ເມືອງປາກຊັນ ປະກາດຍົກຍ້າຍບ່ອນປະຈຳການຂອງພະນັກງານຄຸ້ມຄອງນຳພາ

    ເພື່ອເປັນການປັບປຸງລະບົບການຈັດຕັ້ງ ໃຫ້ມີຄວາມເຂັ້ມແຂງຮອບດ້ານ ທັງເປັນການຊຸກຍູ້ສົ່ງເສີມພະນັກງານຄຸ້ມຄອງນຳພາ ທີ່ມີຄວາມຮູ້ ຄວາມສາມາດ ໃນການພັດທະນາວຽກງານ ທີ່ພັກລັດ ແລະ ການຈັດຕັ້ງມອບໝາຍໃຫ້ ໄດ້ສຳເລັດຢ່າງມີປະສິດທິພາບ ໃນວັນທີ 7 ມັງກອນ 2020 ຢູ່ທີ່ສະໂມສອນປົກຄອງເມືອງປາກຊັນ ໄດ້ຈັດພິທີປະກາດ ວ່າດ້ວຍການຍົກຍ້າຍບ່ອນປະຈຳການຂອງພະນັງານຫລັກແຫລ່ງນຳພາ ໂດຍເປັນກຽດເຂົ້າຮ່ວມຂອງທ່ານ ໄມຈອມ ວັນນະສານຄຳ ເຈົ້າເມືອງປາກຊັນ, ມີຄະນະຈັດຕັ້ງແຂວງ, ຄະນະປະຈຳພັກເມືອງ, ກຳມະການພັກເມືອງ, ຫົວໜ້າ, ຄະນະຫ້ອງການອ້ອມຂ້າງປົກຄອງເມືອງປາກຊັນ ເຂົ້າຮ່ວມ.

   ອີງຕາມ ກົດໝາຍວ່າດ້ວຍປົກຄອງທ້ອງຖິ່ນແຫ່ງ ສ ປປ ລາວ ສະບັບເລກທີ 68/ສພຊ, ລົງວັນ 14 ທັນວາ 2015, ໝວດທີ 4, ມາດຕາ 20 ກ່ຽວກັບສິດ ແລະ ໜ້າທີ່ຂອງເຈົ້າແຂວງ - ເຈົ້າຄອງນະຄອນຫຼວງ, ອີງຕາມ ມະຕິຂອງກົມການເມືອງສູນກາງພັກ ເລກທີ 031/ກມສພ, ລົງວັນທີ 3 ມັງກອນ 2018 ວ່າດ້ວຍວຽກງານຄຸ້ມຄອງພະນັກງານ, ອີງຕາມ ຂໍໍ້ຕົກລົງຂອງເຈົ້າແຂວງບໍລິຄຳໄຊ ເລກທີ 08/ຂບຊ, ລົງວັນທີ 6 ມັງກອນ 2020 ໄດ້ ຕົກລົງຍົກຍ້າຍບ່ອນປະຈຳການຂອງພະນັກການນຳພາ-ຄຸ້ມຄອງເມືອງປາກຊັນ ລະອຽດດັ່ງນີ້: ຍົກຍ້າຍ ທ່ານ ສົມຈິດ ພົມສະຫວັດ ຮອງເຈົ້າເມືອງປາກຊັນ ໄປປະຈໍາການຢູ່ຫ້ອງວ່າການແຂວງບໍລິຄຳໄຊ ແລະ ຍົກຍ້າຍ ທ່ານ ສົມຫວັງ ແກ້ວວົງວິຈິດ ຮອງເຈົ້າເມືອງປາກຊັນ ໄປປະຈຳການຢູ່ຫ້ອງວ່າການແຂວງບໍລິຄຳໄຊ.

ວຽງທອງ ສະຫຼຸບການຈັດຕັ້ງປະຕິບັດວຽກງານກໍ່ສ້າງຮາກຖານການເມືອງປະຈໍາປີ 2019

    ຕອນເຊົ້າຂອງວັນທີ 7 ມັງກອນ 2020 ຢູ່ຫ້ອງປະຊຸມຊັ້ນ III ຫ້ອງວ່າການປົກຄອງເມືອງວຽງທອງ, ແຂວງບໍລິຄໍາໄຊ ໄດ້ຈັດກອງປະຊຸມສະຫຼຸບການຈັດຕັ້ງປະຕິບັດວຽກງານກໍ່ສ້າງຮາກຖານການເມືອງ ພັດທະນາຊົນນະບົດຕິດພັນກັບວຽກງານ 3 ສ້າງ ປີ 2019 ແລະ ທິດທາງແຜນການປີ 2020 ໂດຍເປັນກຽດເຂົ້າຮ່ວມເປັນປະທານຂອງ ທ່ານ ວົງສີ ທອງສີອິນທິປັນຍາ ກໍາມະການພັກແຂວງ, ເລຂາຄະນະບໍລິຫານພັກເມືອງ, ເຈົ້າເມືອງວຽງທອງ, ມີພະນັກງານກໍ່ສ້າງຮາກຖານຂັ້ນແຂວງ, ຂັ້ນເມືອງ ແລະ ແຂກຖືກເຊີນເຂົ້າຮ່ວມ.

