​ເນື້ອທີ່​ທໍາ​ການ​ຜະລິດ​ປະຈຸ​ບັນ​ມີ​ເນື້ອທີ່​ທັງໝົດ 19,6 ​ເຮັກ​ຕ່າ ຈິ່ງໄດ້ຈັດສັນເນື້ອທີ່ດິນດັ່ງກ່າວ​ອອກເປັນ 2 ຕອນ ຄື: ຕອນ​ທີໜຶ່ງ ບຸກເບີກເປັນຄັງສັດຈາກ 5 ​ເຮັກ​ຕ່າ ມາ​ເປັນ 10 ເຮັກຕ່າ ໄດ້ປູກຫຍ້າສະໜອງ​ໃຫ້ສັດລ້ຽງຢ່າງ​ພຽງພໍ, ນັບ​ແຕ່​ປີ 2014-2019 ໄດ້ຂາຍງົວປີ​ລະ 4 ໂຕ​ໂດຍ​ສະ​ເລ່ຍລາຍຮັບ 25 ລ້ານກີບຕໍ່ປີ, ​ໃນ 5 ປີ​​ ຂາຍ​ສັດລ້ຽງ​ໄດ້ 125 ລ້ານກີບ. ປັດຈຸບັນ​ຍັງ​ມີງົວ 22 ​ໂຕ, ​ແມ່​ພັນ 12 ​ໂຕ, ຕອນທີສອງ ບຸກເບີກເປັນສວນປູກ​ໄມ້​ໃຫ້ໝາກ ແລະ ປູກພືດລົ້ມລຸກຕ່າງໆ​ ເຊັ່ນ: ໝາກກ້ຽງ, ມັນຕົ້ນ, ໝາກເຜັດ, ຖົ່ວດິນ, ເລີ່​ມປູກຕົ້ນໝາກກ້ຽງປີ 2006 ເນື້ອທີ່ 1,5 ເຮັກຕ່າ ຈຳນວນ 500 ຕົ້ນ ຮອດປີ 2015 ​​ເລິ່​ມ​ໄດ້​ຮັບຜົນ​ຜະລິດ​, ​ເຫັນ​ໄດ້​ວ່າມີ​ລາຍ​ຮັບດີ ຄອບຄົວຂ້າພະ​ເຈົ້າ ຈິ່ງ​ໄດ້​ປູກ​ຕື່ມຈຳນວນ 200 ຕົ້ນ, ຮອດປີ 2019 ຜົນ​ຜະລິດ​ເພີ່ມຂຶ້ນ ສາມາດ​ຂາຍສົ່ງອອກ​ສູ່​ຕະຫຼາດ 3,5​ ໂຕນ​ຕໍ່ປີ ເປັນເງິນ 17 ລ້ານກ່ວາກີບ, ລາຍຮັບຈາກ​ການ​ຂາຍມັນຕົ້ນ 25 ລ້ານກ່ວາ​ກີບ, ໝາກ​ເຜັດ 3 ລ້ານກ່ວາກີບ ​ແລະ ຖົ່ວດິນ 6 ລ້ານກ່ວາ​ກີບ ສະ​ເລ່ຍລາຍ​ຮັບແຕ່ລະປີ 51 ລ້ານກ່ວາກີບ.

