ຂຸນພົນນັກເຕະບານ ແຂວງຈຳປາສັກ ຍິງຈຸດໂທດແມ້ນກວ່າ ນັກກິລາຈາກແຂວງສະຫວັນນະເຂດ ເອົາຊະນະໄປ 5-3 ປະຕູ ຫຼັງຈາກໃນ 120 ນາທີ ທັງ 2 ທີມສະເໝີກັນ 1-1 ປະຕູ ສົ່ງຜົນໃຫ້ ແຂວງຈໍາປາສັກ ສາມາດປ້ອງກັນແຊ໋ມຫຼຽນຄຳ 3 ສະໄໝຊ້ອນ ພ້ອມທັງຮັບເງິນໂບນັດຈາກທ່ານປະທານສະຫະພັນແຂວງຈຳປາສັກ 50 ລ້ານກີບ. ສ່ວນສະຫວັນນະເຂດ ໄດ້ພຽງຫຼຽນເງິນ ແລະ ຫຼວງພະບາງ ໄດ້ຫຼຽນທອງໄປຄ້ອງຄໍ ໃນການແຂ່ງຂັນເຕະບານຊາຍ ງານມະຫາກຳກິລານັກຮຽນມັດທະຍົມສຶກສາທົ່ວປະເທດ ຄັ້ງທີ 6 ຫຼື ນົກກົກຄຳ ເກມ ທີ່ແຂວງບໍລິຄຳໄຊ ລະຫວ່າງວັນທີ 1-9 ກຸມພາ 2017. 

ການແຂ່ງຂັນເຕະບານຊາຍ ນັດຊີງຊະນະເລີດ ລະຫວ່າງທີມແຂວງຈຳປາສັກ ແຊ໋ມເກົ່າ 2 ສະ ໄໝ ພົບກັບ ແຂວງສະຫວັນນະເຂດ ໄດ້ມີຂຶ້ນໃນຕອນແລງວັນທີ 8 ກຸມພາ ຜ່ານມາ ທີ່ສະໜາມກິລາໂຮງຮຽນມັດທະຍົມສຶກສາສົມບູນ (ມສ) ສີທ່ານາໄຊ ເມືອງປາກຊັນ ແຂວງບໍລິຄຳໄຊ ໂດຍມີຄະນະນຳຂັ້ນແຂວງເຈົ້າພາບ ແລະ ກະຊວງສຶກສາທິການ ແລະ ກິລາ ພ້ອມດ້ວຍແຟນບານຂອງທັງ 2 ທີມ ແລະ ພໍ່-ແມ່ປະຊາຊົນຊາວແຂວງບໍລິຄຳໄຊ ເຂົ້າຮ່ວມຊົມ ແລະ ເຊຍ ຫຼາຍພັນຄົນ.

 ສຳລັບທີມແຊ໋ມເກົ່າ ຈຳປາສັກ, ທ່ານ ພູທອນ ສີເມືອງ ຫົວໜ້າຄູເຝິກໄດ້ໃຊ້ບໍລິການ ສິດທິເດດ ສີຫາວົງ ລົງເຝົ້າເສົາ. ສ່ວນ ສາຍຝົນ ໝື່ນກິດຕິລາດ ຫົວໜ້າທີມຄຸ່ມເກມໃນແດນຫຼັງ ແລະ ໃຫ້ ແກ້ວອຸດອນ ສຸນີວົງ ບັນຊາເກມບຸກກອງກາງໃນການຈ່າຍບານ ແລະ ກອງໜ້າເນັ້ນໃຫ້ ສົມລັກ ໄຊຍະຈັກ ແລະ ພອນໄຊ ທິບພະວົງ ຊ່ວຍກັນໄລ່ລ່າຕາໜ່າງ. ຂະນະທີ່ ທ່ານ ອຸລະ ນ້ອຍວິໄລ ກໍ່ໃຊ້ 11​ ຜູ້ຫຼິ້ນຕົວຫຼັກລົງສະໜາມລ່າຫຼຽນຄຳ ໂດຍເນັ້ນໃຫ້ ສັນຕິສຸກ ນ້ອຍວິໄລ ເປັນຜູ້ຮັກສາປະຕູ, ກອງຫຼັງໃຫ້ ວິໄລສັກ ໄຊຍະແສງ ຫົວໜ້າທີມຕັ້ງຮັບ, ອານຸລັກ ພົມສະຫວັນ ບັນຊາເກມແດນກາງ ແລະ ເອກະໄມ ລາດສະຈັກ ຢືນກອງໜ້າຕົວເປົ້າໄລ່ລ່າຕາໜ່າງ.

