ສາວນັກຮົບເສື້ອຂາວ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງ ໂຊຄວາມເກັ່ງກ້າໃນການໂຍນໝາກລູກເຫຼັກ ສາມາດຄວ້າຂັນລາງວັນຊະນະເລີດ ການແຂ່ງຂັນກິລາເປຕັ່ງຂົງເຂດວັດທະນະທຳ-ສັງຄົມ ປະຈຳປີ 2017 ໃນຄະນະທີ່ທີມຊາຍທົ່ວໄປຜູ້ຄອງແຊ່ມໄດ້ແກ່ພະແນກສຶກສາທິການ - ກິລາ ແລະ ທີມການນຳໄດ້ແກ່ທີມພະແນກແຮງງານແລະ ສະຫວັດດີການສັງຄົມ

          ການແຂ່ງຂັນກິລາເປຕັ່ງມິດຕະພາບ ຂົງເຂດວັດທະນະທຳ - ສັງຄົມ ແຂວງບໍລິຄຳໄຊ ໄດ້ຈັດຂື້ນໃນວັນທີ 3 ມີນາ 2017 ຢູ່ທີເດີ່ນເປຕັງແຂວງບໍລິຄຳໄຊ ໂດຍການເປັນເຈົ້າພາບຂອງພະແນກແຮງງານ ແລະ ສະຫວັດດີການ-ສັງຄົມ, ລວມມີ 41 ທີມ ຈາກ 4 ພະແນກການ ເຂົ້າຮ່ວມຄື: ພະແນກແຮງງານ ແລະ ສະຫວັດດີການ-ສັງຄົມ, ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ພະແນກສາທາລະນະສຸກ ແລະ ພະແນກສຶກສາທິການ ແລະ ກິລາແຂວງ ໃນນັ້ນທີມການນຳຂອງແຕ່ລະພະແນກມີ 2 ທີມ, ທີມຊາຍທົ່ວໄປ 4 ທີມ ແລະ ທີມຍິງ 4 ທີມ ການແຂ່ງຂັນໄດ້ດຳເນີນໄປເປັນເວລາໜຶ່ງວັນເຕັມຜ່ານແຂ່ງຂັນທີມການນຳ ຊະນະເລີດໄດ້ແກ່ພະແນກແຮງງານ ແລະ ສະຫວັດດີການສັງຄົມ ອັນດັບສອງພະແນກສຶກສາທິການ ແລະ ກິລາ, ອັນດັບສາມໄດ້ແກ່ພະແນກ ຖວທ, ອັນດັບສີ່ ພະແນກສາທາລະນະສຸກ, ປະເພດທີມຊາຍທົ່ວໄປ  ຜ່ານການແຂ່ງຂັນເປັນພະແນກສຶກສາທິການແລະ ກິລາ ໄດ້ຄອງຊະນະເລີດ ໃນຂະນະທີ່ພະແນກສາທາໄດ້ຮອງຊະນະເລີດອັນດັບ, ທີ 3 ເປັນຂອງພະແນກສຶກສາ 5 ແລະ ທີ 4 ແມ່ນພະແນກສາທາ 5. ສຳລັບປະເພດຍິງທົ່ວໄປມີ 15 ທີມເຂົ້າຮ່ວມ ໃນຮອບຊິງຊະນະເລີດແມ່ນທີມພະແນກ ຖວທ ແຊ້ມເກົ່າ ທີ່ຜ່ານເຂົ້າໄປຊິງກັບທີມຍິງພະແນກສຶກສາ ການແຂ່ງຂັນໃນຮອບນີ້ເປັນໄປຢ່າງດຸເດືອດສູສີ ສູ້ກັນແຕ້ມຕໍ່ແຕ້ມ ແຕ່ເປັນທີມຍິງພະແນກ ຖວທ ທີ່ສາມາດເອົາຊະນະໄປໄດ້ຢ່າງວຸດວິດ 13/12 ຄະແນນ ໄດ້ແຊ້ມປະເພດຍິງໄປຄອງ, ທີ່ 2 ເປັນຂອງພະແນກສຶກສາ, ທີ່ 3 ເປັນຂອງທີມຍິງພະແນກ ຮສສ 1 ແລະ ທີ່ 4 ເປັນຂອງທີມຍິງພະແນກ ຮສສ 4.

          ການແຂ່ງຂັນກິລາເປຕັງຂົງເຂດວັດທະນະທຳ-ສັງຄົມ ປະຈຳປີ 2017 ໃນຄັ້ງນີ້ແມ່ນຈັດຂື້ນເພື່ອເປັນການສ້າງຂະບວນການເພື່ອຕ້ອນຮັບຊົມເຊີຍວັນສຳຄັນຕ່າງໆຂອງຊາດ, ຂອງພັກ ແລະ ເພື່ອຮັດແໜ້ນຄວາມສາມັກຄີ,ຮັກແພງ ລະຫວ່າງພະແນກການໃນຂົງເຂດວັດທະນະທຳ-ສັງຄົມ. ປະເພດຂອງຂວັນລາງວັນ ສຳລັບທີມທີຊະນະເລີດ ຈະໄດ້ຮັບຂັນພ້ອມເງີນສົດ 5 ແສນກີບ, ລາງວັນທີ 2 ຈະໄດ້ຮັບຂັ້ນ ແລະ ເງີນສົດ 4 ແສນກີບ, ລາງວັນທີ 3 ຈະໄດ້ຮັບເງີນສົດ 3 ແສນກີບ ແລະ ລາງວັນທີ 4 ຈະໄດ້ຮັບເງີນສົດ 2 ແສນກີບ. ໃນຮອບວຽນເຈົ້າພາບປີ 2018 ແມ່ນພະແນກ ຖວທ ໄດ້ຮັບກຽດເປັນເຈົ້າພາບ.