ງານ​ແຂ່ງຂັນ​ກິລາ​-ສີລະປະ ນັກຮຽນມັດທະຍົມສຶກສາສົມບູນ ​ຄັ້ງທີ IV ທີ່​ເມືອງ​ຄຳເກີດ​ເປັນ​ເຈົ້າພາບ ​ໄດ້ໄຂຂຶ້ນໃນວັນທີ 26 ມັງກອນ ແລະ ໄດ້ອັດລົງຢ່າງ​ເປັນ​ທາງ​ການ ​ໃນ​ວັນ​ທີ 30 ມັງກອນ 2020 ຢູ່​​ເດີ່ນກິລາ ມສ ນະຄອນ​​ໄຊ ໃຫ້​ກຽດ​ເຂົ້າ​ຮ່ວມ​ຂອງ​ ທ່ານ ບຸນ​ມາ ບຸ​ຈະ​ເລີ​ນ ຮອງ​ເຈົ້າ​ແຂວງ​ບໍລິ​ຄຳ​ໄຊ ທັງເປັນປະທານ​ຈັດ​ງານແຂ່ງຂັນ ມີ​​ການ​ນຳ​ຂອງ​ແຂວງ, ຂອງເມືອງ, ​ແຂກ​ຖືກ​ເຊີນ, ຄູ​ຝຶກ, ນັກ​ກິລາ ​ແລະ ມວນ​ຊົນ​ຊາວ​ເມືອງຄຳເກີດ ​ເຂົ້າ​ຮ່ວມ.

     ​ການຈັດ​ງານ​ແຂ່ງຂັນກິລາ-ສີລະປະ ນັກຮຽນມັດທະຍົມສຶກສາສົມບູນທົ່ວແຂວງ ຄັ້ງທີ IV ​ ເມືອງປາກຊັນ ໄດ້ສົ່ງນັກກິລາເຂົ້າຮ່ວມແຂ່ງຂັນ 6 ປະເພດ, ສີລະປະ 2 ລາຍການ, ມີຄະນະນຳ-ຄູຝຶກນັກກິລາເຂົ້າຮ່ວມແຂ່ງຂັນ 105 ຄົນ,ຍິງ 37 ຄົນ, ເມືອງທ່າພະບາດ ໄດ້ສົ່ງນັກກິລາເຂົ້າຮ່ວມແຂ່ງຂັນ 6 ປະເພດ, ສີລະປະ 2 ລາຍການ, ມີຄະນະນຳ-ຄູຝຶກນັກກິລາເຂົ້າຮ່ວມແຂ່ງຂັນ 105 ຄົນ, ຍິງ 44 ຄົນ, ເມືອງບໍລິຄັນ ໄດ້ສົ່ງນັກກິລາເຂົ້າຮ່ວມແຂ່ງຂັນ 3 ປະເພດ, ສີລະປະ 1 ລາຍການ, ມີຄະນະນຳ-ຄູຝຶກນັກກິລາເຂົ້າຮ່ວມແຂ່ງຂັນ 41 ຄົນ, ຍິງ 19 ຄົນ, ເມືອງປາກກະດິງ ໄດ້ສົ່ງນັກກິລາເຂົ້າຮ່ວມແຂ່ງຂັນ 6 ປະເພດ, ສີລະປະ 2 ລາຍການ, ມີຄະນະນຳ-ຄູຝຶກນັກກິລາເຂົ້າຮ່ວມແຂ່ງຂັນ 122 ຄົນ,ຍິງ 44 ຄົນ, ເມືອງວຽງທອງ ໄດ້ສົ່ງນັກກິລາເຂົ້າຮ່ວມແຂ່ງຂັນ 5 ປະເພດ, ສີລະປະ 2 ລາຍການ, ມີຄະນະນຳ-ຄູຝຶກນັກກິລາເຂົ້າຮ່ວມແຂ່ງຂັນ 80 ຄົນ,ຍິງ 13 ຄົນ, ເມືອງໄຊຈຳພອນ ສົ່ງນັກກິລາເຂົ້າຮ່ວມແຂ່ງຂັນ 2 ປະເພດ, ສີລະປະ 1 ລາຍການ, ມີຄະນະນຳ-ຄູຝຶກນັກກິລາເຂົ້າຮ່ວມແຂ່ງຂັນ 35 ຄົນ,ຍິງ 15 ຄົນ ແລະ ເມືອງ ຄຳເກີດເຈົ້າພາບສົ່ງນັກກິລາເຂົ້າຮ່ວມແຂ່ງຂັນ 5 ປະເພດ, ສີລະປະ 2 ລາຍການ, ມີຄະນະນຳ-ຄູຝຶກນັກກິລາເຂົ້າຮ່ວມແຂ່ງຂັນ 155 ຄົນ,ຍິງ 46 ຄົນ.​