ພໍແຕ່ສ່ຽງໝາກວີດຂອງອາຈານ ຄຳສິງ ໄຊຍະວົງສີ ກຳມະການກາງສະໜາມເປົ່າດັງຂຶ້ນ ທັງສອງທີມກໍ່ເປີດເກມບຸກແລກກັນທັນທີ່ ແລະ ເກມກໍ່ດຳເນີນຈົນໄປເຖິງ 20 ນາທີ ກໍ່ເປັນຝ່າຍ ແຊ໋ມເກົ່າ ແຂວງຈຳປາສັກ ທີ່ໄດ້ປຽບກວ່າ ໂດຍເນັ້ນການຕໍ່ບານທີ່ແນ່ນອນ ແລະ ອາໃສການໂຍນບານເຂົ້າໜ້າປະຕູ ເພື່ອໄລ່ກົດດັນເກມຮັບຂອງແຂວງສະຫວັນນະເຂດ ແລະ ຈຳປາສັກ ໄດ້ບານຂຶ້ນດ້ານປີກຊ້າຍ ຄຳສະຫງ່າ ພິມມະສອນ ເປີດໂດ່ງໃຫ້ ນະລົງສິດ ຈັນທະລັງສີ ແຕ່ງເຂົ້າຊ້າຍຍິງເຕັມຂໍ້ ບານພຸ້ງໜີມື ສັນຕິສຸກ ນ້ອຍວິໄລ ຕຳຕາໜ່າງໄປຢ່າງສວຍງາມ ໃນນາທີ 28 ເຮັດໃຫ້ແຊ໋ມເກົ່າອອກນຳກ່ອນ 1-0 ປະຕູ. ຫຼັງຈາກນັ້ນ, ນັກເຕະສະຫວັນນະເຂດ ກໍ່ປັ້ນເກມຫຼິ້ນກັນໃໝ່ ໂດຍການເນັ້ນການຕໍ່ບານທີ່ແມ້ນຢຳສູ້ກັບ ຈຳປາສັກ ໄດ້ຢ່າງດຸເດືອດ ສ້າງຄວາມຕຶງຄຽດໃຫ້ກອງເຊຍທັງ 2 ທີມທີ່ນັ່ງກົ້ນບໍ່ຕິດຕັ່ງ ກ່ອນເວລາທີ່ເຫຼືອຈະຍິງປະຕູກັນເພີ່ມບໍ່ໄດ້ ຈົບເກມ ຈໍາປາສັກ ຍັງນຳຢູ່ 1-0 ປະຕູ.

