ເພື່ອເປັນການຮັດແໜ້ນຄວາມສາມັກຄີ, ມິດຕະພາບ ສາຍພົວພັນລະຫວ່າງສອງກໍາລັງໃຫ້ໝັ້ນຄົງທະນົງແກ່ນ ແລະ ທັງເປັນການປະສານສົມທົບ ແລກປ່ຽນຄວາມຮູ້ປະສົບການໃນດ້ານວຽກງານຮັກສາຄວາມສະຫງົບ ຄວາມເປັນລະບຽບຮຽບຮ້ອຍຕາມຊາຍແດນ ລາວ-ໄທ, ການແລກປ່ຽນຂໍ້ມູນ-ຂ່າວສານ, ສິລະປະ, ວັດທະນະທໍາ, ການສ້າງຄວາມເຂົ້າໃຈຕໍ່ລະບຽບການວຽກງານຂອງດ່ານຂອງທັງສອງປະເທດ ກໍ່ຄືດ່ານຕໍາຫຼວດກວດຄົນເຂົ້າ-ອອກເມືອງ ສາກົນປາກຊັນ ແລະ ດ່ານ ຕມ ສາກົນ ຈັງຫວັດບຶງການ, ທັງເປັນການຂໍ່ານັບຮັບຕ້ອນໃຫ້ແກ່ວັນສໍາຄັນຕ່າງໆຂອງພັກຂອງຊາດກໍ່ຄື: ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 63 ປີ ( 22 ມີນາ 1955 – 22 ມີນາ 2018 ), ວັນສ້າງຕັ້ງກໍາລັງປ້ອງກັນຄວາມສະຫງົບ ຄົບຮອບ 57 ປີ (05 ເມສາ 1961 – 05 ເມສາ 2018) ທີ່ຈະໝູນວຽນມາຮອດອີກວາລະໜຶ່ງ, ໃນວັນທີ 07 ມີນາ 2018 ນີ້ ດ່ານຕໍາຫຼວດກວດຄົນເຂົ້າ-ອອກເມືອງ ປາກຊັນ ແຂວງ ບໍລິຄໍາໄຊ ໄດ້ຈັດກິດຈະກໍາແຂ່ງຂັນກິລາ ເຕະບານ (ຟຸດຊໍ) ມິດຕະພາບ ກັບ ດ່ານ ຕມ ສາກົນ ຈັງຫວັດບຶງການ ລາຊະອານາຈັກໄທ  ຂື້ນຢູ່ທີ່ສະໜາມກິລາຈາລະນາ, ເປັນກຽດຕ້ອນຮັບໂດຍ ທ່ານ ພັນຕີ ນາງ ບົວລອນ ຈັນທະບູນສຸກ ຫົວໜ້າດ່ານ ຕມ ສາກົນປາກຊັນ ແຂວງ ບໍລິຄໍາໄຊພ້ອມດ້ວຍຄະນະ, ນັກກິລາຝ່າຍ ດ່ານ ຕມ ສາກົນບຶງການ ນໍາໂດຍ ທ່ານພັນເອກ ເຊົາໄວ ສານກະມົນ ຜູ້ກໍາກັບການຕໍາຫຼວດກວດຄົນເຂົ້າ-ອອກເມືອງ ຈັງຫວັດບຶງການ ພ້ອມດ້ວຍນັກກິລາທັງສອງຝ່າຍເຂົ້າຮ່ວມ.

   ການແຂ່ງຂັນກິລາໃນຄັ້ງນີ້ເຕັມໄປດ້ວຍບັນຍາກາດອັນເບີກບານມ່ວນຊື່ນຈາກຜູ້ຊົມຜູ້ເຊຍຂ້າງສະໜາມ ທັງສອງທີມ ຕ່າງກໍ່ຜັດປ່ຽນກັນຍິງປະຕູຈົນຈົບເຄິ່ງເວລາທໍາອິດ ທີມຂອງ ດ່ານ ຕມ ບຶງການສາມາດຍິງປະຕູນໍາ ດ່ານ ຕມ ສາກົນປາກຊັນໄປໄດ້ 05 ປະຕູຕໍ່ 04, ເລີ່ມເກມເວລາທີ 2 ທັງສອງທີມກໍ່ໄດ້ປັບປ່ຽນການຫຼີ້ນໂດຍການປ່ຽນໂຕນັກເຕະສໍາຮອງລົງໄປແຂ່ງຂັນ ເຊິ່ງກໍ່ເປັນຜົນດີເຮັດໃຫ້ທີມຂອງດ່ານ ຕມ ສາກົນປາກຊັນ ສາມາດຍິງເພີ່ມອີກ 2 ປະຕູ  ແຕ່ທີມຂອງ ດ່ານ ຕມ ສາກົນ ບຶງການກໍ່ສາມາດໄລ່ມາໄດ້ອີກ 1 ປະຕູໃນເວລາຕໍ່ມາ ລວມເປັນ 6 ປະຕູຕໍ່ 6, ຈາກນັ້ນ ທັງສອງທີມຕ່າງກໍ່ເປີດເກມບຸກໃສ່ກັນດ້ວຍເຕັກນິກຂອງໃຜລາວ ຈົນສາມາດຍິງປະຕູຂອງກັນ ແລະ ກັນໄດ້ອີກທີມລະ 02 ປະຕູ ຈົບເກມການແຂ່ງຂັນ ທັງສອງທີມສາມາດຍິງປະຕູສະເໝີກັນ ດ້ວຍຜົນຄະແນນ 08 ປະຕູຕໍ່ 08, ທັງສອງຝ່າຍຍັງໄດ້ມອບຂອງຂວັນເພື່ອເປັນທີ່ລະນຶກ ໃຫ້ກັນ ແລະ ກັນເນື່ອງໃນໂອກາດພົບປະຢ້ຽມຢາມໃນຄັ້ງນີ້ຕື່ມອີກ.]