ການແຂ່ງຂັນກິລາເປຕັງ ສະເຫຼີມສະຫຼອງວັນກໍາມະກອນສາກົນ ຄົບຮອບ 133 ປີ ໄດ້ຈັດຂຶ້ນໃນວັນທີ 2 ພຶດສະພາ 2019 ຢູ່ເດີ່ນກິລາເປຕັງຂອງແຂວງ ໂດຍການເຂົ້າຮ່ວມຂອງທ່ານ ດໍາລົງ ທັບລາດ ປະທານສະຫະພັນກໍາມະບານແຂວງບໍລິຄຳໄຊ ມີບັນດານັກກິລາທີ່ເປັນສະມາຊິກກໍາມະບານ ຈາກບັນດາຮາກຖານພະແນກການ, ກຳມະບານເມືອງ, ກົມກອງ ແລະ ອົງການຈັດຕັ້ງຂັ້ນຕ່າງໆ ເຂົ້າຮ່ວມ.

     ການແຂ່ງຂັນກິລາເປຕັງໃນຄັ້ງນີ້  ມີທີມກິລາເປຕັງທີເປັນສະມາຊິກກໍາມະບານເຂົ້າຮ່ວມແຂງຂັນທັງໝົດ ຈໍານວນ 124 ທີມ ໂດຍແບ່ງອອກເປັນ 3 ສາຍ ຄື: ສາຍຄະນະຮາກຖານຈໍານວນ 23 ທີມ, ສາຍຊາຍທົ່ວໄປ 67 ທີມ ແລະ ສາຍຍິງທົ່ວໄປ 34 ທີມ, ການແຂ່ງຂັນກິລາເປຕັງໃນຄັ້ງນີ້ ນອກຈາກເປັນການແຂ່ງຂັນປະຈໍາປີແລ້ວ ກໍ່ຍັງເປັນການສ້າງຂະບວນການສະເຫຼີມສະຫຼອງວັນສໍາຄັນຕ່າງໆຂອງຊາດຕື່ມອີກ ເປັນຕົ້ນແມ່ນຂໍ່ານັບຊົມເຊີຍວັນສ້າງຕັ້ງແຂວງບໍລິຄໍາໄຊ ຄົບຮອບ 35 ປີ ທັງເປັນການຮັດແໜ້ນຄວາມສາມັກຄີ ແລະ ແລກປ່ຽນທັກສະການຫຼິ້ນກິລາໃນດ້ານຕ່າງໆຮ່ວມກັນໃຫ້ແໜ້ນແຟ້ນຍິ່ງຂຶ້ນກ່ວາເກົ່າ, ການແຂ່ງຂັນຈະໄດ້ດຳເນີນແຕ່ວັນທີ 2-3 ພຶດສະພາ ໄປເປັນເວລາ 2 ວັນເຕັມຈຶ່ງສຳເລັດ, ສຳລັບຂອງຂວັນລາງວັນແມ່ນ: ລາງວັນຊະນະເລີດຈະໄດ້ຮັບຂັນ 1 ໜ່ວຍພ້ອມເງິນສົດ 500.000, ອັນດັບ 2 ໄດ້ຮັບຂັນ 1 ໜ່ວຍ ພ້ອມເງິນສົດ 400.000 ແລະ ອັນດັບທີ 3 ໄດ້ຮັບເງິນສົດ 300.000.