ທັບນັກກິລານັກຮຽນຂອງ ພະແນກສຶກສາທິການ ແລະ ກິລາ ນະຄອນຫຼວງວຽງຈັນ ຈາກສະໂມສອນດອກປີກໄກ່ ເຄທີ ສ້າງຜົນງານໄດ້ຢ່າງໂດດເດັ່ນ ກວາດແຊ໋ມຫຼຽນຄຳ ໄດ້ເຖິງ 7 ລາຍການ ກາຍເປັນຮີໂຣຊ່ວຍທັບນັກກິລານັກຮຽນ ນະຄອນຫຼວງວຽງຈັນ ສາມາດປ້ອງກັນແຊ໋ມເຈົ້າຫຼຽນຄຳ ສະໄໝທີ 5 ພ້ອມທັງສ້າງສະຖິຕິໃໝ່ໃຫ້ແກ່ວົງການກິລາ ດອກປີກໄກ່ ນະຄອນຫຼວງວຽງຈັນ ໃນງານກິລາ ນົກກົກຄຳ ເກມ 2017 ໃນໂອກາດທີ່ຄວ້າຫຼຽນຄຳ ຄອງຄໍໄດ້ຫຼາຍທີ່ສຸດ ໃນການແຂ່ງຂັນງານມະຫາກຳກິລານັກຮຽນມັດທະຍົມສຶກສາ ທົ່ວປະເທດ ຄັ້ງທີ 6 ຫຼື ນົກກົກຄຳ ເກມ ທີ່ແຂວງບໍລິຄຳໄຊ ຮັບກຽດເປັນເຈົ້າພາບ ລະຫວ່າງວັນທີ 1-9 ກຸມພາ 2017.

            ໃນຕອນເຊົ້າວັນທີ 8 ກຸມພາ ຜ່ານມາ ທີ່ສະໜາມກິລາຄົບວົງຈອນ ແຂວງບໍລິຄຳໄຊ ບ້ານຫົງໄຊ ເມືອງປາກຊັນ ໄດ້ມີພິທີປິດການແຂ່ງຂັນກິລາດອກປີກໄກ່ ງານກິລາ ນົກກົກຄຳ ເກມ 2017 ພາຍຫຼັງໄດ້ດຳເນີນການແຂ່ງຂັນມາແຕ່ວັນທີ 1 ກຸມພາ ຜ່ານມາ ໂດຍມີ 14 ແຂວງ ແລະ 1 ນະຄອນຫຼວງວຽງຈັນ ແລະ ມີການຊີງໄຊກັນທັງໝົດ 7 ຫຼຽນຄຳ ຈາກປະເພດທີມຊາຍ-ຍິງ, ທີມຄູ່ຊາຍ-ຍິງ, ດ່ຽວຊາຍ-ຍິງ ແລະ ທີມຄູ່ປະສົມ ບໍ່ມີພຽງ ແຂວງຜົ້ງສາລີ ແລະ ແຂວງຫຼວງນໍ້າເຂົ້າຮ່ວມ ໃນໂອກາດດັ່ງກ່າວ ກໍ່ໄດ້ມີການແຂ່ງຂັນຄູ່ຊີງຊະນະເລີດ 3 ລາຍການ ຄື: ປະເພດທີມຄູ່ ຍິງ ສາວນັກຮຽນນະຄອນຫຼວງວຽງຈັນ ພົບກັບ ເຈົ້າພາບ ແຂວງບໍລິຄຳໄຊ ສ່ວນປະເພດທີມຄູ່ຊາຍ ບ່າວນະຄອນຫຼວງວຽງຈັນ ພົບກັບ ບ່າວແຂວງໄຊຍະບູລີ ແລະ ປະເພດດ່ຽວຊາຍ ນະຄອນຫຼວງວຽງຈັນ ຊີງກັນເອງ ໂດຍມີການນຳແຂວງ ແລະ ພໍ່-ແມ່ປະຊາຊົນຊາວແຂວງບໍລິຄຳໄຊເຂົ້າຮ່ວມຊົມ ແລະ ເຊຍ.

            ຜ່ານການແຂ່ງຂັນ ຜົນປາກົດວ່າ ປະເພດທີມຄູ່ຍິງ ນາງ ມີ່ມີ່ ສີສົມຊື່ນ ແລະ ນາງ ອາພາພອນ ສອນນະລາດ ສອງສາວນະຄອນຫຼວງວຽງຈັນ ກໍ່ສາມາດສ້າງຜົນງານໃຫ້ທັບນັກກິລານັກຮຽນ ນະຄອນຫຼວງວຽງຈັນ ບໍ່ຜິດຫວັງ ໂຊຟອມເກັ່ງໄລ່ເອົາຊະນະ ສອງສາວເຈົ້າພາບ ແຂວງບໍລິຄຳໄຊ ນາງ ທິດສະກີ້ ແລະ ນາງ ເພັດມະນີ ໄປແບບຂາດຮອຍ 2-0 ເຊັດ ດ້ວຍຄະແນນ 21-13 ແລະ 21-11 ຄະແນນ  ໄດ້ຫຼຽນຄຳ ຄ້ອງຄໍຢ່າງສົມສັກສີ. ຂະນະທີ່ອີກ 2 ລາຍການດັ່ງກ່າວ ສຳລັບປະເພດດ່ຽວຊາຍ ທ້າວ ເກດຕິຍະ ແກ້ວໄຊ ຊະນະ ທ້າວ ວັນພະສອນ ສຸວັນນະແພງສີ 2-1 ເຊັດ ດ້ວຍຄະແນນ 21-16, 6-21 ແລະ 21-12 ຄະແນນ ສ່ວນປະເພດທີມຄູ່ຊາຍ ກໍ່ເປັນຄູ່ຂອງ ທ້າວ ດາວມີໄຊ ວໍລະສິງ ແລະ ທ້າວ ຣາຊະວົງ ພິຈິດ ນະຄອນຫຼວງວຽງຈັນ ຊະນະ ທ້າວ ເບັ້ນ ອິນຖາວອນ ແລະ ທ້າວ ນັດທະວຸດ ສີປະເສີດ ຈາກແຂວງໄຊຍະບູລີ ຂາດຮອຍ 2-0 ເຊັດ ດ້ວຍຄະແນນ 21-18 ແລະ 21-18 ຄະແນນ  ຄວ້າຫຼຽນຄຳ ຫຼຽນທີ 3 ໃຫ້ທັບນັກກິລາດອກປີກໄກ່ ນະຄອນຫຼວງວຽງຈັນ ລວມເປັນ 7 ຫຼຽນຄຳ ເຊິ່ງເປັນສະຖິຕິໃໝ່ ໃນການແຂ່ງຂັນກິລານັກຮຽນມັດທະຍົມສຶກສາ ທົ່ວປະເທດ ແລະ ເປັນປະຫວັດສາດຂອງກິລາດອກປີກໄກ່ ນະຄອນຫຼວງວຽງຈັນ.

            ໂອກາດດັ່ງກ່າວ, ທ່ານ ສີສະເກດ ພົມມະຫາໄຊ ຫົວໜ້າຄູເຝິກທັບນັກກິລານັກຮຽນດອກປີກໄກ່ ນະຄອນຫຼວງວຽງຈັນ ໃຫ້ສຳພາດວ່າ: ໃນການເຂົ້າຮ່ວມແຂ່ງຂັນດອກປີກໄກ່ ນົກກົກຄຳ ເກມ ຄັ້ງນີ້ ສົ່ງທັບນັກກິລານັກຮຽນດອກປີກໄກ່ ນະຄອນຫຼວງວຽງຈັນ ເຂົ້າຮ່ວມ 12 ຄົນ, ຍິງ 6 ຄົນ ລົງຫຼິ້ນຄົບ 7 ລາຍການ ເຊິ່ງໃນເບື້ອງຕົ້ນຄາດຫວັງພຽງ 4 ຫຼຽນຄຳ ແຕ່ຕົວຈິງພວກເຮົາກໍ່ສາມາດສ້າງຜົນງານໄດ້ລື່ນຄາດໝາຍ ກວາດລຽບ 7 ຫຼຽນຄຳ ຕໍ່ຜົນງານດັ່ງກ່າວຂໍຍົກຍ້ອງຊົມເຊີຍມາຍັງຄູເຝິກ ແລະ ນັກກິລາ ທຸກຄົນທີ່ໄດ້ຕັດສິນໃຈສູງ ແລະ ເອົາໃຈໃສ່ຕໍ່ການເຝິກແອບຟັງຄຳສັ່ງສອນຂອງຄະນະນຳ ແລະ ຄູເຝິກຈົນສາມາດສ້າງຜົນງານໄດ້ລື່ນຄາດໝາຍ ແລະ ຜົນງານຄັ້ງນີ້ ກໍ່ເປັນສະຖິຕິໃໝ່ໃຫ້ແກ່ວົງການກິລາດອກປີກໄກ່ ນະຄອນຫຼວງວຽງຈັນ ທີ່ສາມາດຄວ້າຫຼຽນຄຳໃນປະເພດກິລາດັ່ງກ່າວ ໄດ້ຫຼາຍທີ່ສຸດ ແລະ ເປັນຄັ້ງປະຫວັດສາດໃນວົງການກິລາດອກປີກໄກ່ ນັກຮຽນມັດທະຍົມສຶກສາ ທົ່ວປະເທດອີກດ້ວຍ ໃນນາມເປັນຄູເຝິກກໍ່ມີຄວາມພາກພູມໃຈເປັນຢ່າງສູງ ຂໍໃຫ້ເຊື່ອໝັ້ນວ່າຈະສືບຖ່າຍທອດຄວາມຮູ້ຄວາມສາມາດໃຫ້ຄົນຮຸ່ນໃໝ່ ເພື່ອສ້າງຝັນໃຫ້ທັບນັກກິລາດອກປີກໄກ່ ນະຄອນຫຼວງວຽງຈັນ ຮັກສາມູນເຊື້ອ ແລະ ສ້າງຜົນງານໃຫ້ໄດ້ຫຼາຍທີ່ສຸດໃຫ້ນະຄອນຫຼວງວຽງຈັນ.