ການແຂ່ງຂັນກິລາເປຕັງ ເພື່ອສະເຫຼີມສະຫຼອງວັນສ້າງຕັ້ງແຂວງບໍລິຄຳໄຊ ຄົບຮອບ 35 ປີ (06 ມີນາ 1984 – 06 ມີນາ 2019) ພະແນກສຶກສາທິການ ແລະ ກິລາແຂວງຈຶ່ງໄດ້ຈັດການແຂ່ງຂັນຂຶ້ນໃນລະຫວ່າງວັນທີ 04-5 ​ມີນາ 2019 ຢູ່ທີ່ເດີ່ນກິລາເປຕັງຂອງແຂວງ ມາໃນຕອນບ່າຍຂອງວັນທີ 05 ມີນາ 2019  ໄດ້ສຳເລັດລົງຢ່າງຈົບງາມ.

ການແຂ່ງຂັນກິລາເປຕັງໃນຄັ້ງນີ້ ມີທີມກິລາເຂົ້າຮ່ວມທັງໝົດ 60  ທີມ ເຊິ່ງມາຈາກບັນດາເມືອງ, ພະແນກການ,ຫ້ອງການ, ກຳລັງປ້ອງກັນຊາດ-ປ້ອງກັນຄວາສະຫງົບ, ໂດຍໄດ້ແບ່ງອອກເປັນສອງປະເພດຄື: ທີມຊາຍທົ່ວໄປ ແລະ ຍິງທົ່ວໄປ ໃນນັ້ນ ທີມຊາຍທົ່ວໄປ ມີ 40 ທີມ ແລະ ທີມຍິງທົ່ວໄປມີ 20 ທີມ ເຊິ່ງບັນຍາກາດຂອງການແຂ່ງຂັນແມ່ນເຕັມໄປດ້ວຍຄວາມເບີກບານມ່ວນຊື່ນ ນັກກິລາໄດ້ຖືເອົາໂອກາດນີ້ ເປັນການແລກປ່ຽນຖອດຖອນບົດຮຽນດ້ານກິລາຮ່ວມກັນ ເຫັນໄດ້ຄວາມສາມັກຄີເຊິ່ງກັນ ແລະ ກັນ, ຫຼີ້ນກິລາເພື່ອສຸຂະພາບ, ມິດຕະພາບ. ນອກຈາກນັ້ນ ຍັງເປັນການຮັດແໜ້ນຄວາມສາມັກຄີຮັກແພງເຊີ່ງກັນ ແລະ ກັນລະຫວ່າງ ທີມຂອງຕົນ ແລະ ທີມອື່ນໆທີ່ເຂົ້າຮ່ວມແຂ່ງຂັນ, ຜ່ານການແຂ່ງຂັນມາເປັນເວລາ 2 ວັນເຕັມ ເປັນການຊີງຊະນະເລີດ ລະຫວ່າງ ທີມຍອດຊາຍເມືອງກຸຫຼາບ ສາມາດເອົາຊະນະທີມກອງບັນຊາການທະຫານແຂວງຢ່າງຫວຸດວິດ 11-10ຄະແນນ, ອັນດັບທີ 3 ​ຮ່ວມໄດ້ແກ່ທີມ ພະແນກການຕ່າງປະເທດແຂວງ ແລະ ທີມ ຄໍ 23 ກອງບັນຊາການທະຫານແຂວງ, ສຳລັບທີມຍິງທົ່ວໄປ ເປັນການຊິງກັນ ລະຫວ່າງ ທີມປກສແຂວງ 1 ສາມາດເອົາຊະນະພະແນກສຶກສາທິການ ແລະ ກິລາແຂວງ ໄປໄດ້ 11 ຕໍ່ 8 ຄະແນນ ແລະ ອັນດັບທີ 3 ຮ່ວມໄດ້ແກ່ທີມ ປກສແຂວງ 2 ແລະ ວິທະຍາໄລພຽນຈະເລີນ, ລາງວັນຊະນະເລີດໄດ້ຮັບຂັນ 1 ໜ່ວຍພ້ອມເງິນສົດ 500,000 ກີບ, ລາງວັນທີ 2 ຂັນ 1 ໜ່ວຍພ້ອມເງິນສົດ 400.000 ກີບ ແລະ ລາງວັນທີ 3 ຮ່ວມ ແມ່ນໄດ້ຮັບເງິນສົດລາງວັນລະ 150,000 ກີບ ເປັນກຽດມອບຂັວນລາງວັນປະເພດຕ່າງໆ ໂດຍແມ່ນທ່ານ ຄຳສີ ຍົມມະລາດ ກຳມະການພັກແຂວງ ຫົວໜ້າພະແນກສຶກສາທິການ ແລະ ກິລາແຂວງ ປະທານຈັດການແຂ່ງຂັນ.

ພາບ_ຂ່າວ: ວິນລີ່