ການແຂ່ງຂັນກິລາບານເຕະນັດຊິງຊະນະເລີດໃນງານມະຫາກຳກິລາທົ່ວແຂວງບໍລິຄຳໄຊ ຄັ້ງທີ 4 ທີ່ເມືອງປາກຊັນໄດ້ຮັບກຽດເປັນເຈົ້າພາບ ເຊິ່ງເປັນການພົບກັນລະຫວ່າງ ບໍລິສັດພອນແກ້ວ ກັບ ບ້ານສີສະອາດ, ໂດຍເປັນກຽດເຂົ້າຮ່ວມຂອງທ່ານ ບຸນມາ ບຸຈະເລີນ ຮອງເຈົ້າແຂວງບໍລິຄຳໄຊ ທັງເປັນປະທານຈັດງານໃນຄັ້ງນີ້, ທ່ານ ບຸນຍູ້ ພົມມະວົງສາ ເຈົ້າເມືອງປາກຊັນ ຮອງປະທານຈັດງານ, ມີບັນດາຄະນະປະຈຳພັກແຂວງ, ກຳມະການພັກແຂວງ, ເມືອງ ຕະຫຼອດຮອດພໍ່ແມ່ປະຊົນ ເຂົ້າຮ່ວມຊົມ-ຮ່ວມເຊຍ ຢ່າງເປັນຂະບວນຟົດຟື້ນ.

        ພໍແຕ່ເລີ່ມເກມໄດ້ບໍ່ພໍເທົ່າໃດ ກໍ່ເປັນຝ່າຍ ບໍລິສັດພອນແກ້ວ ເປີດເກມບຸກໃສ່ຢ່າງໜັກ ແລະ ເປັນຝ່າຍຄອງເກມໄດ້ເໜືອກວ່າ ມາໃນນາທີ 25 ໝາຍເລກ 30 ຄອນສະຫວັນ ກອງໜ້າຮ່າງໃຫຍ່ຈາກບໍລິສັດພອນແກ້ວ ໄດ້ໂອກາດຍິງແບບໂລ່ງໆ ແຕ່ຂ້າມຄານອອກໄປຢ່າງໜ້າເສຍດາຍ, ຕໍ່ມານາທີທີ່ 28 ຄອນສະຫວັນ ໄດ້ໂອກາດຍິງອີກຄັ້ງ ແຕ່ຕິດເຊັບຂອງຜູ້ຮັກສາປະຕູຝ່າຍກົງກັນຂ້າມ ຈົນມາໃນນາທີທີ່ 30 ຄອນສະຫວັນ ສາມາດຍິງປະຕູໄດ້ສຳເລັດ ຈາກການເປີດບານຂອງໝາຍເລກ 14 ຂັນມະນີ ເຮັດໃຫ້ ບໍລິສັດພອນແກ້ວຂຶ້ນນຳກ່ອນ 1 ປະຕູ, ຝ່າຍສີສະອາດກໍ່ມີໂອກາດຍິງປະຕູ 2 – 3 ຄັ້ງ ແຕ່ກໍ່ບໍ່ເປັນຜົນ ຈົນໝົດເຄິ່ງເວລາທຳອິດ ບໍລິສັດພອນແກ້ວ ນຳໄປກ່ອນ 1 - 0 ປະຕູ.

        ມາເຄິ່ງເວລາທີ່ສອງ ບໍລິສັດພອນແກ້ວ ຍັງຄອງເກມໄດ້ເໜືອກ່ວາຄືເກົ່າ ທັງສອງທີມຜັດປ່ຽນກັນເປີດເກມບຸກໃສ່ກັນຢ່າງໜັກ ແຕ່ເຮັດຫຍັງກັນບໍ່ໄດ້ ຈົນມາໃນຊ່ວງຕໍ່ເວລາພິເສດພຽງ 3 ນາທີ ຈາກການສົ່ງບານພາດຂອງກອງຫຼັງສີສະອາດ ເຮັດໃຫ້ກອງໜ້າຂອງບໍລິສັດພອນແກ້ວ ດັກບານໄດ້ ແລະ ຫຼຸດດ່ຽວໄປດວນກັບຜູ້ຮັກສາປະຕູ ແຕ່ໝາຍເລກ 17 ກໍ່ບໍ່ພາດ ຍິງປະຕູເຂົ້າໄປຢ່າງສວຍງາມ ເຮັດໃຫ້ບໍລິສັດພອນແກ້ວ ໜີຫ່າງອອກໄປເປັນ 2 ປະຕູຕໍ່ 0, ສີສະອາດ ກໍ່ພະຍາຍາມເຮັດສຸດຄວາມສາມາດ ແຕ່ບໍ່ຜ່ານກອງຫຼັງອັນໜ້ຽວແໜ້ນຂອງບໍລິສັດພອນແກ້ວໄປໄດ້ ຈົບເກມ ບໍລິສັດພອນແກ້ວ ເອົາຊະນະ ບ້ານສີສະອາດໄປໄດ້ 2 – 0 ປະຕູ ຄວ້າແຊັມຫຼຽນຄຳໄປຄອງໄດ້ສຳເລັດ. ສຳລັບອັນດັບທີ 3 ຫຼຽນທອງ ເປັນຂອງເມືອງປາກກະດິງ ທີ່ເອົາຊະນະ ທະຫານແຂວງ ໄປໄດ້ຈາກການຍິງຈຸດໂທດ 4 – 3 ປະຕູ.