      ທ່ານ ບົວພັນ ອິນຄໍາມະວົງ ຫົວໜ້າຫ້ອງວ່າການປົກຄອງເມືອງວຽງທອງ ໄດ້ໃຫ້ກຽດຂຶ້ນຜ່ານບົດສະຫຼຸບການຈັດຕັ້ງປະຕິບັດວຽກງານກໍ່ສ້າງຮາກຖານການເມືອງ ພັດທະນາຊົນນະບົດ ຕິດພັນກັບວຽກງານ 3 ສ້າງ ປີ 2019 ແລະ ວາງທິດທາງແຜນການປີ 2020. ໃນໄລຍະ 1 ປີຜ່ານມາ ໄດ້ຫັນເອົາພະນັກງານຫຼັກແຫຼ່ງລົງກໍ່ສ້າງຮາກຖານການເມືອງລົງປະຈໍາຢູ່ 7 ເຂດ ຂອງເມືອງວຽງທອງ ໂດຍການຊີ້ນໍາຂອງຄະນະປະຈໍາພັກເມືອງ, ຜ່ານມາເຫັນວ່າປະຕິບັດວຽກງານກໍ່ສ້າງຮາກຖານການເມືອງໄດ້ສໍາເລັດຫຼາຍໜ້າວຽກໃນແຕ່ລະດ້ານ ຕາມ 4 ເນື້ອໃນ, 4 ຄາດໝາຍ, 4 ແຜນງານ, 28 ໜ້າວຽກຈຸດສຸມ ແລະ 9 ຫົວຂໍ້ວິທະຍາສາດ ເວົ້າລວມ, ເວົ້າສະເພາະແມ່ນວຽກງານສຶກສາອົບຮົມການເມືອງ - ແນວຄິດ, ວຽກງານປັບປຸງລະບົບການເມືອງ, ປັບປຸງລະບົບການຈັດຕັ້ງບ້ານ ຕາມ 5 ໜ່ວຍງານ, ວຽກງານປ້ອງຊາດ - ປ້ອງກັນຄວາມສະຫງົບ, ແກ້ໄຂ 4 ເຖື່ອນ, ແກ້ໄຂບັນຫາສະນໍາ, ບັນຫາສາສະໜາ ແລະ ວຽກງານເສດຖະກິດ, ລຶບລ້າງຄວາມທຸກຍາກຂອງປະຊາຊົນ, ພັດທະນາບ້ານໃຫຍ່ໃຫ້ກາຍເປັນຕົວເມືອງນ້ອຍ, ສ້າງເມືອງເປັນຫົວໜ່ວຍເຂັ້ມແຂງ, ວຽກງານວັດທະນະທໍາ-ສັງຄົມ ແລະ ວຽກງານອື່ນໆ. ພ້ອມທັງຜ່ານທິດທາງແຜນການປີ 2020 ເພື່ອເປັນບ່ອນອິງໃຫ້ແກ່ການຈັດຕັ້ງປະຕິບັດໃນຕໍ່ໜ້າ.

    ບັນດາຜູ້ເຂົ້າຮ່ວມ ໄດ້ຜັດປ່ຽນກັນຂຶ້ນປະກອບຄໍາຄິດ-ຄໍາເຫັນຢ່າງກົງໄປກົງມາຕໍ່ບົດສະຫຼຸບ ແລະ ທິດທາງແຜນການຢ່າງມີຄວາມຮັບຜິດຊອບສູງ, ພ້ອມກັນຫາວິທີສືບຕໍ່ແກ້ໄຂບັນດາໜ້າວຽກທີ່ຍັງຄົງຄ້າງ ແລະ ນໍາໄປຈັດຕັ້ງປະຕິບັດໃຫ້ໄດ້ຮັບຜົນຢ່າງມີຄຸນນະພາບສູງ.

