ຕອນບ່າຍວັນທີ 7 ພະຈິກ 2019 ຜ່ານມານີ້ ໂຮງຮຽນມັດທະຍົມສຶກສາສົມບູນວຽງຄຳ ໄດ້ມີພິທີເປີດງານກິລາຕ້ານຢາເສບຕິດ ຄັ້ງທີ XIII ຂຶ້ນ ໂດຍການເຂົ້າຮ່ວມເປັນປະທານຂອງທ່ານ ຄຳສີ ຍົມມະລາດ ຫົວໜ້າພະແນກສຶກສາທິການ ແລະ ກິລາແຂວງ, ທ່ານ ໂຄສາຈານ ແສນທະວີໄຊ ຮອງເຈົ້າເມືອງປາກກະດິງ, ມີຫົວໜ້າຫ້ອງການສຶກສາທິການ ແລະ ກິລາເມືອງ, ຜູ້ອຳນວຍການໂຮງຮຽນ, ຄະນະພັດທະນາການສຶກສາ, ຄູອາຈານ ແລະ ນ້ອງນັກຮຽນເຂົ້າຮ່ວມຢ່າງເປັນຂະບວນຟົດຟື້ນ.

        ໃນພິທີໄດ້ຊົມການເດີນສວນສະໜາມຂອງກ້ອນກຳລັງນັກຮຽນ 27 ກ້ອນກຳລັງ ແລະ ຊົມການສະແດງສິລະປະຂອງນ້ອງນັກຮຽນຈຳນວນ 5 ລາຍການ, ມີ ເຕັ້ນແອໂຣບິກ 1 ລາຍການ, ມວຍລາຍລາວ 1 ລາຍການ ແລະ ຟ້ອນລວມໝູ່ 3 ລາຍການ. ອຳນວຍການຂອງໂຮງຮຽນໄດ້ລາຍງານວ່າ: ການຫ້າງຫາກະກຽມຈັດງານກິລາຄັ້ງນີ້ໄດ້ເລີ່ມຈັດຕັ້ງປະຕິບັດມາແຕ່ ເດືອນຕຸລາ ຜ່ານມາ ກິລາທີ່ຈະແຂ່ງຂັນ ມໍ1-ມໍ7 ປະກອບມີ 7 ປະເພດຄື: ບານເຕາະຟຸດຊໍ 7 ຄົນ, ບານສົ່ງ, ກະຕໍ້, ເປຕັ່ງ, ດຶງເຊືອກ, ຕີດອກປີກໄກ່ ແລະ ແລ່ນ-ລານ ແຕ່ລະປະເພດມີທັງ ຍິງ-ຊາຍ. ສຳລັບເດີ່ນ ແລະ ອຸປະກອນຮັບໃຊ້ໃນການແຂ່ງຂັນຄັ້ງນີ້ ແມ່ນມີຄວາມພ້ອມໃນທຸກດ້ານ ແລະ ນັກກິລາແຕ່ລະທີມຂອງຊັ້ນຮຽນກໍ່ໄດ້ມີການຝຶກຊ້ອມມາເປັນຢ່າງດີ ແລະ ພ້ອມທີ່ຈະແຂ່ງຂັນ.

      ການຈັດງານແຂ່ງຂັນກິລາຕ້ານຢາເສບຕິດຄັ້ງນີ້ແມ່ນເພື່ອປະຕິບັດການຮຽນ-ການສອນໃຫ້ຄົບ 3 ລັກສະນະ ແລະ 5 ຫຼັກມູນຂອງການສຶກສາ ແລະ ເປັນການສ້າງກິດຈະກຳໃຫ້ນັກຮຽນຮັກໃນການຫຼີ້ນກິລາ ຫ່າງໄກຢາເສບຕິດ ເພື່ອຮັກສານາມມະຍົດໂຮງຮຽນ ມ.ສ ວຽງຄຳ ເປັນໂຮງຮຽນປອດຢາເສບຕິດໄວ້ໃຫ້ໝັ້ນຄົງ.