ກອງປະຊຸມປຶກສາຫາລືການກະກຽມສ້າງຂະບວນການແຂ່ງຂັນກິລາ ເພື່ອສະເຫຼີມສະຫຼອງວັນກຳມະກອນສາກົນ ຄົບຮອບ 133 ປີ ໄດ້ຈັດຂຶ້ນໃນຕອນເຊົ້າຂອງວັນທີ 24 ເມສາ 2019 ຢູ່ຫ້ອງປະຊຸມຂອງຫ້ອງວ່າການປົກຄອງແຂວງ ໂດຍການເປັນປະທານຂອງທ່ານ ດຳລົງ ທັບລາດ ປະທານສະຫະພັນກຳມະບານແຂວງບໍລິຄຳໄຊ, ມີຮາກຖານຈາກພະແນກການອ້ອມຂ້າງແຂວງ ແລະ ພະນັກງານວິຊາການທີ່ຂ້ອງເຂົ້າຮ່ວມ.

          ການສ້າງຂະບວນການແຂ່ງຂັນກິລາເພື່ອສະເຫຼີມສະຫຼອງວັນກຳມະກອນສາກົນ ຄົບຮອບ 133 ປີ ( 1 ພຶດສະພາ 1886 – 1 ພຶດສະພາ 2019 ) ເຊິ່ງການແຂ່ງຂັນກິລາໃນຄັ້ງນີ້ ເປັນປະເພດກິລາເປຕັງ ໃນນັ້ນໄດ້ແບ່ງອອກເປັນ 3 ປະເພດດ້ວຍກັນຄື: ປະເພດທີມຄະນະຮາກຖານກຳມະບານ, ທີມຊາຍທົ່ວໄປ ແລະ ທີມຍິງທົ່ວໄປ, ໂດຍແບ່ງເປັນທີມລະ 2 ຄົນ ຄາດວ່າຈະມີທີມເຂົ້າຮ່ວມທັງໝົດ 120 ທີມ ໃນພິທີ ຍັງໄດ້ມີການປະກອບຄຳເຫັນ ເພື່ອປຶກສາຫາລືກັນໃນການກະກຽມງານຄັ້ງນີ້ໃຫ້ໄດ້ຮັບຜົນສຳເລັດຕາມຄາດໝາຍທີ່ວາງໄວ້, ທັງນີ້ກໍ່ເພື່ອເຮັດໃຫ້ການຈັດຕັ້ງສະເຫຼີມສະຫຼອງວັນກຳມະກອນສາກົນ ຄົບຮອບ 133 ປີ ມີເນື້ອໃນຄວາມໝາຍເລິກເຊິ່ງ, ທັງເປັນການສ້າງຄວາມສາມັກຄີເຊິ່ງກັນ ແລະ ກັນ, ເຕັມໄປດ້ວຍເນື້ອໃນທີ່ມີຄວາມໝາຍສຳຄັນ ເລິກເຊິ່ງ ແລະ ໜັກແໜ້ນ. ງານດັ່ງກ່າວຈະຈັດຂຶ້ນໃນວັນທີ 2 ຫາ 3 ພຶດສະພາ 2019 ທີ່ຈະມາເຖິງນີ້ ຢູ່ທີ່ເດີ່ນກິລາຄົບວົງຈອນຂອງແຂວງ.