​ໃນ​ວັນ​ທີ 28 ກັນຍາ ປີ 2019 ຢູ່​ບ້ານ​ນາ​ຈິກ ​ເມືອງ​ປາກ​ຊັນ ​ແຂວງ​ບໍລິ​ຄໍາ​ໄຊ ​ໄດ້​ຈັດ​ງານ​ບຸນ​ແຂ່ງຂັນ​ຊ່ວງ​ເຮືອ​ປະ​ຈໍາປີ​ ​ໂດຍ​ການ​ເຂົ້າ​ຮ່ວມ​ເປັນ​ປະ​ທານ​ເປີດ​ງານ​ບຸນ​ຂອງ ​ທ່ານ ບຸນ​ເພັງ ​ແກ້ວ​ບັນດິດ ​ເລຂາ​ພັກ​ບ້ານ-​ນາຍບ້ານໆ​ນາ​ຈິກ ແລະ ​ທ່ານ ອຈ ວິ​ໂລດ ​ເລືອ​ງຕະກູນ ອໍານວຍ​ການ ມສ ສີ​ທ່າ​ນາ​ໄຊ ມີ​ຄະນະ​ກໍາມະການ​ທີ່​ມາ​ຈາກ​ຫ້ອງການ​ສຶກສາ ​ແລະ ກິລາ​ເມືອງ​ປາກ​ຊັນ ພ້ອມ​ດ້ວຍຄະນະ​ຮັບຜິດຊອບ ຕະຫຼອດ​ຮອດ​ບັນດາ​ນັກ​ສີພາຍ​ທີ່ຢູ່​ພາຍ​ໃນເມືອງປາກຊັນ​ເຂົ້າ​ຮ່ວມ​ຢ່າງ​ຫຼວງ​ຫຼາຍ.

      ​​ການຈັດ​ງານ​ແຂ່ງຂັນ​ເຮືອ​ຊ່ວງປະ​ຈໍາ​ປີ ປະ​ເພດ 18-22 ສີພາຍ ​ໃນ​ປີ​ນີ້​ມີ​ທັງ​ໝົດ 15 ທີ​ມ ​​​ໄດ້​ແກ່: ​ເຈົ້າ​ພໍ່​ໃຈ​ເພັດ ບ້ານ​ທ່າ​ບໍ່, ສ່ຽວ​ກັນ​ແຕ່​ດົນ ບ້ານ​ອານຸສອນ​ໄຊ, ນ້ອງ​ໃໝ່​ໂນນ​ຈະ​ເລີ​ນ ບ້ານ​ປັດ​ຊຸມ, ວັງ​ຍາງ​ນາວາ ບ້ານ​ສີວິ​ໄລ, ​ເທບ​ມັງກອນ​ຟັງ I ​ແລະ II ບ້ານ​ສວນ​ສະຫວັນ, ​ເທບ​ສອນ​ໄຊ ບ້ານ​ອານຸສອນ​ໄຊ, ທິດາ​ດອນ​ຄູນ, ​ເຈົ້າ​ພໍ່​ສິງ​ດໍາ I ​ແລະ II ບ້ານ​ນໍ້າ​ງຽບ, ​ເຈົ້າ​ພໍ່​ຄໍາ​ຮຸ່ງ ບ້ານ​ຊົມ​ຊື່ນ ​ເມືອງ​ບໍລິ​ຄັນ, ນາງ​ຕາດ​ໄຮ​ໃຈ​ເພັດ, ກຸຫຼາບ​ແດງ ບ້ານກ້ວຍ​ອຸດົມ, ທິດາ​ຫຼາວ​ທອງ ບ້າ​ນາ​ຈິກ ​ແລະ ມສ ສີ​ທ່າ​ນາ​ໄຊ; ​ແບ່ງ​ອອກ​​ເປັນ 4 ສາຍ. 

     ການ​ແຂ່ງຂັນ​ຕົວ​ຈິງ​ໃນ​ຮອບ​ຊີງ​ຊະນະ​​ເລີດສາມາດ​ສະຫຼຸບ​ຜົນ​ການ​ແຂ່ງຂັນ ​ດັ່ງ​ນີ້: ທີ​ມທີ່​ໄດ້​ຊະນະ​ເລີດອັນ​ດັບ​ທີ I ​ເຈົ້າ​ພໍ່ສິງ​ດໍາ, ທີ II ສ່ຽວ​ກັນ​ແຕ່​ດົນ, ທີ III ​ເທບ​ສອນ​ໄຊ ​ແລະ ​ທີ IV ​ເຈົ້າ​ພໍ່​ຄໍາ​ຮຸ່ງ.