ກິລາແລ່ນ-ລານ ລາຍການເຕັ້ນຍາວຍິງ ແລະ ແລ່ນ 4 × 400 ແມັດຍິງ ບໍລິຄຳໄຊເຈົ້າພາບສ້າງຜົນງານໄດ້ດີເກີນຄາດຄວ້າຫຼຽນຄຳໄດ້ອີກ 2 ຫຼຽນມາໄດ້ ໃນງານມະຫາກຳກິລານົກກົກຄຳເກມ 2017.

          ການແຂ່ງຂັນຮອບຊິງຊະນະເລີດລາຍການເຕັ້ນຍາວຍິງໄດ້ຈັດຂື້ນທີ່ 6 ກຸມພາຢູ່ທີ່ເດີ່ນໂຮງຮຽນມັດທະ ຍົມສົມບູນສີທ່ານາໄຊ ມີນັກກິລາ 10 ຄົນ, ຈາກ 8 ແຂວງເຂົ້າຮ່ວມ, ນັກກິລາແຕ່ລະຄົນ ຕ້ອງໄດ້ເຕັ້ນຍາວທັງໝົດ 3 ຄັ້ງ ເພື່ອເລືອກເອົາສະຖິຕິດີທີ່ສຸດ 3 ອັນດັບທຳອິດ, ການແຂ່ງຂັນໃນຮອບທໍາອິດ ບໍລິຄຳໄຊເຈົ້າພາບ ສ້າງຜົນງານໄດ້ດີ ສ້າງສະຖິຕິເປັນອັນດັບ 1 ຮ່ວມກັບນັກກິລານະຄອນຫຼວງວຽງຈັນ ດ້ວຍໄລຍະຍາວ 4,59 ແມັດ, ໃນຮອບທີ່ 2 ແລະ 3 ຕ່າງຝ່າຍຕ່າງທຳລາຍສະຖິຕິທີ່ເຮັດໄວ້ໃນຮອບທຳອິດບໍ່ໄດ້ ຕ້ອງໄດ້ໃຊ້ສະຖິຕິລວມ ໃນແຕ່ລະຮອບມາຕັດສິນຫາຜູ້ຊະນະ ເປັນນັກກິລາສາວນ້ອຍບໍລິຄຳໄຊ ນາງ ໄຂມາ ໂພນຍະໄຊ ທີ່ທຳສະຖິຕິໄດ້ດີກ່ອນໄດ້ຫຼຽນຄຳໄປຄອງ, ຫຼຽນເງີນຕົກເປັນຂອງນະຄອນຫຼວງ ນາງ ພິດສະໄໝ ໄຊຍະບູນ ແລະ ທີ່ສາມໄດ້ຫຼຽນທອງແມ່ນແຂວງຫົວພັນ ນາງ ສອງ ວັນຄຳເຮືອງ ທຳສະຖິຕິເຕັ້ນຍາວໄດ້ 4,32 ແມັດ.

ການແຂ່ງຂັນຮອບຊິງຊະນະເລີດລາຍການແລ່ນ 4 ຄູນ 400 ແມັດຍິງ ໄດ້ຈັດຂື້ນໃນວັນດຽວກັນ ມີນັກກິລາຈາກ 5 ແຂວງເຂົ້າຮ່ວມ. ໃນລາຍການນີ້ເຕັງ 1 ແມ່ນ ສະຫວັນນະເຂດ ແລະ ເຕັງ 2 ນະຄອນຫຼວງວຽງຈັນ ເມື່ອການແຂ່ງຂັນໄດ້ເລີ່ມຂື້ນ ເຈົ້າພາບໄດ້ເຮັດໃຫ້ເຕັງ 1 ແລະ 2 ຕ້ອງແປກໃຈ ເພາະສາວນ້ອຍແຂວງບໍລິຄຳໄຊ ທີ່ນຳໜ້າເປັນຈ່າຝຸ່ງໃນສອງຮອບທຳອິດ ແຕ່ສະຫວັນນາເຂດກໍ່ບໍຍອມແພ້ງ່າຍໆເລັ່ງເຄື່ອງຂື້ນມາແຊງເປັນທີ່ 1 ໄດ້ໃນຮອບທີ່ 3, ໃນຮອບສຸດທ້າຍ ສາວນ້ອຍແດນກຸຫຼາບໄດ້ທຸ່ມສຸດກຳລັງເລັ່ງຂື້ນມານຳຕິດໆ ຈົນອີກສອງຮອ້ຍແມັດສຸດທ້າຍ ສາວນ້ອຍແດນກຸຫຼາບ ແຂວງບໍລິຄຳໄຊ ກໍ່ສາມາດນຳຂື້ນມາຕີຄູ່ສູສີກັບສະຫວັນນະເຂດໄດ້, ໃນໄລຍະ 100 ສຸດທ້າຍຕ່າງຝ່າຍຕ່າງເລັ່ງຄວາມໄວຢ່າງເຕັມທີ່ພະຍາຍາມໜີຄູ່ຕໍ່ສູໃຫ້ໄດ້ ແຕ່ເປັນບໍລິຄຳໄຊແລ່ນເຂົ້າເສັ້ນໄຊໄປກ່ອນ ດ້ວຍເວລາ 4’24”22 ໄດ້ຫຼຽນຄຳໄປຄອງ, ທີ່ສອງຫຼຽນເງີນເປັນຂອງສະຫວັນນະເຂດ ດ້ວຍເວລາ 4’30”22, ຫຼຽນທອງເປັນຂອງນະຄອນຫຼວງວຽງຈັນ ດ້ວຍເວລາ 4’34”23.