ເພື່ອເພີ່ມຄວາມສາມັກຄີ ແລະ ມິດຕະພາບ ກັບປະເທດບ້ານໄກ້ເຮືອນຄຽງ ແລະ ອີງຕາມຄຳເຊີນຂອງຈັງຫວັດບືງການ ປະເທດໄທ ໃນວັນທີ 01 ກັນຍາ 2018 ຜ່ານມານີ້, ຈໍ 642 ໄດ້ສົ່ງນັກກິລາ ແລະ ເຮືອຊ່ວງປະເພດ 30 ສີພາຍ ໃນນາມທະນູທອງ ເຂົ້າຮ່ວມງານແຂ່ງສີພາຍເຮືອຊ່ວງຢູ່ເທດສະບານຕຳບົນຫໍຄຳ, ອຳເພີເມືອງບືງການ, ຈັງຫວັດ ບືງການ ລາຊາອານາຈັກໄທ ເພື່ອຊິງຂັນຖ້ວຍພຣະຊະທານ ສົມເດັດພະເທບພະຣັດຕະນາຣັດສຸດາສະຍາມຣັດສຸດາຊຸກົມມາຣິ ຄັ້ງທີ 8 ປະຈຳປີ 2018 ເຊີ່ງມີເຮືອຊ່ວງປະເພດ 30 ສີ ພາຍເຂົ້າຮ່ວມແຂ່ງຂັນ ທັງໝົດ 16 ລຳ.

         ຜ່ານການແຂ່ງຂັນແບບປະກົບຄູ່ ດ້ວຍການຈົກສະຫຼາກແບ່ງສາຍ ຕາມຮູບແບບກິລາເຮືອຊ່ວງ, ຜ່ານການແຂ່ງຂັນ 1 ວັນ ຈົນຮອດຮອບ 2 ລຳເຂົ້າຊີງຊະນະເລີດ ໂດຍມີເຮືອ ທະນູທອງ ກອງພັນໃຫຍ່ 642 ພົບກັບເຮືອ ເຈົ້າພໍ່ດ່ານຂຸນແຜນ ບ້ານປາກທວາຍໃຕ້, ເມືອງທ່າພະບາດ, ແຂວງບໍລິຄຳໄຊ  ຜົນປະກົດວ່າ ເຮືອທະນູທອງ ກອງພັນໃຫຍ່ 642  ສາມາດເອົາຊະນະເຮືອຄູ່ຕໍ່ສູ້ຢ່າງສູສີ ແລະ ໄດ້ຮັບຂັນລາງວັນ ພ້ອມເງີນສົດ ຈຳນວນ 7,950,000 ກີບ ຫຼື 30,000 ບາດ ໄປຄອງ.