ຕາມຄວາມຄາດໝາຍ ທັບນັກກິລາກະຕໍ້ ແຂວງສະຫວັນນະເຂດ ຄ້ວາ 2 ຫຼຽນຄຳ ສຸດທ້າຍ ໃນປະເພດທີມຊຸດຍິງ-ຊາຍ ແລະ ເປັນຫຼຽນຄຳທີ 5 ຂອງທັກນັກກິລາກະຕໍ້ແຂວງສະຫວັນນະເຂດ ປິດສາກງານມຫະກຳກິລານັກຮຽນມັດທະຍົມສຶກສາ ທົ່ວປະເທດ ຄັ້ງທີ 6 ຫຼື ນົກກົກຄຳ ເກມ 2017 ທີ່ແຂວງບໍລິຄຳໄຊ ເປັນເຈົ້າພາບ ລະຫວ່າງວັນທີ 1-9 ກຸມພາ 2017

ໃນຕອນເຊົ້າວັນທີ 8 ກຸມພາ ຜ່ານມາ ທີ່ສະໜາມກິລາກະຕໍ້ ໂຮງຮຽນ ມສ ສີທ່ານາໄຊ ເມືອງປາກຊັນ ແຂວງບໍລິຄຳໄຊ ໄດ້ມີການແຂ່ງຂັນກິລາກະຕໍ້ ຮອບຊີງຊະນະເລີດ ໃນປະເພດທີມຊຸດຍິງ-ຊາຍ ໃນງານນົກກົກຄຳ ເກມ 2017.

ສຳລັບທີມຊຸດຍິງ ເປັນການພົບກັນ ລະຫວ່າງ ທີມແຂວງບໍລິຄຳໄຊ ເຈົ້າພາບ ພົບກັບ ທີມແຂວງສະຫວັນນະເຂດ ຜ່ານການແຂ່ງຂັນຜົນປາກົດວ່າ ສະຫວັນນະເຂດ ເປັນຝ່າຍເອົາຊະນະໄປ 2-1 ຄູ່ ຄວ້າຫຼຽນຄຳ ທີ 4 ໃຫ້ທັບນັກກິລາກະຕໍ້ແຂວງສະຫວັນນະເຂດ ສ່ວນ  ບໍລິຄຳໄຊ ໄດ້ຫຼຽນເງິນ ຂະນະທີ່ ຫຼຽນທອງ ຮ່ວມໄດ້ແກ່ ນະຄອນຫຼວງວຽງຈັນ ແລະ ແຂວງຊຽງຂວາງ.

ສ່ວນທີມຊຸດຊາຍ ເປັນການໂຄຈອນມາພົບກັນ ລະຫວ່າງ ທີມແຂວງສະຫວັນນະເຂດ ທີມເຕັງ 1  ພົບກັບ ທີມນະຄອນຫຼວງວຽງຈັນ ທີມເຕັງ 2  ເຊິ່ງທັງ 2 ທີມ ເຄີຍພົບກັນມາແລ້ວ ໃນປະເພດທີມຄູ່ໃນຮອບຊີງຊະນະເລີດ ແລະ ກໍ່ເປັນ ສະຫວັນນະເຂດ ທີ່ຄວ້າຫຼຽນຄຳໄປຄອງ. ຜ່ານການແຂ່ງຂັນຜົນປາກົດວ່າ ເປັນໄປຕາມຄວາມຄາດໝາຍຂອງຜູ້ຊົມຜູ້ເຊຍ ເມື່ຶອທີມສະຫວັນນະເຂດ ເປັນຝ່າຍເອົາຊະນະໄປ 2-0 ຄູ່  ຄວ້າຫຼຽນຄຳ ໄປຄອງ ແລະ ເປັນຫຼຽນຄຳຫຼຽນທີ 5 ໃຫ້ທັບນັກກິລາກະຕໍ້ແຂວງສະຫວັນນະເຂດ ປິດສາກງານມຫະກຳກິລານັກຮຽນມັດທະຍົມສຶກສາ ທົ່ວປະເທດ ຄັ້ງທີ 6  ສ່ວນຫຼຽນເງິນໄດ້ແກ່ນະຄອນຫຼວງວຽງຈັນ  ຂະນະທີ່ ຫຼຽນທອງ ຮ່ວມໄດ້ແກ່ ແຂວງບໍລິຄຳໄຊ ແລະ ແຂວງຄຳມ່ວນ.

ສຳລັບຜົນງານຂອງທັບນັກກິລາກະຕໍ້ແຂວງສະຫວັນນະເຂດໃນການເຂົ້າຮ່ວມງານມຫະກຳກິລານັກຮຽນມັດທະຍົມສຶກສາ ທົ່ວປະເທດ ຄັ້ງທີ 6  ຫຼື ນົກກົກຄຳ ເກມ 2017 ແມ່ນລື່ນຄາດໝາຍ ໂດຍສາມາດຍາດມາໄດ້ແລ້ວ 5 ຫຼຽນຄຳ ແລະ 1 ຫຼຽນເງິນ ຖືວ່າເກີນຄາດໝາຍທີ່ຕັ້ງໄວ້ທີ 2 ຫຼຽນຄຳ 2 ຫຼຽນເງິນ ແລະ 2 ຫຼຽນ ທອງ ໂດຍ 5 ຫຼຽນຄຳ ໄດ້ຈາກ ປະເພດທີມດ່ຽວຊາຍ, ປະເພດທີມຄູ່ຊາຍ-ຍິງ ແລະ ທີມຊຸດຊາຍ-ຍິງ   ສ່ວນ 1 ຫຼຽນ ເງິນ ໄດ້ຈາກ ປະເພດທີມດ່ຽວຍິງ ຫຼັງເສຍໃຫ້ ບໍລິຄຳໄຊ ໃນຮອບຊີງຫຼຽນຄຳ

ສຳລັບການແຂ່ງຂັນກິລາກະຕໍ້ ໃນການເຂົ້າຮ່ວມງານມຫະກຳກິລານັກຮຽນມັດທະຍົມສຶກສາ ທົ່ວປະເທດ ຄັ້ງທີ 6  ຫຼື ນົກກົກຄຳ ເກມ 2017 ແມ່ນເລີ່ມທຳການແຂ່ງຂັນມາແຕ່ວັນທີ 28 ມັງກອນ ຈົນຮອດວັນທີ 8 ກຸມພາ 2017 ຈຶ່ງສຳເລັດລົງ ສ່ວນຜົນການສະຫຼຸບຫຼຽນ ຢ່າງເປັນທາງການຈະລາຍງານຕາມພາຍຫຼັງ .