      ສັງ​ລວມ​ແລ້ວ​ໃນ​ໄລຍະ 5 ປີ ຄອບ​ຄົວ ຂ້າພະ​ເຈົ້າມີລາຍຮັບ ຈາກການປູກຝັງ-ລ້ຽງສັດ 383 ລ້ານກ່ວາກີບ ລາຍ​ຮັບ​ດັ່ງກ່າວ ຄອບຄົວຂ້າພະ​ເຈົ້າ ​ມີ​ເງິນສະສົມໃນແຕ່ລະປີ ​ແລະ ໄດ້ໃຊ້ຈ່າຍເຂົ້າວຽກງານຕ່າງໆເປັນຕົ້ນ​ໄດ້ບຸກເບີກຄັງ​ສັດ, ປູກຫຍ້າ ແລະ ການ​ບົວລະບັດຮັກສາ  20 ລ້ານກ່ວາກີບຕໍ່ປີ, ປຸກສ້າງເຮືອນ​ໄມ້ 1 ຫຼັງ ຂະໜາດ 7x15 ​ແມັດ, ຊື້ລົດຈັກ 2 ຄັນ, ລົດກະບະຮຸນໄດ 1 ຄັນ, ລົດຕູ້ 1 ຄັນ,​ ລົດໄຖ​ນາ​ເດິ​ນຕາມ 1 ຄັນ, ລົດຊີ້ງ 1 ຄັນ ​ແລະ ຈັກປັ່ນເຂົ້າ 1 ເຄື່ອງ ລວມ​ເປັນ​ມູນ​ຄ່າ​ທັງ​ໝົດ 335 ລ້ານ​ກ່ວາກີບ. ຜ່ານ​ການປູກ-ລ້ຽງ ຄອບຄົວ ຂ້າພະ​ເຈົ້າ ​ໄດ້​ມີ​ຊີວິດ​ການ​ເປັນ​ຢູ່ດີ​ຂຶ້ນ​ກ່ວາ​ເກົ່າ ​ກາຍ​ເປັນ​ຄອບຄົວພົ້ນທຸກ, ຄອບຄົວ​ວັດທະນະ​ທໍາ, ຄອບຄົວ​ສາທາລະນະ​ສຸກ​ແບບຢ່າງ, ຄອບຄົວພັດທະນາ, ​ເປັນຄອບຄົວຕົວແບບປີ 2019 ​ແລະ ​ໄດ້ຮັບ​ໃບ​ຍ້ອງຍໍຈາກຄະນະ​ພັກຂັ້ນເທິງທັງໝົດ 22 ໃບ.

       ສຳລັບແຜນການໃນຕໍ່ໜ້າ ຄອບຄົວຂ້າພະເຈົ້າຈະສືບຕໍ່ຂະຫຍາຍຄັງ​ສັດ, ປູກ​ຫຍ້າ,​ ເລືອກ​ພໍ່​ພັນ, ​ແມ່​ພັນ, ຂະຫຍາຍ​ພື້ນ​ທີ່ປູກໝາກກ້ຽງ ​ແລະ ຢາງພາລາ​, ນຳໃຊ້ເຕັກນິກ, ວິຊາການ​ເຂົ້າໃນການປູກໃຫ້ຫຼາຍຂຶ້ນ ແລະ ວາງຄາດໝາຍສູ້ຊົນສ້າງລາຍຮັບ​ໃຫ້​ໄດ້ສະເລ່ຍ 26 ລ້ານກ່ວາກີບຕໍ່ຄົນຕໍ່ປີ ຊຸກຍູ້ສົ່ງເສີມໃຫ້ລູກໄດ້ຮຽນຢ່າງ​ຕໍ່​ເນື່ອງ, ​ເວລາ​ເຈັບ​ເປັນ​ກໍ່​ມີ​ເງິນສາມາດ​ປິ່ນປົວ, ຊື້​ວັດຖຸ​ອຸ​ປະກອນ ຮັບ​ໃຊ້​ຄອບ​ຄົວ​ຫຼາຍ​ຂຶ້ນ. ຂ້າພະ​ເຈົ້າ ຂໍ​ເຊີນຊວນພໍ່​ແມ່ປະຊາຊົນ​​ ຜູ້​ທີ່​ມີ​ຄວາມ​ສົນໃຈມັກ​​ໃນ​ການ​ປູກ-ລ້ຽງ ຂ້າພະ​ເຈົ້າ ພ້ອມ​ແລ້ວ​ຈະ​ໃຫ້​ຄວາມ​ສະດວກ, ຖອດ​ຖອນ​ບົດຮຽນ​ທາງ​ດ້ານ​ທິດ​ສະ​ດີ, ​ເຕັກນິກ ​ແລະ ພຶດຕິ​ກໍາ​ຕົວ​ຈິງ​ໄດ້​ທຸກ​ເວລາ.