ການແຂ່ງຂັນກິລາເປຕັງ  ສະເຫຼີມສະຫຼອງວັນກໍາມະກອນສາກົນ ຄົບຮອບ 132 ປີ ໄດ້ຈັດຂຶ້ນ ໃນຕອນເຊົ້າວັນທີ 26 ເມສາ 2018 ຢູ່ທີເດີ່ນກິລາເປຕັງຂອງແຂວງ ໂດຍການເຂົ້າຮ່ວມຂອງທ່ານ ບຸນເສັງ ປະທໍາມະວົງ ຮອງເຈົ້າແຂວງ ບໍລິຄໍາໄຊ, ທ່ານ ດໍາລົງ ທັບລາດ ປະທານສະຫະພັນກໍາມະບານແຂວງ. ມີບັນດາ ນັກກິລາທີ່ເປັນສະມາຊິກກໍາມະບານ ຈາກບັນດາຮາກຖານ ພະແນກການ, ກົມກອງ, ອົງການຈັດຕັ້ງຂັ້ນຕ່າງໆ ເຂົ້າຮ່ວມ.

     ການແຂ່ງຂັນກິລາເປຕັງ ໃນຄັ້ງນີ້  ມີທີມກິລາເປຕັງທີເປັນສະມາຊິກກໍາມະບານເຂົ້າຮ່ວມແຂງຂັນທັງໝົດຈໍານວນ 114 ທີ່ມ ໂດຍແບ່ງອອກເປັນ 3 ສາຍຄື: ສາຍຄະນະຮາກຖານຈໍານວນ 32 ທີມ, ສາຍຊາຍທົ່ວໄປ 46 ທີມ ແລະ ສາຍຍິງທົ່ວໄປ 36 ທີມ, ການແຂ່ງຂັນກິລາເປຕັງໃນຄັ້ງນີ້ ນອກຈາກເປັນການແຂ່ງຂັ້ນປະຈໍາປີແລ້ວ ກໍ່ຍັງເປັນການສ້າງຂະບວນການສະເຫຼີມສະຫຼອງ ວັນສໍາຄັນຕ່າງໆຂອງຊາດຕື່ມອີກ ເປັນຕົ້ນແມ່ນຊົມເຊີຍຂໍ່ານັບຮັບຕ້ອນວັນສ້າງຕັ້ງແຂວງ ບໍລິຄໍາໄຊ ຄົບຮອບ 34 ປີ  ທັງເປັນການຫັດແໜ້ນຄວາມສາມັກຄີ  ແລະ ແລກປ່ຽນທັກສະການຫຼິ້ນກິລາໃນດ້ານຕ່າງໆຮ່ວມກັນໃຫ້ແໜ້ນແຟ້ນຍິ່ງຂຶ້ນກວ່າເກົ່າ.

ຜ່ານການແຂ່ງຂັນໃນໄລຍະເວລາ 2 ວັນເຕັມ ທີມທີ່ສາມາດສະຫຼຸບຜົນການແຂ່ງຂັນດັ່ງນີ້ ລາງວັນຊະນະເລີດອັນດັບ 1 ເພດຍິງໄດ້ແກ່ທີມ  ໂຮງຮຽນເຕັກນິກວິຊາຊີບແຂວງ ໄດ້ຮັບຂັນ 1 ໜ່ວຍພ້ອມເງິນສົດ 6 ແສນກີບ, ອັນດັບ 2 ໄດ້ແກ່ທີມ ພະແນກ ຖວທ ແຂວງ ໄດ້ຮັບຂັນ 1 ໜ່ວຍ ພ້ອມເງິນສົດ 5 ແສນກີບ ແລະ ອັນດັບທີ 3 ຮ່ວມ ພະແນກ  ຖ ວ ທ ແຂວງ ແລະ ສະພາປະຊາຊົນແຂວງ ໄດ້ຮັບເງິນສົດ ທີມລະ 2 ແສນກີບ, ປະເພດຊາວໝຸ່ມ ທົ່ວໄປອັນດັບ 1 ໄດ້ແກ່ທີມພະແນກ  ຊັບພະຍາກອນທໍາມະຊາດ ແລະ ສິງແວດລ້ອມແຂວງ ໄດ້ຮັບຂັນ 1 ໜ່ວຍພ້ອມເງິນສົດ 6 ແສນກີບ, ອັນດັບ 2  ສະພາປະຊາຊົນແຂວງ ໄດ້ຮັບຂັນ 1 ໜ່ວຍພ້ອມເງິນສົດ 5 ແສນກີບ ແລະ ອັນດັບ 3 ຮ່ວມ ທີມຊາວໜຸ່ມແຂວງ ແລະ ລັດວິສະຫະກິດນໍ້າປະປາແຂວງ   ໄດຮັບເງິນສົດ ທີມລະ 2 ແສນກີບ, ສ່ວນທີມຄະນະຮາກຖານ ອັນດັບທີ 1 ໄດ້ແກ່ທີມພະແນກ ຖວທ ແຂວງ ໄດ້ຮັບຂັນ 1 ໜ່ວຍພ້ອມເງິນສົດ 6 ແສນກີບ, ອັນດັບ 2   ພະແນກການຕ່າງປະເທດ ໄດ້ຮັບຂັນ 1 ໜ່ວຍພ້ອມເງິນສົດ 5 ແສນກີບ ແລະ ອັນດັບ 3 ຮ່ວມ ທີມພະແນກໄປສະນີ ໂທລະຄົມມະນາຄົມ ແລະ ການສື່ສານ ແລະ ພະແນກ ການເງິນແຂວງ   ໄດຮັບເງິນສົດ ທີມລະ 2 ແສນກີບ. ເປັນກຽດຂຶ້ນມອບຂອງຂວັນລາງວັນໃຫ້ກັບນັກກິລາແຕ່ລະປະເພດໃນຄັ້ງນີ້ ໂດຍແມ່ນ ທ່ານ ດໍາລົງ ທັບລາດ ປະທານ ສະຫະພັນກໍາມະບານແຂວງ.