ທຸກ​ອາຊີບ​ລ້ວນ​ແຕ່​ມີ​ສະ​ເໜ່ ​ແລະ ຄວາມງົດ​ງາມ​ໃນ​ຕົວ​ຂອງ​ມັນ​ເອງ ​ເຊິ່ງ​ໄດ້​ສະ​ແດງ​ອອກ​ໃຫ້​ເຫັນ​ວ່າການ​ສູ້​ຊົນ​ກັບ​ຊີວິດນັ້ນ​ ຕ້ອງ​ມີ​ຄວາມ​ມານະ​ອົດທົນ, ດຸ​ໜັ່ນຂະຫຍັນ​ພຽນ​ ໃນ​ການຍືດ​ຖືປະກອບ​ອາຊີບ​ຕ່າງໆ​ໃຫ້​ໝັ້ນ​ຄົງ ທັງ​ເຮັດ​ວຽກ​ງານ ແລະ ​ທັງ​​ເຮັດວຽກ​ຄອບຄົວ ​ໃນ​ການສ້າງສາ​ພັດທະນາ, ​ເສດຖະກິດນຳ​ລາຍ​ໄດ້​ມາສູ່​ຄອບຄົວ. ທ້າວ ຫວາດ​ສະໜາ ກ໋ອງປັນຍາ ອາ​ຍຸ 35 ປີ ມີ​ອາຊີບ​ເຮັດ​ທຸລະ​ກິດຄ້າຂາຍ ຢູ່​ບ້ານ​ສີວິ​ໄລ ​ເມືອງ​ປາກ​ຊັນ ​ແຂວງ​ບໍລິ​ຄຳ​ໄຊ ​ໄດ້​ໃຫ້​ສຳພາດ​ຕໍ່​ສື່​ມວນ​ຊົນ ​ວ່າ: ນອກຈາກລາວຈະ​ມີ​ອາຊີບ​ຂາຍ​ເຄື່ອງ​ວັດຖຸມີຄ່າ​ອື່ນ​ໆແລ້ວ ລາວຍັງ​ມີອາຊີບ​ເສີມ​ໃຫ້​ກັບ​ຄອບຄົວ​ຂອງຕົນ​ເອງ  ຫັນ​ມາປູກ​ຜັກ​ສະອາດ, ປອດ​ສານພິດ​ໃຫ້​ກາຍ​ເປັນ​ສິນຄ້າຂາຍ​ສົ່ງ-​ຂາຍຍ່ອຍ​ນຳ​ອີກ​ດ້ວຍ ​​ເຊິ່ງ​ເປັນ​ການ​ລິ​ເລີ່​ມທົດ​ລອງ​ອີກ​ໜຶ່ງ​ອາຊີບ ທີ່​ຍັງ​ບໍ່​ທັນ​ເປັນ​ຕົວ​ຕົນ ​ຍັງ​ບໍ່​ທັນ​ເປັນ​ສະ​ມາ​ຊິກ​ກຸ່ມ​ຜະລິດ​ປູກຝັງຂອງ​ບ້ານສີວິ​ໄລ ​ແລະ ຍັງ​ບໍ່​ທັນ​ໄດ້​ຮັບ​ການ​ຢັ້ງຢືນ​ຈາກ​ພາກສ່ວນ​ກ່ຽວຂ້ອງ ພຽງ​ເປັນ​ການ​ທົດ​ລອງ​ປູກ​ແບບ​ຄອບຄົວ, ​ໃນ​ເບື້ອງ​ລາວ​ພຽງ​​ແຕ່​ປູກ​ຜັກ​ກິນ​ເອງພາຍ​ໃນ​ຄອບຄົວ ​ໂດຍ​ການ​ປູກ​ໃສ່​ວັດ​ສະດຸ​ທີ່​ຫາ​ໄດ້​ງ່າຍ ​ເປັນ​ຕົ້ນ​ແມ່ນ​ປູກ​ໃສ່​ກະບັ້ງ​ໄມ້​ໄຜ່​ບ້ານ ຫຼື ປູກ​ໃສ່ທໍ່​ຢາງ​ ຈາກ​ນັ້ນ​​ເຫັນ​ວ່າ​ພືດ​ຜັກ​ຂອງ​ລາວ​ຂະຫຍາຍ​ພັນ​ອອກ​ເລື້ອຍໆ ຈົນ​ເຮັດ​ໃຫ້ການ​ຮັບ​ປະທານກິນ​ນັ້ນບໍ່​ທັນ ລາວ​ຈຶ່ງ​ມີ​ແນວ​ຄິດ​ວ່າ ລອງຫັນ​ມາ​ປູກ​ຂາຍ​ເບິ່ງ ​ເຊິ່ງ​ໄດ້​ເລີ່​ມທົດ​ລອງ​ລົງມືປູກຜັກ​ມາ​​ແຕ່ທ້າຍ​ເດືອ​ນຕຸລາ ປີ 2017 ​ເປັນ​ຕົ້ນ​ມາ ​ແລະ ສາມາດ​ຕອບ​ສະໜອງລູກ​ຄ້າ​​​​ຕາມ​ທ້ອງ​ຕະຫລາດ​ເປັນ​ຢ່າງ​ດີ ລາວ​ຈຶ່ງ​ເກີດ​ມີ​ຄວາມ​ມັກ​ຮັກ​ໃນ​ການ​ປູກ​ພຶດຜັກ ຈຶ່ງ​​ໄດ້ຕັດສິນ​ໃຈ​ໄປ​ຝຶກ​ອົບຮົມ ​ແລກປ່ຽນບົດຮຽນດ້ານ​ການ​ກະ​ເສດ​ຢູ່​ປະ​ເທດ​ເພື່ອນ​ບ້ານ (ກຸງ​ເທບ, ລາຊາ​ອານາ​ຈັກ​ໄທ), ນອກ​ນັ້ນ ຍັງ​​ສຶກສາ​ຮຽນ​ຮູ້ຈາກ​ທາງ​ອິນ​ເຕີ​ເນັດ, ​ເວ​ບ​ໄຊ, ຢູທູບ ​ໃນ​ໂລກ​ໂຊ​ຊ່ຽວ ​ແລະ​ ມີ​ວິທີ​ປູກ​ແບບ​ໃໝ່,  ​ໃຊ້​ເນື້ອ​ທີ່​ປູກ​ແບບປະ​ຫຍັດ, ປູກອ້ອມ​ຕາມ​ເນື້ອ​ທີ່​ດີ​ນ​ປຸກ​ສ້າງ​ກໍ່​ໄດ້ ບໍ່​ຈຳ​ເປັນ​ຕ້ອງ​ມີ​ເນື້ອ​ທີ່​ກວ້າງຂວາງ​ຫຼາຍ​ເຮັກຕາ. ສຳລັບ​ວິ​ທີ​ປູກ​ຜັກ​ຂອງ​ລາວ ​ແມ່ນ​ແຕກ​ຕ່າງ​ຈາກ​ປະຊາຊົນ​ຊາວ​ສວນ​ທົ່ວ​ໄປ ​ໂດຍ​ການ​ປູກ​ຜັກ​ແບບວິທີ​ໃໝ່, ງ່າຍ, ສະ​ສວກ ​ໂດຍບໍ່​ໃຊ້​ແຮງ​ງານ​ຄົນຫຼາຍ, ​ບໍ່​ຈຳ​ເປັນຕ້ອງ​ໄປ​ຂຸດ​ດິນ,  ​ແປງ​ໜານ​, ຕາກ​ແດດ​, ​ໃສ່​ຝຸ່ນ ຕັກ​ນ້ຳ​ຫົດຜັກ​ໃຫ້​ເສຍ​ເວລາຫຼາຍ​ອີກ ​ເຊິ່ງລາວ​ມີ​ແນວ​ຄິດ​​ແບບ​ໃໝ່ ຫັນ​ມາ​ປູກ​ຜັກ​ສະອາດ, ປອດ​ສານ​ພິດ​​ ໃສ່​ໜານທໍ່​ຢາງ​ (ທໍ່​ນ້ຳ​ປະ​ປະ​ຂະໜາດ 30 ​ຊມ, ຍາວ 10 ມ) ​ແລະ ກະບອກບັ້ງ​ໄມ້​​ໄຜ່ບ້ານ ​ເປັນ​ວັດຖຸ​ທີ່​ຫາ​ໄດ້​ງ່າຍດ້ວຍ​ລະບົບ​ອັດຕະ​ໂນ​ມັດ ຫຼື ​ເອີ້ນ​ວ່າ : ດ້ວຍ​ລະບົບ (​ໄຮ​ໂດ​ໂປນິກ) ​ດ້ວຍ​ການ​ໃສ່​ຝຸ່ນຜ່ານ​ລະບົບ​ການ​ໝູນ​ວຽນ​ຂອງ​ນ້ຳ ​ເຮັດ​ໃຫ້​ພືດ​ຜັກ ຂຽວ, ງາມ, ກອບ ​ແລະ ມີ​ລົດ​ຊາດ​ແຊບ​ເມື່ອ​ນຳ​ໄປ​ປຸງ​ແຕ່ງອາຫານ ​ແລະ ມີ​ໂປ​ຕີນ​ດີ​ຕໍ່​ສຸຂະພາບ​ອີກ​ດ້ວຍ, ​ການ​ເລີ່​ມຕົ້ນປູກ​ຜັກ​ຂອງ​ລາວພຽງ​ແຕ່​​​ໃຊ້​ງົບປະ​ມານ​ 20-25 ລ້ານ​ກີບ ​ປະກອບມີ 16 ໜານ, ​ ​ມີພືດ​ຜັກຄື: ຜັກກາດນາ, ກວາງຕຸງ, ຮອງ​ເຕ່, ຜັກ​ບົ້ງ, ສະ​ລັດ ຫອມລາບ ​ແລະ ​ເຊີ​ນາລີ.