            ກັບເຂົ້າມາແຂ່ງຂັນກັນຕໍ່ໃນເຄິ່ງເວລາທີ 2 ທັງ 2 ທີມຍັງໝັ້ນໃຈນັກເຕະ 11 ຕົວຈິງ ລົງສະໜາມປະທະກັນຄືເກົ່າ ແລະ ເປັນ ບຸນຄໍ້າ ສີດາວົງ ປີກຂວາ ແຂວງສະຫວັນນະເຂດ ໃຊ້ຄວາມສາມາດພາບານເຂົ້າໃນເຂດໂທດ ກອງຫຼັງແຂວງຈຳປາສັກ ດຶງເສື້ອພໍດີຕໍ່ໜ້າຕໍ່ຕາກຳມະການຕັດສິນ ຈຶ່ງເປົ່າໃຫ້ໄດ້ຕຸດໂທດທັນທີ່ ແລະ ເປັນ ທິດທະນົງ ລາຊາສັກ ຮັບໜ້າທີ່ສັງຫານບໍ່ພາດ ຊ່ວຍໃຫ້ສະຫວັນນະເຂດ ນຳຕີສະເໝີ 1-1 ປະຕູ ໃນນາທີ 56. ຈາກນັ້ນ 2 ທີມດັ່ງກ່າວ ກໍ່ເພີ່ມເກມບຸກ ແລະ ຫຼິ້ນບານໜັກເຂົ້າໃສ່ກັນຫຼາຍຈັງຫວະ ສົ່ງຜົນໃຫ້ມີການປະທະກັນເກີດມີນັກກິລາໄດ້ຮັບບາດເຈັບຫຼາຍຄົນ ແລະ ເກມກໍ່ດຳເນີນໄປຈົນເຖິງທ້າຍເກມ ກຳມະການໂຕະຕໍ່ເວລາພິເສດອອກໄປອີກ 4 ນາທີ ແຕ່ທັງ 2 ທີມກໍ່ຍັງເຈາະປະຕູກັນບໍ່ໄດ້ ຍັງສະເໝີກັນຢູ່ 1-1 ປະຕູ ເຮັດໃຫ້ທັງ 2 ທີມຕ້ອງມາດວນກັນຕໍ່ໃນການຕໍ່ເວລາພິເສດອີກ 30 ນາທີ ຫຼື ແຂ່ງຂັນກັນຕັ່ງລະ 15 ນາທີ. ໂດຍທັງ 2 ທີມໄດ້ມີການປັບປຸງກົນລະຍຸດເກມຫຼິ້ນຂອງໃຜລາວຫຼາຍຄັ້ງ ໂດຍສົ່ງນັກເຕະສຳຮອງລົງສະໜາມຊ່ວຍກັນ ແຕ່ກໍ່ຍັງບໍ່ສາມາດເຈາະປະຕູກັນໄດ້ເພີ່ມ ພໍດີຄົບການແຂ່ງຂັນ 120 ນາທີ ທັງ 2 ທີມຕ້ອງມາດວນຈຸດໂທດກັນ ແລະ ສະຫວັນນະເຂດ ຍິງບໍ່ເຂົ້າ 2 ຄົນ ປະກອບມີທ້າວ ບຸນປອນ ໄຊທານີ ຍິງໄປຊື່ຜູ້ຮັກປະຕູ ແລະ ເອກະໄມ ລາດຊະຈັກ ຍິງໄປຕຳຄານ. ສ່ວນຈຳປາສັກ ຍິງບໍ່ເຂົ້າພຽງ 1 ລູກ ຈາກທ້າວ ສົມລັກ ໄຊຍະຈັກ ສົ່ງຜົນໃຫ້ ຈຳປາສັກ ແຊ໋ມເກົ່າ 2 ສະໄໝ ເປັນຝ່າຍເອົາຊະນະໄປ 4-2 ປະຕູ ລວມຜົນໃນເກມການແຂ່ງຂັນເປັນ 5-3 ປະຕູ ສາມາດປ້ອງກັນແຊ໋ມໄວ້ໄດ້ອີກ 1 ສະໄໝ. ຂະນະທີ່ ອັນດັບທີ 3 ຕົກເປັນຂອງທີມແຂວງຫຼວງພະບາງ ທີ່ໄລ່ເອົາຊະນະ ແຂວງອັດຕະປື 2-1 ປະຕູ ໄດ້ຮັບຫຼຽນທອງໄປຄ້ອງຄໍ.

            ສຳລັບການແຂ່ງຂັນກິລາເຕະບານຊາຍ ໄດ້ດຳເນີນມາແຕ່ວັນທີ 27 ມັງກອນ ຫາ ວັນທີ 8 ກຸມພາ 2017, ເຊິ່ງມີທີມເຂົ້າຮ່ວມທັງໝົດ 15 ພາກສ່ວນ ປະກອບມີ 14 ແຂວງ ແລະ 1 ນະຄອນຫຼວງວຽງຈັນ ໂດຍແບ່ງອອກເປັນ 4 ກຸ່ມ ແຕ່ລະກຸ່ມແຂ່ງຂັນພົບກັນໝົດ ແລ້ວຄັດເອົາອັນດັບທີ 1-2 ຜ່ານເຂົ້າໄປຫຼິ້ນໃນຮອບຕໍ່ໄປ ໂດຍນຳໃຊ້ 2 ສະໜາມແຂ່ງຂັນ ຄື: ສະໜາມກິລາເຕະບານເມືອງປາກຊັນ ແລະ ສະໜາມກິລາເຕະບານ ມສ ສີທ່ານາໄຊ ເມືອງປາກຊັນ.