ນັກກິລາໝາກເສິກແຂວງບໍລິຄຳໄຊ ເຈົ້າພາບ ກວາດ 5 ຫຼຽນຄຳ 6 ຫຼຽນເງິນ ແລະ 2 ຫຼຽນທອງ  ຈາກການຊີງໄຊກັນທັງໝົດ 12 ຫຼຽນຄຳ ໃນງານມະຫາກຳກິລານັກຮຽນມັດທະຍົມສຶກສາທົ່ວປະເທດ ຄັ້ງທີ 6 ຫຼື “ນົກກົກຄຳ ເກມ 2017” ທີ່ແຂວງບໍລິຄຳໄຊ ລະຫວ່າງທີ 1-9 ກຸມພານີ້.

ການແຂ່ງຂັນກິລາໝາກເສິກ ງານມະຫາກຳກິລານັກຮຽນຊັນມັດທະຍົມສຶກສາທົ່ວປະເທດ ຄັ້ງທີ 6 ໄດ້ທໍາການແຂ່ງຂັນກັນ ໃນລະຫວ່າງວັນທີ 3-6 ກຸມພາ ຜ່ານມາ ທີ່ສູນໄອຊີທີ ແຂວງບໍລິຄຳໄຊ, ໂດຍມີບັນດາຄະນະສະຫະພັນ, ກຳມະການຕັດສິນ, ຄູເຝິກ ແລະ ນັກກິລາ 8 ແຂວງໃນຂອບເຂດທົ່ວປະເທດເຂົ້າຮ່ວມ.

ສະເພາະການແຂ່ງຂັນກິລາດັ່ງກ່າວນີ້, ມີນັກກິລາເຂົ້າຮ່ວມການແຂ່ງຂັນທັງໝົດ 57 ຄົນ, ຍິງ 27 ຄົນ ຈາກ 8 ແຂວງໃນຂອບເຂດທົ່ວປະເທດເຂົ້າຮ່ວມ, ເມື່ອທຽບໃສ່ງານມະຫາກຳກິລານັກຮຽນມັດທະຍົມສຶກສາທົ່ວປະເທດ ຄັ້ງທີ 5 ປີ 2014 ທີ່ແຂວງຈຳປາສັກ ແມ່ນເພີ່ມຂຶ້ນ 3 ຄົນ, ຍິງ 1 ຄົນ, ເຊິ່ງທຳການແຂ່ງຂັນກັນ 12 ລາຍການ ຫຼື ການຊີງໄຊກັນທັງໝົດ 12 ຫຼຽນຄຳ, 12 ຫຼຽນເງິນ ແລະ 12 ຫຼຽນທອງ ຄື: ດ່ຽວຍິງ ບຣິຕສ໌ 3 ນາທີ, ດ່ຽວຊາຍ ບຣິຕສ໌ 3 ນາທີ, ດ່ຽວຍິງ ຣາປິດ 10 ນາທີ, ດ່ຽວຊາຍ ຣາປີດ 10 ນາທີ, ດ່ຽວຍິງ ຣາປິດ 20 ນາທີ, ດ່ຽວຊາຍ ຣາປິດ 20 ນາທີ, ທີມຍິງ 2 ຄົນ ບຣິຕສ໌ 3 ນາທີ, ທີມຊາຍ 2 ຄົນ ບຣິຕສ໌ 3 ນາທີ, ທີມຍິງ 2 ຄົນ ຣາປິດ 10 ນາທີ, ທີມຊາຍ 2 ຄົນ ຣາປິດ 10 ນາທີ, ທີມປະສົມ ຊາຍ 2 ຄົນ ຍິງ 2 ຄົນ ບຣິຕສ໌ 5 ນາທີ ແລະ ທີມປະສົມຊາຍ 2 ຄົນ ຍິງ 2 ຄົນ ບຣິທສ໌  10 ນາທີ.

     ຜ່ານການແຂ່ງຂັນຜົນປາກົດວ່າ ນັກກິລາແຂວງບໍລິຄໍາໄຊ ກວາດມາໄດ້ກວາດ 5 ຫຼຽນຄຳ, ຈາກນາງ ຊົວລີ ປົວຫື ລາຍການດ່ຽວຍິງ ຣາປີດ 20 ນາທີ,  ນາງ ລີຊົງ ແລະ ນາງ ມິດິ ສິວົງ ລາຍການທີມຍິງ 2 ຄົນ ບຣິດ 3 ນາທີ, ທ້າວ ຄອນສະຫວັນ  ແສງເລກ ແລະ ທ້າວ ບົວລະພາ ເທບຄຳເຮືອງ ລາຍການທີມຊາຍ 2 ຄົນ ບຣິດ 3 ນາທີ, ນາງ ຊົວລີ ປົວຫື ແລະ ນາງ ຄູນຄຳໂພທິລາດ  ລາຍການທີມຍິງ 2 ຄົນ ຣາປີດ 10 ນາທີ  ແລະ ທີມປະສົມທານສະເຟີແຈັດ ຍິງ+ຊາຍ ທ້າວ ບົວລະພາ ເທບຄຳເຮືອງ, ທ້າວ ຄອນສະຫວັນ ແສງເລກ,  ນາງ ຄູນຄໍາ ແລະ  ນາງ ຊົວລີ ປົວຫື. ນອກຈາກນີ້, ຍັງຍາດມາໄດ້ 6 ຫຼຽນເງິນ ແລະ 2 ຫຼຽນທອງ.

    ສ່ວນນະຄອນຫຼວງວຽງຈັນ ຍາດມາໄດ້ 2 ຫຼຽນຄຳ, 2 ຫຼຽນເງິນ  ແລະ 3 ຫຼຽນທອງ; ຈຳປາສັກ 2 ຫຼຽນຄຳ, 2 ຫຼຽນເງິນ; ຫຼວງພະບາງຍາດໄດ້ 1 ຫຼຽນຄຳ, 1 ຫຼຽນເງິນ ແລະ 2 ຫຼຽນທອງ; ອຸດົມໄຊ ຍາດມາໄດ້ 1 ຫຼຽນຄຳ ແລະ 2 ຫຼຽນທອງ; ໄຊສົມບູນ ຍາດໄດ້ 1 ຫຼຽນຄຳ ແລະ 1 ຫຼຽນທອງ; ອັດຕະປື ໄດ້ 1 ຫຼຽນເງິນ ແລະ 2 ຫຼຽນທອງ ແລະ ແຂວງເຊກອງ ບໍ່ໄດ້ຈັກຫຼຽນ.