      

ດັ່ງນາວາຫຼົງໄຫຼ

ຊາວພຸດທະສາສະນິກະຊົນຮ່ວມໃຈໃສ່ບາດບຸນນະມັດສະການວັດພຣະທາດພຣະບາດ-ໂພນສັນ

      ເພື່ອຮັກສາຮີດຄອງປະເພນີນີອັນດີງາມຂອງຊາດ ໄວ້ໃຫ້ຄົງຢູ່ກັບຄົນລາວຊາວພຸດຕະຫຼອດໄປ ໃນວັນເພັງ 15 ເດືອນ 2 ພສ 2562 ກົງກັບວັນທີ 9​ ມັງກອນ 2020 ຢູ່ທີ່ເມືອງທ່າພະບາດ ແຂວງບໍລິຄຳໄຊ ໄດ້ຈັດພິທີໃສ່ບາດ​ຖວາຍ​ສັງຄະ​ທານ ນະມັດສະການວັດພຣະທາດພຣະບາດ-ໂພນສັນ ເປັນ​ກຽດ​ເຂົ້າ​ຮ່ວມ​ພິທີ​ໃສ່​ບາດຄັ້ງ​ນີ້ ນຳ​ໂດຍ​ທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ, ມີບັນດາ​ການ​ນຳ​ພັກ-ລັດ, ພະນັກງານການ​ນຳ​ອາວຸໂສບຳນານ, ເຖົ້າ​ແກ່​ແນວ​ໂຮມ, ອົງການ​ຈັດຕັ້ງ​ມະຫາຊົນ ແລະ ຊາວ​ພຸດ​ທະສາ​ສະ​ນິ​ກະ​ຊົນ​ເຂົ້າຮ່ວມຢ່າງຫຼວງຫຼາຍ.

     ບັນຍາກາດການໃສ່ບາດໃນປີນີ້ແມ່ນມີຄວາມຟົດຟື້ນຫຼາຍ ມີທັງພໍ່ແມ່ປະຊາຊົນ ທັງພາຍໃນແຂວງ, ຕ່າງແຂວງ ແລະ ຕ່າງປະເທດ ພ້ອມໃຈກັນຫ້າງຫາກະກຽມເຄື່ອງໃສ່ບາດ, ນຸ່ງຖືຕາມຮີດຄອງປະເພນີ ເພື່ອເດີນທາງມາເຂົ້າຮ່ວມ. ພິທີທາງສາສະໜາ ໄດ້ເລີ່ມດ້ວຍການໄຫ້​ວພຣະຮັບ​ສິນ​, ໃສ່ບາດ, ຟັງ​ເທດສະໜາ, ຢາດນໍ້າ ແລະ ຄາລະວະ​ຮັບ​ພອນ. ການໃສ່ບາດຖວາຍສັງກະທານຕາມພຸດທະສາສະໜາ ນອກຈາກຈະເປັນການອຸທິດສ່ວນບຸນກຸສົນ ໃຫ້ແກ່ເຈົ້າກຳນາຍເວນ ຜູ້ທີ່ລ່ວງລັບໄປແລ້ວນັ້ນ ໃຫ້ໄປສູ່ສຸຂະຕິແລ້ວ ຍັງເຮັດໃຫ້ຕົນເອງມີຄວາມສຸກກາຍສະບາຍໃຈ ໃນການຈັດຕັ້ງປະຕິບັດວຽກງານໃນຊີວິດປະຈຳວັນ. ນອກນັ້ນຍັງເປັນການເຕົ້າໂຮມຄວາມສາມັກຄີປອງດອງຂອງປະຊາຊົນບັນດາເຜົ່າ ແລະ ເປັນການອານຸລັກຮັກສາວັດທະນະທຳຮີດຄອງປະເພນີອັນດີງາມຂອງຊາດ ໃຫ້ມີຄວາມຍືນຍົງຄົງຕົວຢູ່ຄູ່ກັບຄົນລາວຊາວພຸດຕະຫຼອດໄປ.

     ວັດພະທາດພະບາດ-ໂພນສັນ ມີຄວາມໝາຍສໍາຄັນທາງດ້ານ ປະຫວັດສາດ, ວັດທະນະທໍາ - ສັງຄົມ ມາແຕ່ດົນນານ, ເປັນສູນລວມຈິດໃຈຂອງປະຊາຊົນລາວບັນດາເຜົ່າ ແລະ ເປັນບ່ອນເຄົາລົບບູຊາກາບໄຫວ້, ເນື່ອງຈາກວ່າວັດພະທາດພະບາດ - ໂພນສັນ ມີຈຸດທີ່ຕັ້ງສວຍງາມ ມີສະພາບແວດລ້ອມທີ່ອຸດົມສົມບູນ ທີ່ເປັນເອກະລັກສະເພາະຂອງພື້ນທີ່ ເປັນສູນລວມທາງສາສະໜາທີ່ປະຊາຊົນລາວໃຫ້ຄວາມເຄົາລົບນັບຖື ຜ່ານການສໍາຫຼວດ ແລະ ປະເມີນຜົນຕົວຈິງເຫັນວ່າວັດພະທາດພະບາດ-ໂພນສັນ ແມ່ນຫຼັກຖານອັນໂດດເດັ່ນທີ່ສະແດງເຖິງຜົນງານເອກຂອງການສ້າງສັນ ທີ່ມີຈຸດທີ່ຕັ້ງ ແລະ ເອກະລັກສະເພາະຂອງການຈັດວາງແຜນຜັງ ໂຄງປະກອບຂອງພື້ນທີ່ອາຄານທາງພຸດທະສາສະໜາ ມີຄວາມໂດດເດັ່ນທາງດ້ານປັດຕິມະກໍາ ແລະ ມີຄວາມເກົ່າແກ່, ມາຮອດປະຈຸບັນ ວັດດັ່ງກ່າວ ຈຶ່ງໄດ້ຮັບຮອງເປັນມໍລະດົກຂອງທ້ອງຖິ່ນ ແຂວງບໍລິຄຳໄຊ ໃນວັນທີ 22 ມັງກອນ 2016 ເປັນຕົ້ນມາ.

