ໃນວັນທີ 31 ຕຸລາ 2017 ເມືອງປາກຊັນ ໄດ້ຈັດພິທີການແຂ່ງຂັນກິລາຊິງຂັນເຈົ້າເມືອງ ປະເພດກິລາບານເຕະ ແລະ ດຶງເຊືອກ ຢູ່ທີ່ເດີ່ນໂຮງຮຽນຕອນຕົ້ນ ໂພສີ ເພື່ອເປັນການສ້າງຂະບວນການຂ່ຳນັບຮັບຕ້ອນ ວັນປະກາດຄະນະບໍລິຫານງານຊາວໜຸ່ມເມືອງປາກຊັນເປັນ ເປັນຊາວໜຸ່ມນຳໜ້າ 4 ບຸກ ປະຈຳປີ 2017 ໂດຍການເຂົ້າຮ່ວມຂອງທ່ານ ບຸນຍູ້ ພົມມະວົງສາ ກຳມະການພັກແຂວງ ເລຂາພັກເມືອງ ເຈົ້າເມືອງ-ເມືອງປາກຊັນ ມີບັນດານັກກິລາຈາກຮາກຖານຊາວໜຸ່ມແຕ່ລະຫ້ອງການທົ່ວເມືອງປາກຊັນເຂົ້າຮ່ວມ.

          ການແຂ່ງຂັນກິລາໃນຄັ້ງນີ້ ມີ 2 ປະເພດກິລາຄື ກິລາບານເຕະ ແລະ ດຶງເຊືອກ ເຊິ່ງກິລາແຕ່ລະປະເພດ ມີ 10 ຮາກຖານເຂົ້າຮ່ວມ: ຮາກຖານຊາວໜຸ່ມ ຫ້ອງວ່າການປົກຄອງ, ປກສ, ປກຊ, ຍທຂ-ອພບຕ, ພາຍໃນ-ແຮງງານ, ແຜນການ-ການຄ້າ, ຈັດຕັ້ງ-ກວດກາ, ສານປະຊາຊົນເຂດ 1, ຊັບພະຍາກອນທຳມະຊາດ ແລະ ສິ່ງແວດລ້ອມ ແລະ ການເງິນ, ການແຂ່ງຂັນໃນຄັ້ງນີ້ ແມ່ນຈະຄັດເອົາແຕ່ທີ 1 ກັບທີ 2 ເທົ່ານັ້ນ ກິລາບານເຕະໂດຍຈະໃຊ້ນັກກິລາທີມລະ 10 ຄົນ, ສ່ວນດຶງເຊືອກແມ່ນທີມລະ 8 ຄົນ. ຈາກການແຂ່ງຂັນຄັດເລືອກແຕ່ຕອນເຊົ້າ ຈົນມາຮອດຕອນບ່າຍຂອງວັນດຽວກັນຈຶ່ງສາມາດສະຫຼຸບຜົນໄດ້ດັ່ງນີ້: ກິລາດຶງເຊືອກ ເປັນຮາກຖານຊາວໜຸ່ມຫ້ອງວ່າການ ທີ່ໂຊກຳລັງແຮງເໜືອກວ່າ ຮາກຖານຊາວໜຸ່ມ ປກສ ເມືອງປາກຊັນ ແລະ ສາມາດຄວ້າແຊ້ມໄປຄອງໄດ້ສຳເລັດ, ສ່ວນກິລາບານເຕະ ເປັນທີມຮາກຖານຊາວໜຸ່ມການເງິນ ທີ່ເອົາຊະນະທີມຮາກຖານຊາວໜຸ່ມສານປະຊາຊົນເຂດ 1 ດ້ວຍການຍິງຈຸດໂທດ 4-2 ປະຕູ ຈາກການສະເໝີກັນ 2-2 ປະຕູ ໃນເວລາ 40 ນາທີ ຄວ້າແຊ້ມປະຈຳປີ 2017, ສຳລັບປະເພດລາງວັນ ກິລາບານເຕະ ຊະນະເລີດໄດ້ຮັບຂັນ 1 ໜ່ວຍ ພ້ອມເງິນສົດ 150.000 ກີບ ແລະ ທີ 2 ໄດ້ຮັບເງິນສົດ 150.000 ກີບ, ກິລາດຶງເຊືອກໄດ້ຮັບຂັນ 1 ໜ່ວຍພ້ອມເງິນສົດ 100.000 ກີບ ແລະ ທີ 2 ໄດ້ຮັບເງິນສົດ 100.000 ກີບ ໃຫ້ກຽດຂຶ້ນມອບໂດຍທ່ານ ບຸນຍູ້ ພົມມະວົງສາ ແລະ ທ່ານ ສົມຈິດ ພົມສະຫວັດ ຮອງເຈົ້າເມືອງ-ເມືອງປາກຊັນ ຕາມລຳດັບ.