ທັບນັກຕົບສາວບານສົ່ງ ພະແນກສຶກສາທິການ ແລະ ກິລາ ແຂວງສະຫວັນນະເຂດ ສາມາດລ້າງຕາສາວພະແນກສຶກສາທິການ ແລະ ກິລາ ນະຄອນຫຼວງວຽງຈັນ ໄດ້ສຳເລັດຊະນະ 3-0 ເຊັດ ພາຍຫຼັງໃນຮອບຄັດເລືອກຖືກ ນະຄອນຫຼວງວຽງຈັນ ຊະນະ 3-0 ເຊັດ ມາເຊັ່ນກັນ ຄວ້າຫຼຽນຄໍາໄປຄອງ. ຂະ ນະທີ່ກິລາບານສົ່ງຫາດຊາຍຍິງ ນັດຊີງຊະນະເລີດ ສາວພະແນກສຶກສາທິການ ແລະ ກິລາ ແຂວງໄຊຍະບູລີ ຊະນະ ສາວນະຄອນຫຼວງວຽງຈັນ 2-0 ເຊັດ ໄດ້ຫຼຽນຄໍາ ໄປຄ້ອງຄໍ ງານມະຫາກໍາກິລານັກຮຽນມັດທະຍົມສຶກສາທົ່ວປະເທດ ຄັ້ງທີ 6 ຫຼື ນົກກົກຄຳ ເກມ ທີ່ແຂວງບໍລິຄຳໄຊ ຮັບກຽດເປັນເຈົ້າພາບ ລະຫວ່າງວັນທີ 1-9 ກຸມພາ 2017.

            ໃນຕອນບ່າຍວັນທີ 8 ກຸມພາ ຜ່ານມາ ທີ່ສະໜາມກິລາບານສົ່ງ ໂຮງຮຽນມັດທະຍົມສຶກສາ ສີທ່ານາໄຊ ເມືອງປາກຊັນ ແຂວງບໍລິຄຳໄຊ ໄດ້ມີການແຂ່ງຂັນບານສົ່ງ ນັດຊີງຊະນະເລີດ ປະເພດບານສົ່ງໃນຮົ່ມ ແລະ ຫາດຊາດ ທັງປະເພດຍິງ ແລະ ຊາຍ 4 ຫຼຽນຄຳ ສຳລັບບານສົ່ງໃນຮົ່ມ ທີມຍິງ ເປັນການພົບກັນລະຫວ່າງ ຫຼານສາວພໍ່ກະດວດ ສະຫວັນນະເຂດ ພົບກັບ ນະຄອນຫຼວງວຽງຈັນ, ທີມຊາຍ ຫຼານຊາຍພໍ່ກະດວດເຊັ່ນກັນ ພົບກັບ ຫຼານຊາຍຂຸນເຈືອງ ແຂວງຊຽງຂວາງ ສ່ວນກິລາບານສົ່ງຫາດຊາຍ ປະເພດຍິງ ສາວນະຄອນຫຼວງວຽງຈັນ ພົບກັບ ສາວແຂວງໄຊຍະບູລີ ໃນນັດດັ່ງກ່າວ ມີກອງເຊຍແຕ່ລະແຂວງ ແລະ ພໍ່-ແມ່ປະຊາຊົນ ຕະຫຼອດຮອດແຂກຕ່າງປະເທດເຂົ້າຮ່ວມຊົມ ແລະ ເຊຍຢ່າງຫຼວງຫຼາຍ.

            ຜ່ານການແຂ່ງຂັນ ຜົນປາກົດວ່າ ບານສົ່ງໃນຮົ່ມຍິງ ຫຼານສາວພໍ່ກະດວດ ດິນແດນໄດໂນເສົາ ສາວສະຫວັນນະເຂດ  ສາມາດໂຊຟອມເກັ່ງໄລ່ເອົາຊະນະ ສາວນະຄອນຫຼວງວຽງຈັນ ໄປແບບຂາດຮອຍ 3-0 ເຊັດ ດ້ວຍຄະແນນ 25-23, 25-18 ແລະ 25-20 ຄະແນນ ຄວ້າຫຼຽນຄໍາ ໄປຄອງ ສ່ວນນະຄອນຫຼວງວຽງຈັນ ໄດ້ພຽງຫຼຽນເງິນ ແລະ ຫຼຽນທອງ ສາວໄຊຍະບູລີ, ປະເພດບານສົ່ງຫາດຊາຍຍິງ ສາວແຂວງໄຊຍະບູລີ ຊະນະ ສາວນະຄອນຫຼວງວຽງຈັນ ຂາດຮອຍເຊັ່ນກັນ 2-0 ເຊັດ ດ້ວຍຄະແນນ 21-16 ແລະ 21-14 ຄະແນນ ໄດ້ຫຼຽນຄໍາໄປຄ້ອງຄໍ ສ່ວນນະຄອນຫຼວງວຽງຈັນ ໄດ້ພຽງຫຼຽນເງິນ ແລະ ຫຼຽນທອງແມ່ນສາວສະຫວັນນະເຂດ. ບານສົ່ງໃນຮົ່ມ ແລະ ຫາດຊາຍ ນັດຊີງຫຼຽນຄຳ ລະຫວ່າງ ຫຼານຊາຍຂຸນເຈືອງ ຊຽງຂວາງ ໄລ່ໄປເອົາຊະນະ ແຂວງສະຫວັນນະເຂດ ດິນແດນໄດໂນເສົາ 3 ເຊັດລວດ ດ້ວຍຄະແນນ 25/19, 25/20 ແລະ 25/22 ເປັນແຊມໃນການແຂ່ງຂັນກິລາ ນົກກົກເກມ 2017, ສ່ວນຫຼຽນເງີນ ຕົກເປັນຂອງສະຫວັນນະເຂດ ແລະ ຫຼຽນທອງ ຕົກເປັນຂອງອັດຕະປື.

            ສຳລັບການແຂ່ງຂັນກິລາບານສົ່ງໃນຮົ່ມຍິງ ເປັນການຊິງຫຼຽນ ລະຫວ່າງ ຫຼານສາວພໍ່ກະດວດ ສະຫວັນນະເຂດ ພົບກັບ ນະຄອນຫຼວງວຽງຈັນ ຜົນການແຂ່ງຂັນ ຫຼານສາວພໍ່ກະດວດ ໄລ່ໄປເອົາຊະນະ ນະຄອນຫຼວງ 3/0 ເຊັດ ດ້ວຍຄະແນນ 25/23, 25/18 ແລະ 25/20 ເປັນເຈົ້າຂອງຫຼຽນ, ຫຼຽນເງີນຕົກເປັນຂອງນະຄອນຫຼວງ, ສ່ວນຫຼຽນທອງ ໄຊຍະບູລີ.