       ​ການ​ແຂ່ງຂັນໄດ້​ດຳ​ເນີນໄປ​​ເປັນ​ເວລາ 5 ວັນ ​ເຊິ່ງ​ໄດ້​ແຂ່ງຂັນ 6 ປະ​ເພດ​ກິລາ​ ຄື: ກິລາແລ່ນ - ລານ, ກິລາບານເຕະ, ກິລາບານສົ່ງ, ກິລາເປຕັງ, ກິລາກະຕໍ້ ແລະ ກິລາໝາກເສິກ, ຊິງຫຼຽນທັງໝົດ 93 ຫຼຽນ ໃນນັ້ນ ຫຼຽນຄຳ, ຫຼຽນເງີນ ແລະ ຫຼຽນທອງ  ຢ່າງລະ 31 ຫຼຽນ.

    ຜ່ານ​ການ​ແຂ່ງຂັນ ​ເມືອງ​​ປາກຊັນ ສາມາດຄອງອັນດັບ 1 ໂດຍຍາດໄດ້ 8 ຫຼຽນ​ຄຳ, 7 ຫຼຽນ​ເງິນ, 3 ຫຼຽນ​ທອງ ລວມ 18 ຫຼຽນ,​ ອັນ​ດັບ​ທີ 2 ​ເມືອງ​ ປາກກະດິງ ໄດ້ 8 ຫຼຽນ​ຄຳ, 3 ຫຼຽນ​ເງິ​ນ, 3 ຫຼຽນ​ທອງ ລວມ 14 ຫຼຽນ, ອັນດັບທີ 3 ​ເມືອງ ຄຳເກີດເຈົ້າພາບ ໄດ້ 6 ຫຼຽນ​ຄຳ, 12 ຫຼຽນ​ເງິນ, 7 ຫຼຽນ​ທອງ ລວມ 25 ຫຼຽນ, ​ເມືອງ​ທ່າ​ພະ​ບາດ ໄດ້ 6 ຫຼຽນ​ຄຳ, 3 ຫຼຽນ​​ເງິນ, 8 ຫຼຽນ​ທອງ ລວມ 17 ຫຼຽນ, ​ເມືອງ​ວຽງທອງ ໄດ້ 5 ຫຼຽນຄຳ, 4 ຫຼຽນ​ເງິນ, 7 ຫຼຽນ​ທອງ ລວມ 16 ຫຼຽນ, ​ເມືອງ ບໍລິຄັນ ໄດ້ 4 ຫຼຽນ​ເງິ​ນ, 4 ຫຼຽນ​ທອງ, ເມືອງໄຊຈຳພອນ ໄດ້ 1 ຫຼຽນທອງ.

       ຈາກ​ນັ້ນ ​ທ່ານ ບຸນ​ມາ ບຸ​ຈະ​ເລີ​ນ ຮອງ​ເຈົ້າ​ແຂວງ ປະທານ​ຈັດ​ງານ ກໍ່​ໄດ້​ກ່າວ​ປິດ​ງານແຂ່ງຂັນກິລາ-ສິລະປະນັກຮຽນມັດທະຍົມສຶກສາທົ່ວແຂວງຄັ້ງທີ IV ​ຢ່າງ​ເປັນ​ທາງ​ການ ພ້ອມ​ທັງ​ເຊີນ​ທຸງຊາດ ​ແລະ ທຸງ​ກິລາ ລົງ​ຈາກ​ເສົາ ແລະ ຍັງໄດ້ມອບທຸງກິລາໃຫ້ເມືອງປາກກະດິງ ທີ່ຈະເປັນເຈົ້າພາບໃນປີ 2022 ໂດຍການກ່າວຮັບຂອງ ທ່ານ ຄຳເພັດ ໄຊປັນຍາ ຫົວໜ້າຫ້ອງການສຶກສາທິການ ແລະ ກິລາເມືອງປາກກະດິງ ບັນຍາກາດໃນງານແມ່ນເຕັມໄປດ້ວຍຄວາມເບີກບານມ່ວນຊື່ນ.