 

ບໍລິຄຳໄຊ ແຕ່ງຕັ້ງຫົວໜ້າພະແນກຍຸຕິທຳຄົນໃໝ່

       

      ໃນ​ຕອນ​ບ່າຍຂອງ​ວັນ​ທີ 06 ກຸມພາ 2019 ຢູ່​ທີ່​ຫ້ອງ​ປະຊຸມ​ຂອງ​ພະ​ແນ​ກຍຸຕິທຳ​ແຂວງ ​ໄດ້​ຈັດ​ພິທີ​ມອບ - ຮັບໜ້າ​ທີ່​ລະຫວ່າງ ຮັກສາການຫົວໜ້າພະແນກຍຸຕິທຳແຂວງຜູ້ເກົ່າ ແລະ ຫົວໜ້າພະແນກຍຸຕິທຳແຂວງຜູ້ໃໝ່ ​ໂດຍເປັນ​ກຽດ​ເຂົ້າ​ຮ່ວມ​ຂອງ​ທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ, ມີ​ບັນດາຫົວໜ້າ​ພະ​ແນ​ກການ​ອ້ອມ​ຂ້າງ ພ້ອມ​ດ້ວຍ​ພະນັກງານ​ພາຍໃນພະແນກ​ ເຂົ້າ​ຮ່ວ​ມ.

    ອີງ​ຕາມ ຂໍ້​ກຳນົດ​ຂອງ​ກົມ​ການ​ເມືອງ​ສູນ​ກາງ​ພັກ ສະບັບ​​ເລກທີ 02/ກມສພ, ລົງ​ວັນ​ທີ 14 ກໍລະກົດ 2003 ວ່າ​ດ້ວຍ​ການ​ແຕ່ງ​ຕັ້ງ, ສັບ​ປ່ຽນ​ໜ້າ​ທີ່ ​ແລະ ບ່ອນ​ປະຈຳການ​ຂອງ​ພະນັກງານ, ອີງຕາມ ໜັງສືແຈ້ງຕອບຂອງລັດຖະມົນຕີກະຊວງຍຸຕິທຳ ສະບັບເລກທີ 011/ກຍ, ລົງວັນທີ 04 ມັງກອນ 2019, ອີງຕາມ ມະຕິກອງປະຊຸມສະພາປະຊາຊົນແຂວງ ສະບັບເລກທີ 41/ສພຂ.ບຊ, ລົງວັນທີ 01 ກຸມພາ 2019 ເຈົ້າແຂວງບໍລິຄຳໄຊ ໄດ້ອອກຂໍ້ຕົກລົງສະບັບເລກທີ 50/ຂບຊ ລົງວັນທີ 04 ກຸມພາ 2019 ວ່າດ້ວຍການແຕ່ງຕັ້ງ ທ່ານ ສົມໃຈ ຄຸນພະໄຊ ເປັນຫົວໜ້າພະແນກຍຸຕິທຳແຂວງ.

    ໃນພິທີ ທ່ານ ບຸນຄົບ ຈັນທະວົງ ຮອງຫົວໜ້າຄະນະຈັດຕັ້ງແຂວງ ຍັງໄດ້ຜ່ານຂໍ້ຕົກລົງຂອງທ່ານເຈົ້າແຂວງບໍລິຄຳໄຊ ສະບັບເລກທີ 45/ຂບຊ ລົງວັນທີ 04 ກຸມພາ 2019 ວ່າດ້ວຍການແຕ່ງຕັ້ງຮອງຫົວໜ້າພະແນກຍຸຕິທຳແຂວງ ໂດຍໄດ້ຕົກລົງແຕ່ງຕັ້ງທ່ານ ຄຳຜັນ ສິດໄຊຍະສານ ເປັນຮອງຫົວໜ້າພະແນກຍຸຕິທຳແຂວງ.