ເພື່ອເປັນການສ້າງຂະບວນການຕ້ອນຮັບວັນສໍາຄັນຕ່າງໆຂອງແຂວງກໍ່ຄືຂອງຊາດ ແລະ ທັງເປັນການຮັດແໜ້ນຄວາມສາມັກຄີລະຫວ່າງພະແນກການພາຍໃນຂົງເຂດວັດທະນະທຳ-ສັງຄົມ ແຂວງບໍລິຄຳໄຊ ຂະບວນການແຂ່ງຂັນກິລາເປຕັ່ງ ປະຈຳປີ 2018 ໄດ້ໄຂຂື້ນຢ່າງເປັນທາງການໃນວັນທີ 7 ມີນາ 2018 ຢູ່ທີ່ເດີນກິລາເປຕັງແຂວງບໍລິຄຳໄຊ  ໂດຍການເປັນເຈົ້າພາບຂອງພະແນກ ຖວທ ແຂວງ ເປັນກຽດເຂົ້າຮ່ວມຂອງທ່ານ ເຄນ ລໍມະນີ ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງ, ທ່ານ ບຸນມາກ ພັນດານຸວົງ ຮອງຫົວໜ້າພະແນກສຶກສາທິການ ແລະ ກິລາ, ທ່ານ ດຣ ບຸນແສງ ອັກຄະວົງ ຮອງຫົວໜ້າພະແນກສາທາລະນະສຸກ ແລະ ທ່ານ ຄຳສະຫວາດ ອຸດທະຈັກ ຮອງຫົວໜ້າພະແນກແຮງງານ ແລະ ສະຫວັດດີການສັງຄົມ ມີນັກກິລາ ແລະ ພະນັກງານ-ລັດຖະກອນແຕ່ລະພະແນກການເຂົ້າຮ່ວມຢ່າງເປັນຂະບວນພົດຟື້ນ.

ການແຂ່ງຂັນກິລາໃນຄັ້ງນີ້ຈະໄດ້ດຳເນີນໄປເປັນເວລາໜຶ່ງວັນເຕັມຈຶ່ງສຳເລັດ ໂດຍມີທີມເຂົ້າຮ່ວມທັງໝົດ 48 ທີມ ໃນນັ້ນທີມການນຳມີ 8 ທີມ ແບ່ງເປັນ 2 ສາຍ, ທີມຊາຍທົ່ວໄປ ມີ 24 ທີມ ແບ່ງເປັນ 6 ສາຍ ແລະ ທີມຍີງທົ່ວໄປ ມີ 16 ທີມ ແບ່ງເປັນ 4 ສາຍ. ສຳລັບລາງວັນທີມຊະນະເລີດ ຈະໄດ້ຮັບຂັນ 1 ໜ່ວຍ ພ້ອມລາງວັນເງີນສົດ 500.000 ກີບ, ອັນດັບ 2 ໄດ້ຮັບຂັນ 1 ໜ່ວຍ ເງີນລາງວັນ 400.000 ກີບ, ອັນດັບ 3 ຈະໄດ້ຮັບເງີນສົດ 300.000 ກີບ ແລະ ທີ 4 ໄດ້ຮັບ 200.000 ກີບ.