      ສຳລັບ​ການ​ສົ່ງ​ຂາຍ ​ແມ່ນ​ຕາມ​ທ້ອງ​ຕະຫຼາດ​ພາຍ​ໃນ​ເມືອງ​ປາກ​ຊັນ, ຕາມ​ຮ້ານອາຫານ ​ແລະ ​ແມ່​ຄ້າ​ທົ່ວ​ໄປມາຮັບຊື້, ​​ໃຊ້​ເວລາ​ໃນ​ການ​ປູກ​ພຽງ 45 ວັນ ກໍ່​ສາມາ​ໄປ​ຈຳໜ່າຍ​ຂາຍ​ໄດ້ ເຊິ່ງຂາຍ​ໃນ​ລາຄາ​ຖືກ ກິ​ໂລ​ລະ 10-15 ພັນ​ກີບ​ເທົ່າ​ນັ້ນ ​, ​ໃນ​ປີ​ນີ້​ ແມ່ນ​ຂາຍ​ເປັນ​ງວດ​ທີ 3 ​ແລ້ວ ສາມາດ​ສ້າງ​ລາຍ​ຮັບ​ ຈາກ​ການ​ຂາຍ​ຜັກ​ໃນ​ງວດ​ໜຶ່ງ​ແມ່ນ 5-7 ລ້ານ​ກີບ/ງວດ.

     ທ້າວ ຫວາດ​ສະໜາ ກ໋ອງປັນຍາ ຍັງ​ໄດ້​ກ່າວ​ແຜນການ​ໃນ​ຕໍ່ໜ້າ​ວ່າ ຍັງ​ຈະ​ໄດ້​ຂະຫຍາຍ​ສວນ​ຂອງລາວ​ອອກ​ຕຶ່ມ, ນຳຊະນິດ​ພື​ດຜັກ​ຕ່າງໆ​ມາ​ປູກ​ເພີ່ມ​ໃຫ້​ຫຼາຍ​ຂຶ້ນ, ຊອກ​ຫາ​ລູກ​ຄ້າຕະຫຼາດຮອງ​ຮັບ, ສາມາດ​ຕອບ​ສະໜອງ​ຕາມ​ຄວາມ​ຕ້ອງການ​ຂອງ​ລູກ​ຄ້າ​ພາຍ​ໃນ, ຕ່າງ​ເມືອງ , ຕ່າງ​ແຂວງ ​ແລະ ຍັງ​ຮຽກຮ້ອງ​ໃຫ້​ພາກສ່ວນ​ຕ່າງໆ, ອົງການ​ຈັດ​ຕັ້ງ​ກ່ຽວ​ຂ້ອງ ລົງ​ມາ​ຕິດຕາມ​ຊຸກຍູ້, ສົ່ງ​ເສີມ ​ແລະ ​​ແນະ​ນຳ​ວິທີ​ການ​ຕ່າງໆ ​ເພື່ອ​ຈະ​ໄດ້​ປະຕິບັດ​ຕາມ​ຂັ້ນ​ຕອນ ​ແລະ ຍັງ​ໄດ້​ກ່າວ​​ວ່າ​ ປະຊາຊົນ ຫຼື ຊາວ​ສວນ ຜູ້​ທີ່​ມີ​ຄວາມ​ສົນ​ໃຈ ຕ້ອງການ​ທີ່​ຈະມາ​ທັດສະນະແລກປ່ຽນ​ບົດຮຽນ, ​ໃຫ້​ຄວາມ​ຮູ້​​ເຊິ່ງກັນ​ລະ​ກັນ ດ້ານ​​ວິທີ​ການ​ຕ່າງໆ ຍິນ​ດີ​ຕອບ​ສະໜອງ ​ເພື່ອ​ກ້າວ​ໄປ​ສູ່​ການ​ພັດທະນາ​, ດ້ານ​ການ​ຜະລິດ​ກະສິກຳ​​ເປັນ​ສິນຄ້າ ທີ່​ທັນ​ສະ​ໄໝຮ່ວມ​ກັນ​ໄປ​ເທື່ອ​ລະ​ກ້າວ.