ເຈົ້າ​ພາບ​ ແຂວງບໍ​ລິ​ຄຳ​ໄຊ ແລະ ແຂວງ​ສະ​ຫວັນ​ນະ​ເຂດ ​ແບ່ງຫຼຽນ​ຄຳປະ​ເພດ​ກະ​ຕໍ້ທີມ​​ດ່ຽວຍິງແລະ ຊາຍ ໃນ​​ງານ​ມະ​ຫະ​ກຳ​ກິ​ລາ​ນັກ​ຮຽນ​ມັດ​ທະ​ຍົມ​ສຶກ​ສາທົ່ວ​ປະ​ເທດ ຄັ້ງ​ທີ 6 ຫຼື ນົກ​ກົກ​ຄຳ ເກມ 2017 ທີ່​ແຂວງ​ບໍ​ລິ​ຄຳ​ໄຊ ລະ​ຫວ່າງວັນ​ທີ 1-9 ກຸມ​ພາ 2017 ພາຍຫຼັງປະ​ເພດ​ທີມດ່ຽວ​ຊາຍ ແຂວງ​ສະ​ຫວັນ​ນະ​ເຂດ ສາມາດເອົາ​ຊະ​ນະ ທີມນະ​ຄອຫຼວງວຽງ​ຈັນ 2-0 ເຊັດ. ຂະ​ນະ​ທີ່​ປະ​ເພດ​ດ່ຽວ​ຍິງ ​ແຂວງ​ບໍ​ລິ​ຄຳ​ໄຊ ເຈົ້າ​ພາບ ເອົາ​ຊະ​ນະ ສະ​ຫວັນ​ນະ​ເຂດ 2-0 ເຊັດ.

ໃນ​ຕອນແລງວັນ​ທີ 30 ມັງ​ກອນ ຜ່ານ​ມາ​ ທີ່​ສະ​ໜາມ​ກິ​ລາ​ກະ​ຕໍ້ ມ​ສ ສີ​ທ່າ​ນາ​ໄຊ ເມືອງປາກຊັນ ແຂວງບໍລິຄຳໄຊ ໄດ້​ມີ​ການ​ແຂ່ງ​ຂັນ​ກິ​ລາ​ກະ​ຕໍ້ປະ​ເພດ​ດ່ຽວຊາຍ-ຍິງຮອບ​ຊີງ​ຊະ​ນະ​ເລີດ, ເຊິ່ງໃນ​ປະ​ເພດທີມ​ດ່ຽວ​ຊາຍ ເປັນ​ການ​ພົບ​ກັນ​ລະ​ຫວ່າງ ແຂວງ​ສະ​ຫວັນ​ນະ​ເຂດ ພາຍຫຼັງໃນ​ຮອບ​ຮອງ​ຊະ​ນະ​ເລີດ (ຮອບ 4 ທີມສຸດທ້າຍ) ພິກ​ເກມເອົາ​ຊະ​ນະ​ແຂວງ​ຄຳ​ມ່ວນ 2-0 ເຊັດດ້ວຍ​ຄະ​ແນນ 24-22 ແລະ 21-18 ພົບ​ກັບ ນະ​ຄອນຫຼວງວຽງ​ຈັນ, ເຊິ່ງຮອບ​ຮອງ​ຊະ​ນະ​ເລີ​ດ ແມ່ນເອົາຊະ​ນະ​ແຂວງຫຼວງ​ພະ​ບາງ  2-0 ເຊັດດ້ວຍ​ຄະ​ແນນ 21-18 ແລະ 21-14 ຄະ​ແນນ. ​ຜ່ານ​ການ​ແຂ່​ງ​ຂັນໃນ​ຮອບ​ຊີງ​ຊະ​ນະ​ເລີດ​ຜົນ​ປາ​ກົດ​ວ່າທັບ​ນັກ​ກິ​ລາ​ກະ​ຕໍ້​ດ່ຽວ​ຊາຍສະ​ຫວັນ​ນະ​ເຂດ ສາ​ມາດ​ເອົາ​ຊະ​ນະ ທີມນະ​ຄອນຫຼວງວຽງ​ຈັນ 2-0 ເຊັດ ດ້ວຍ​ຄະ​ແນນ 21-16 ແລະ 21-10 ຄະ​ແນນ ຄວ້າຫຼຽນ​ຄຳ​ໄປ​ຄອງ​ໄດ້​ສຳ​ເລັດ ແລະ ເປັນຫຼຽນ​ຄຳຫຼຽນ​ ທຳ​ອິດຂອງ​ທັບ​ນັກ​ກິ​ລາ​ນັກ​ຮຽນ ​ແຂວງ​ສະ​ຫວັນ​ນະ​ເຂດ. ສ່ວນ​ອັນ​ດັບ​ທີ 3 ຮ່ວມ ​ແມ່ນ​ຕົກ​ເປັນ​ຂອງ​ທີມ ແຂວງຄຳມ່ວນ ແລະ ແຂວງຫຼວງ​ພະ​ບາງ.

ຂະ​ນະ​ທີ່​ປະ​ເພດ​​ທີມດ່ຽວ​ຍິງ ເປັນ​ການ​ພົບ​ກັນ​ລະ​ຫວ່າງ ແຂວງບໍ​ລິ​ຄຳ​ໄຊ ເຈົ້າ​ພາບ ພາຍຫຼັງໃນ​ຮອບ 4 ທີມ ສາມາດເອົາ​ຊະ​ນະ​ ທີມນະ​ຄອນຫຼວງວຽງຈັນ​ 2-0 ເຊັດດ້ວຍ​ຄະ​ແນນ 21-18 ແລະ 21-6 ພົບ​ກັບ ແຂວງ​ສະ​ຫວັນ​ນະ​ເຂດ, ເຊິ່ງໃນຮອບຮອງຊະນະເລີດສາມາດເອົາຊະນະທີມແຂວງຄຳ​ມ່ວນ 2-0 ດ້ວຍ​ຄະ​ແນນ 21-9 ແລະ 21-16. ຜ່ານ​ການ​ແຂ່ງ​ຂັນ​ປາ​ກົດ​ວ່າ ທັບ​ນັກ​ກິ​ລາ​ກະ​ຕໍ້​ຍິງ​ ແຂວງ​ບໍ​ລິ​ຄຳ​ໄຊ ກໍ່​ບໍ່​ໜ້ອຍ​ໜ້າ ສາ​ມາດ​ເອົາ​ຊະ​ນະແຂວງ​ສະ​ຫວັນ​ນະ​ເຂດ ​ ​2-0 ເຊັດ ດ້ວຍ​ຄະ​ແນນ 21-14 ແລະ 21-9 ຄະ​ແນນ ​ ຄວ້າຫຼຽນ​ຄຳມາ​ຄ​ອງ​ໄດ້​ສຳ​ເລັດ​, ເຊິ່ງເປັນຫຼຽ​ນ​ຄຳ​ທຳ​ອິດຂອງຊາວແຂວງບໍລິຄຳໄຊ. ສ່ວນ​ອັນ​ດັບ​ທີ​ 3 ຮ່ວມຕົກເປັນຂອງ​ແຂວງ​ຄຳ​ມ່ວນ ແລະ ນະ​ຄອນຫຼວງວຽງ​ຈັນ.